Kodali Nani: చంద్రబాబుకు వేల కోట్లు ఎక్కడివి.?

చంద్రబాబు నాయుడిపై మాజీ మంత్రి కొడాలి నాని ఆగ్రహం వ్యక్తం చేశారు. తనను అరెస్ట్‌ చేస్తారని చంద్రబాబు ప్రచారం చేసుకుంటున్నారన్న ఆయన.. అవినీతికి పాల్పడితే చట్టం ఎవరినీ వదిలిపెట్టదన్నారు. చంద్రబాబు ఐటీ నోటీసులపై ఎందుకు స్పందించడం లేదని ప్రశ్నించారు. పాలు, పిడికెలు అమ్మిన వ్యక్తికి వేల కొట్ల ఆస్తి ఎక్కడి నుంచి వచ్చిందో చెప్పాలని కొడాలి నాని ప్రశ్నించారు. పాలు అమ్మి పదివేల కోట్లు సంపాదించిన వారు దేశంలో ఎవరూ లేరన్నారు. చంద్రబాబు గతంలో ముఖ్యమంత్రిగా ఉన్న సమయంలో దోచుకున్న డబ్బును వైట్‌గా మార్చడానికే పాల వ్యాపారం ప్రారంభించారని విమర్శించారు.

మనం చేసిన మంచిని ప్రజలకు చెప్పాలని కొడాలి నాని అన్నారు. కానీ చంద్రబాబు రాష్ట్రానికి మంచి చేయకపోగా.. సీఎం జగన్‌ చేసిన అభివృద్ధి పనుల వద్దకు వెళ్లి సెల్ఫీలు తీసుకుంటున్నారన్నారు. చంద్రబాబు ఎలాగో రాష్ట్రాన్ని అభివృద్ధి చేయలేదన్న ఆయన.. జగన్‌ మోహన్‌ రెడ్డి చేసిన అభివృద్ధి చూసి నేర్చుకోవడానికి సెల్ఫీలు తీసుకుంటున్నారని ఎద్దేవా చేశారు. మరోవైపు హైదరాబాద్‌ను నిర్మించానని చంద్రబాబు భావిస్తున్నాడన్న నానీ.. కానీ బాబు అక్కడ పోటీచేస్తే డిపాజిట్లు కూడా రావని మండిపడ్డారు.

గతంలో తెలుగు దేశం పార్టీ అధికారంలో ఉన్న సమయంలో చంద్రబాబు చూపించిన గ్రాఫిక్స్‌ డిజైన్‌లను ప్రజలు ఇంకా మర్చిపోలేదన్నారు. అధికారం కోసం చంద్రబాబు ఆరాటపడుతున్నారని, ఆయన ఎన్ని ఎత్తుగడలు వేసినా అధికారంలోకి రాడని కొడాలి నాని స్పష్టం చేశారు. అంతే కాకుండా తన పుత్రుడు, దత్తపుత్రుడు సైతం ప్రజలను ప్రలోభాలకు గురి చేసేందుకు ప్రయత్నిస్తున్నారన్న ఆయన.. పవన్‌, లోకేష్‌లు సైతం ఎన్ని ఎత్తుగడలు వేసినా, సినిమా డైలాగులు రాజకీయాల్లో ఉపయోగించినా ఎమ్మెల్యేగా గెలవలేరన్నారు.