Ranji Trophy 2026: ఆంధ్రా బౌలర్లను ముప్పుతిప్పలు.. 299 పరుగుల వద్ద ఔట్..ఎవరీ  సుదీప్ కుమార్?

బెంగాల్ క్రికెటర్ సుదీప్ కుమార్ ఘరామి రంజీ ట్రోఫీలో తృటిలో ఒక భారీ రికార్డును చేజార్చుకున్నారు. ఆంధ్రా జట్టుతో జరుగుతున్న క్వార్టర్ ఫైనల్ మ్యాచ్‌లో ఆయన కేవలం ఒక్క పరుగు తేడాతో ట్రిపుల్ సెంచరీని మిస్ చేసుకున్నారు. 299 పరుగుల వ్యక్తిగత స్కోరు వద్ద అవుట్ అవ్వడం క్రికెట్ ప్రపంచంలోనే చాలా అరుదైన విషయం. 

రంజీ ట్రోఫీ క్వార్టర్ ఫైనల్‌లో బెంగాల్ బ్యాటర్ సుదీప్ కుమార్ ఘరామి అద్భుతమైన ఆటతీరుతో అందరినీ ఆకట్టుకున్నా, చివరకు ఒక విషాదకరమైన రికార్డుతో పెవిలియన్ చేరారు. ఆంధ్రా బౌలర్ షేక్ రషీద్ వేసిన బంతిని అంచనా వేయడంలో విఫలమైన ఘరామి, క్లీన్ బౌల్డ్ అయ్యారు. అప్పటికి ఆయన స్కోరు సరిగ్గా 299 పరుగులు. రంజీ ట్రోఫీ సుదీర్ఘ చరిత్రలో 299 పరుగుల వద్ద అవుట్ అయిన మొట్టమొదటి బ్యాటర్‌గా ఆయన ఒక అవాంఛిత రికార్డును తన ఖాతాలో వేసుకున్నారు. గతంలో 1988లో మహారాష్ట్రకు చెందిన శంతను సుగ్వేకర్ 299 పరుగుల వద్ద నాటౌట్‌గా నిలిచారు కానీ, ఇలా అవుట్ అవ్వడం మాత్రం ఇదే మొదటిసారి.

రెండు రోజుల పాటు క్రీజులో పాతుకుపోయి

ఈ ఇన్నింగ్స్ కోసం ఘరామి ఏకంగా 596 బంతులు ఎదుర్కొన్నారు. రెండు రోజుల పాటు క్రీజులో పాతుకుపోయి 31 ఫోర్లు, 6 సిక్సర్లతో ఆంధ్రా బౌలర్లను ముప్పుతిప్పలు పెట్టారు. ఒకానొక దశలో బెంగాల్ జట్టు 153 పరుగులకే 5 వికెట్లు కోల్పోయి పీకల్లోతు కష్టాల్లో ఉన్నప్పుడు, ఘరామి తన అద్భుత పోరాటంతో జట్టును ఆదుకున్నారు. ఆయనకు తోడుగా సుమంత గుప్తా (81), వికెట్ కీపర్ షాకిర్ హబీబ్ గాంధీ (95) కూడా రాణించడంతో బెంగాల్ తొలి ఇన్నింగ్స్‌లో 629 పరుగుల భారీ స్కోరు సాధించింది.

చివర్లో భారత స్టార్ పేసర్ మొహమ్మద్ షమీ తన బ్యాటింగ్‌తో స్టేడియంను హోరెత్తించారు. కేవలం 33 బంతుల్లోనే 53 పరుగులు చేసి బెంగాల్ ఆధిక్యాన్ని మరింత పెంచారు. ఆంధ్రా జట్టు మొదటి ఇన్నింగ్స్‌లో 295 పరుగులకే ఆలౌట్ అవ్వడంతో, బెంగాల్‌కు భారీ ఆధిక్యం లభించింది. ట్రిపుల్ సెంచరీ మిస్ అయినందుకు ఘరామి తీవ్ర నిరాశకు లోనైనప్పటికీ, ఆయన ఆడిన ఈ మారథాన్ ఇన్నింగ్స్ బెంగాల్ సెమీఫైనల్ చేరడంలో కీలక పాత్ర పోషించింది.

సుదీప్ ఘరామి పశ్చిమ బెంగాల్‌లోని నైహతిలో ఒక సాధారణ కుటుంబంలో జన్మించారు. ఆయన తండ్రి ఒక కార్పెంటర్.ఆర్థిక ఇబ్బందులు ఉన్నప్పటికీ, సుదీప్‌లో ఉన్న క్రికెట్ పిచ్చిని గమనించిన ఆయన తండ్రి, కొడుకును క్రికెటర్‌గా చూడాలని ఎంతో కష్టపడ్డారు. సరైన క్రికెట్ కిట్ కొనేందుకు కూడా ఇబ్బంది పడిన రోజుల్లో, తన టాలెంట్‌తోనే సుదీప్ అందరి దృష్టిని ఆకర్షించారు. ప్రస్తుతం బెంగాల్ తరఫున మూడు ఫార్మాట్లలోనూ ఆడుతున్న సుదీప్, ఐపీఎల్ ఫ్రాంచైజీల దృష్టిని కూడా ఆకర్షిస్తున్నారు. రాబోయే సీజన్లలో ఆయన ఐపీఎల్‌లో మెరిసే అవకాశం ఉంది. తన తండ్రి కష్టానికి ఫలితంగా భారత జాతీయ జట్టుకు ఆడాలన్నదే తన ఏకైక లక్ష్యమని ఆయన పలు ఇంటర్వ్యూలలో చెప్పారు.