Delhi Services Bill: గవర్నమెంట్ ఆఫ్ నేషనల్ క్యాపిటల్ టెరిటరీ ఆఫ్ ఢిల్లీ(సవరణ బిల్లు)- 2023ను కేంద్ర హోం మంత్రి అమిత్ షా నేడు రాజ్యసభలో (Rajya Sabha) ప్రవేశ పెట్టనున్నారు. దేశ రాజధాని ఢిల్లీలో సివిల్ సర్వీసెస్ అధికారుల బదిలీలు, నియామకాలపై అధికారాన్ని లెఫ్ట్ నెంట్ గవర్నర్ కట్టబెట్టేందుకు ఈ బిల్లు రూపొందించింది. దీన్ని ఢిల్లీలోని కేజ్రీవాల్ సర్కార్ తీవ్రంగా వ్యతిరేకిస్తోంది.

ఢిల్లీలో సివిల్ సర్వీసెస్ అధికారుల నియామకాలు, బదిలీల అధికారాన్ని లెఫ్ట్ నెంట్ గవర్నర్ కు కట్టబెడుతూ ఈ ఏడాది మే 19న కేంద్రం ఒక ఆర్డినెన్స్ ను తీసుకు వచ్చింది. ఇప్పుడు ఆర్డినెన్స్ స్థానంలో బిల్లును ప్రవేశ పెట్టి చట్టంగా తీసుకు రావాలని కేంద్రం నిర్ణయం తీసుకుంది. దీనిపై ఢిల్లీ సర్కార్ తీవ్రంగా ఫైర్ అయ్యింది. ఈ బిల్లును వ్యతిరేకించాలని, బిల్లును అడ్డుకునే విషయంలో పలు పార్టీల నేతలను కలుసుకుని వారి మద్దతును కేజ్రీవాల్ కోరుతున్నారు.

ఇటీవల విపక్ష ఎంపీల ఆందోళనల నడుమ ఈ బిల్లుకు లొక్ సభలో ఆమోదం తెలిపింది. బిల్లుపై చర్చ సందర్భంగా ఆప్, విపక్షాలపై కేంద్ర హోం మంత్రి అమిత్ షా తీవ్రంగా విరుచుకుపడ్డారు. ఢిల్లీకి సంబంధించిన చట్టాలు చేసే అధికారం పార్లమెంట్ కు ఉందని స్పష్టం చేశారు. ఈ విషయంలో ఎలాంటి అభ్యంతరాలు వచ్చినా అదంతా కేవలం రాజకీయ పార్టీల దురుద్దేశంతోనేనన్నారు.

ఇక రాజ్యసభలో ఇవాళ ఈ బిల్లు ప్రవేశ పెట్టనుండటంతో ఆప్, కాంగ్రెస్, ఇతర పార్టీలు అలర్ట్ అయ్యాయి. ఆయా పార్టీలు తమ సభ్యులకు విప్ జారీ చేశాయి. బిల్లు ప్రాధాన్యత దృష్ట్యా తమ పార్టీ సభ్యులు ఈ నెల 7,8 తేదీల్లో రాజ్యసభకు ఖచ్చితంగా హాజరు కావాలని ఆప్ విప్ జారీ చేసింది. ఇక సభలో అనుసరించాల్సిన వ్యూహాలపై చర్చించేందుకు ఇండియా కూటమి సభ్యులు మల్లికార్జున ఖర్గే కార్యాలయంలో ఇవాళ ఉదయం 10 గంటలకు సమావేశం కానున్నారు.