BIG BREAKING: కవితకు బిగ్ షాక్.. TRS పేరుకు ఈసీ నో?

TRS : తెలంగాణ రాజకీయాల్లో ‘టీఆర్ఎస్’ (TRS) టైటిల్ వార్ వ్యవహారం రోజురోజుకూ మరింత హీటెక్కుతోంది. ఎమ్మెల్సీ కవిత ప్రతిపాదించిన కొత్త రాజకీయ పార్టీ ‘తెలంగాణ రక్షణ సేన’ (TRS) పేరు చుట్టూ ఇప్పుడు పెను వివాదం నడుస్తోంది. ఈ పేరును ఎవరికీ కేటాయించవద్దంటూ ఇప్పటికే భారత్ రాష్ట్ర సమితి (BRS) కేంద్ర ఎన్నికల సంఘాన్ని ఆశ్రయించగా, తాజాగా మహారాష్ట్రకు చెందిన మరో సంస్థ కూడా రంగంలోకి దిగడంతో ఈ వివాదం సరికొత్త మలుపు తిరిగింది. ఊహించని విధంగా ఎదురవుతున్న ఈ లీగల్, పొలిటికల్ అడ్డంకులతో కవిత కొత్త పార్టీ భవితవ్యంపై రాజకీయ వర్గాల్లో తీవ్ర ఉత్కంఠ నెలకొంది.

ఈ టైటిల్ రేసులోకి మహారాష్ట్రకు చెందిన ‘తెలంగాణ రాష్ట్రసామాజిక సేన’ అనూహ్యంగా ప్రవేశించింది. సోలాపూర్ కేంద్రంగా పనిచేస్తున్న ఈ సంస్థ తరఫున దయానంద్ మహాదేవ్ మామ్‌డ్యాల్ అనే వ్యక్తి.. కవిత తన పార్టీ పేరును అధికారికంగా ప్రకటించడానికి ఒక రోజు ముందే కేంద్ర ఎన్నికల సంఘానికి (ECI) దరఖాస్తు చేసుకున్నట్లు సమాచారం. ‘టీఆర్ఎస్’ అనే సంక్షిప్త నామం (Abbreviation) తమకే దక్కాలని వారు పట్టుబడుతుండటంతో, కవిత గ్రూపునకు కాలక్రమేణా గట్టి పోటీ ఎదురయ్యేలా కనిపిస్తోంది.

మరోవైపు, ఈ పేరుపై భారత్ రాష్ట్ర సమితి (BRS) అధిష్ఠానం తీవ్ర అభ్యంతరం వ్యక్తం చేస్తూ ఈసీఐకి అధికారికంగా ఫిర్యాదు చేసింది. 14 ఏళ్ల సుదీర్ఘ తెలంగాణ ఉద్యమంలో ‘టీఆర్ఎస్’ (తెలంగాణ రాష్ట్ర సమితి) అనే పేరు ప్రజా భావోద్వేగాలతో పెనవేసుకుపోయిందని బీఆర్ఎస్ గుర్తు చేస్తోంది. నేటికీ గ్రామీణ ప్రాంతాల్లోని సామాన్య ప్రజలు బీఆర్ఎస్‌ను ‘టీఆర్ఎస్’గానే గుర్తిస్తున్నారని, ఇప్పుడు అదే పేరుతో మరో పార్టీ వస్తే ఓటర్లు తీవ్రంగా గందరగోళానికి గురయ్యే ప్రమాదం ఉందని ఆ పార్టీ లీగల్ సెల్ వాదిస్తోంది.

ఇదిలావుండగా, కొత్త పార్టీ రిజిస్ట్రేషన్ ప్రక్రియలో భాగంగా పత్రికల్లో ఇచ్చిన పబ్లిక్ నోటీసుపై కూడా రికార్డు స్థాయిలో అభ్యంతరాలు వ్యక్తమయ్యాయి. ‘తెలంగాణ రక్షణ సేన’కు టీఆర్ఎస్ పేరు కేటాయించవద్దంటూ దాదాపు 600 నుంచి 700 వరకు ప్రజా అభ్యంతరాలు (Public Objections) నేరుగా ఎన్నికల సంఘానికి అందినట్లు తెలుస్తోంది. వీటితో పాటు తెలంగాణ రాష్ట్ర ఎన్నికల సంఘం వద్ద ఇప్పటికే ‘తెలంగాణ రాజ్య సమితి’ పేరుతో నమోదైన మరో రాజకీయ పార్టీ కూడా ఈ సంక్షిప్త నామాన్ని ఉపయోగించడాన్ని తీవ్రంగా వ్యతిరేకిస్తూ ఈసీఐని ఆశ్రయించింది.

ఇంతపెద్ద ఎత్తున అభ్యంతరాలు, ఫిర్యాదులు వెల్లువెత్తుతుండటంతో కవిత ప్రతినిధుల బృందం కూడా అప్రమత్తమైంది. ఈ వివాదంపై కేంద్ర ఎన్నికల సంఘానికి పూర్తిస్థాయి వివరణ ఇచ్చేందుకు, తమ వాదనను బలంగా వినిపించేందుకు కవిత లీగల్ టీమ్ ఢిల్లీ వేదికగా సిద్ధమవుతున్నట్లు సమాచారం. చుట్టుముట్టిన వివాదాలు, పొలిటికల్ ఈక్వేషన్ల మధ్య కవిత ఆశించిన ‘టీఆర్ఎస్’ పేరు ఆమె కొత్త పార్టీకి దక్కుతుందా లేదా అనేది ఇప్పుడు తెలుగు రాష్ట్రాల రాజకీయాల్లో అత్యంత ఆసక్తికరమైన ‘హాట్ టాపిక్’గా మారింది.