CM Revanth Reddy : రేపు యాదగిరి గుట్టకు సీఎం రేవంత్ రెడ్డి.. రూ.100 కోట్ల అభివృద్ధి పనులకు శ్రీకారం

CM Revanth Reddy : తెలంగాణలో ప్రముఖ పుణ్యక్షేత్రంగా గుర్తింపు పొందిన యాదగిరిగుట్ట శ్రీ లక్ష్మీనరసింహస్వామి దివ్యక్షేత్రం మరో కీలక అభివృద్ధి దశలోకి అడుగుపెడుతోంది. ఆలయాన్ని ఆధ్యాత్మిక, సాంస్కృతిక, పర్యాటక కేంద్రంగా మరింత విస్తరించేందుకు రాష్ట్ర ప్రభుత్వం భారీ ప్రణాళికలు సిద్ధం చేసింది. ఈ నేపథ్యంలో ముఖ్యమంత్రి A. Revanth Reddy యాదగిరిగుట్ట పర్యటన ఖరారైంది. కంచి కామకోటి పీఠాధిపతి Sri Shankara Vijayendra Saraswati సమక్షంలో సుమారు రూ.100 కోట్ల అంచనా వ్యయంతో చేపట్టనున్న ఐదు ప్రధాన అభివృద్ధి పనులకు సీఎం భూమిపూజలు, శంకుస్థాపనలు చేయనున్నారు. ఆలయ ఈవో భవాని శంకర్ ఆధ్వర్యంలో జిల్లా యంత్రాంగం అన్ని ఏర్పాట్లు పూర్తి చేసింది. ముఖ్యమంత్రి హోదాలో రేవంత్ రెడ్డి యాదగిరిగుట్టను సందర్శించడం ఇది నాలుగోసారి కావడం ప్రాధాన్యం సంతరించుకుంది.

ఈ పర్యటనలో భాగంగా యాదాద్రి అభివృద్ధి రూపురేఖలను మార్చే ఐదు ప్రతిష్ఠాత్మక ప్రాజెక్టులకు శ్రీకారం చుడుతున్నారు. వాటిలో ప్రధానంగా టెంపుల్ సిటీ పరిధిలో 15 ఎకరాల్లో రూ.43.80 కోట్లతో నిర్మించనున్న అతిపెద్ద వేద పాఠశాల ప్రత్యేక ఆకర్షణగా నిలుస్తోంది. ఆశ్రమ గురుకుల పద్ధతిలో 300 మంది విద్యార్థులకు వేదాలు, ఆగమ శాస్త్రాలు బోధించేలా ఈ ప్రాజెక్టును రూపకల్పన చేశారు. కంచి పీఠం పర్యవేక్షణలో నడిచే ఈ వేద విద్యాసంస్థలో గోశాల, యజ్ఞశాల వంటి ప్రత్యేక సదుపాయాలు కూడా ఏర్పాటు చేయనున్నారు. అదేవిధంగా కొండపై బస్టాండ్ సమీపంలో కార్ పార్కింగ్‌, డార్మిటరీ హాల్‌, దీక్షాపరుల కోసం ప్రత్యేక వసతులతో కూడిన మల్టీపర్పస్ భవనాన్ని నిర్మించనున్నారు.

భక్తుల సౌకర్యాలను దృష్టిలో పెట్టుకుని మరిన్ని కీలక పనులు కూడా చేపడుతున్నారు. పాత బాలాలయం స్థలంలో వందలాది జంటలు ఒకేసారి వివాహాలు చేసుకునేలా బహుళ వివాహ మండపాన్ని నిర్మించనున్నారు. కాలినడకన వచ్చే భక్తులకు ఎండ, వర్షాల నుంచి రక్షణ కల్పించేందుకు మెట్ల మార్గం మొత్తం ఆధునిక షెల్టర్‌తో కప్పివేయనున్నారు. అలాగే మాడవీధులకు సులభంగా చేరుకునేలా కొత్త మెట్ల నిర్మాణాన్ని కూడా చేపడుతున్నారు. యాదగిరిగుట్టలో పెరుగుతున్న భక్తుల రద్దీకి అనుగుణంగా ఈ ప్రాజెక్టులు ఎంతో ఉపయోగపడతాయని అధికారులు భావిస్తున్నారు.

ముఖ్యమంత్రి పర్యటన ఉదయం హెలిప్యాడ్‌ చేరుకోవడంతో ప్రారంభమై, వేద పాఠశాల భూమిపూజ, అభివృద్ధి పనుల శంకుస్థాపనలు, అనంతరం స్వామివారి దర్శనం, ప్రత్యేక పూజలతో కొనసాగనుంది. ఈ కార్యక్రమానికి దేవాదాయ శాఖ మంత్రి Konda Surekha, మంత్రి Komatireddy Venkat Reddy, మంత్రి Uttam Kumar Reddy సహా పలువురు ప్రజాప్రతినిధులు హాజరుకానున్నారు. సీఎం పర్యటన నేపథ్యంలో జిల్లా ఎస్పీ అక్షాంశ్ యాదవ్ ఆధ్వర్యంలో భారీ భద్రతా ఏర్పాట్లు చేపట్టారు. ఇదిలా ఉండగా కాళేశ్వరం నుంచి యాదగిరిగుట్టకు చేరుకున్న కంచి పీఠాధిపతి శ్రీ శంకర విజయేంద్ర సరస్వతి స్వామికి ఆలయ అర్చకులు పూర్ణకుంభ స్వాగతం పలికారు. అనంతరం స్వామివారు ఆలయ దర్శనం చేసుకుని ప్రత్యేక పూజల్లో పాల్గొన్నారు.