BREAKING: మాజీ కేంద్రమంత్రి, సీనియర్ కాంగ్రెస్ నేత కన్నుమూత

అసోం రాజకీయాల్లో తనదైన ముద్ర వేసిన కాంగ్రెస్ సీనియర్ నేత, కేంద్ర మాజీ మంత్రి బిరేన్ సింగ్ ఎంగ్టి (81) కన్నుమూశారు. గత కొంతకాలంగా అనారోగ్యంతో బాధపడుతున్న ఆయన, అసోం రాజధాని గువహటిలోని ఓ ప్రైవేట్ ఆసుపత్రిలో చికిత్స పొందుతూ మంగళవారం తుదిశ్వాస విడిచారు. ఆయన మరణవార్తతో అసోం రాజకీయ వర్గాల్లో విషాద ఛాయలు అలముకున్నాయి.

ఆరుసార్లు ఎంపీగా రికార్డు

బిరేన్ సింగ్ ఎంగ్టి సామాన్య నాయకుడు కాదు. దాదాపు ఐదు దశాబ్దాల పాటు ప్రజలతో మమేకమైన నేత. కర్బి ఆంగ్లాంగ్ జిల్లాలోని దిఫు పార్లమెంట్ నియోజకవర్గం నుంచి ఆయన ఏకంగా ఆరుసార్లు లోక్‌సభకు ఎన్నికయ్యారు. 1971, 1977, 1984లో వరుస విజయాలు సాధించారు. సుదీర్ఘ విరామం తర్వాత 2004, 2009, 2014లో వరుసగా మూడుసార్లు ఎంపీగా గెలిచి తన పట్టును నిరూపించుకున్నారు.

కేంద్ర మంత్రిగా, కౌన్సిల్ బాధ్యుడిగా..

కేవలం ఎంపీగానే కాకుండా, దేశ రాజకీయాల్లోనూ ఆయన కీలక పాత్ర పోషించారు. మాజీ ప్రధాని రాజీవ్ గాంధీ హయాంలో ఆయన కేంద్ర మంత్రిగా సేవలు అందించారు. అలాగే స్థానికంగా 'కర్బి ఆంగ్లాంగ్ అటానమస్ కౌన్సిల్' చీఫ్ ఎగ్జిక్యూటివ్ మెంబర్‌గా బాధ్యతలు నిర్వహించి, గిరిజన ప్రాంతాల అభివృద్ధికి ఎంతో కృషి చేశారు. బిరేన్ సింగ్ మృతిపై రాజకీయాలకు అతీతంగా పలువురు నేతలు సంతాపం వ్యక్తం చేస్తున్నారు. 

హిమంత బిశ్వశర్మ (అసోం సీఎం): "బిరేన్ సింగ్ మరణం అసోంకు తీరని లోటు. దిఫు ప్రాంత అభివృద్ధికి ఆయన చేసిన సేవలు చిరస్మరణీయం. ఆయన కుటుంబ సభ్యులకు నా ప్రగాఢ సానుభూతిని తెలియజేస్తున్నాను."

గౌరవ్ గొగోయ్ (కాంగ్రెస్ సీనియర్ నేత): "ఆయన మరణం ఈ ప్రాంత రాజకీయాలకు పెద్ద లోటు. నా చిన్నతనం అంతా బిరేన్ సింగ్ కుటుంబంతోనే గడిచింది. ఆయనతో మా కుటుంబానికి ఉన్న అనుబంధం మరువలేనిది."

ఇటీవల తన నివాసంలో అనారోగ్యానికి గురైన బిరేన్ సింగ్‌ను మెరుగైన చికిత్స కోసం గువహటి తరలించినప్పటికీ ఫలితం లేకుండా పోయింది. ప్రస్తుతం ఆయన భౌతికకాయాన్ని అభిమానులు, అనుచరుల సందర్శనార్థం సొంత నియోజకవర్గమైన దిఫుకు తరలించారు. ఈ అరుదైన నాయకుడికి నివాళులర్పించేందుకు వేలాదిగా ప్రజలు తరలివస్తున్నారు.