Rape case: తెలంగాణలో మరో దారుణం.. మద్యం తాగించి మహిళా కూలీలపై అత్యాచారం!

Nagarkurnool: తెలంగాణలోని నాగర్ కర్నూలో జిల్లాలో దారుణం చోటుచేసుకుంది. ఇద్దరు మహిళా కూలీలకు మద్యం తాగించి ఇద్దరు వ్యక్తులు అత్యాచారానికి పాల్పడిన ఘటన శ్రీశైలం-హైదరాబాద్‌ జాతీయ రహదారి సమీపంలోని హాజీపూర్‌లో చోటుచేసుకుంది. పట్టణంలో బండల దుకాణాలు నిర్వహించే వినోద్‌ సింగ్, గజానంద సింగ్‌ తమ ఇంట్లో పని ఉందని కూలీ మాట్లాడుకొని మహిళలను తీసుకెళ్లి ఈ దారుణానికి పాల్పడగా వివరాలు ఇలా ఉన్నాయి.

ఇంట్లో పని కోసం తీసుకెళ్లి..
ఈ మేరకు పోలీసులు తెలిపిన వివరాల ప్రకారం.. బల్మూర్‌ మండలంలోని వేర్వేరు గ్రామాలకు చెందిన ఇద్దరు మహిళలు అచ్చంపేటకు వచ్చి రోజువారీ కూలీలుగా పని చేస్తున్నారు. గురువారం కూడా వారు పని కోసం వచ్చారు. ఈ క్రమంలోనే వినోద్‌ సింగ్, గజానంద సింగ్‌ తమ ఇంట్లో పని కోసం తీసుకెళ్లి ఇంటిని శుభ్రం చేయించుకున్నారు. పని అయిపోగానే ఇద్దరినీ నమ్మించి మధ్యాహ్నం 3 గంటలకు కారులో ఎక్కించుకుని నల్గొండ జిల్లా డిండి వైపు తీసుకెళ్లి మద్యం తాగించారు. అనంతరం శ్రీశైలం-హైదరాబాద్‌ జాతీయ రహదారి సమీపంలోని హాజీపూర్‌ శివారు ప్రాంతంలో కారు నిలిపి మత్తులో ఉన్న మహిళలపై అత్యాచారానికి పాల్పడ్డారు. సాయంత్రం 6 గంటలకు అచ్చంపేట శివారులో వారిని వదిలేశారు. అపస్మారక స్థితిలో ఉన్న మహిళలను గమనించిన స్థానికులు పోలీసులకు సమాచారం అందించారు. కేసు నమోదు చేసి నిందితులను రిమాండ్‌కు తరలించినట్లు సీఐ రవీందర్‌ తెలిపారు.