IndiGo charges : ఇండిగో బాదుడు..  రూ. 10 వేల వరకు పెరిగిన ఛార్జీలు..అర్థరాత్రి నుంచి అమలు!

ఇండిగో విమాన టిక్కెట్లపై ఇంధన సర్ఛార్జీని పెంచుతున్నట్లు ప్రకటించింది. విమాన ఇంధనం (ATF) ధరలు భారీగా పెరగడంతో, ఈ భారాన్ని తగ్గించుకోవడానికి ఏప్రిల్ 2 నుండి ఈ కొత్త ధరలు అమలులోకి వస్తాయని సంస్థ వెల్లడించింది. ప్రయాణించే దూరాన్ని బట్టి దేశీయ, అంతర్జాతీయ మార్గాల్లో రూ. 275 నుండి రూ. 10,000 వరకు అదనపు ఛార్జీలు వసూలు చేయనున్నారు. ఈ నిర్ణయంతో అంతర్జాతీయ విమాన ప్రయాణాలు మరింత భారంగా మారనున్నాయి, అయితే దేశీయ విమాన ప్రయాణీకులకు కొంత ఉపశమనం లభించే అవకాశం ఉంది.

దేశీయ విమాన ప్రయాణాలకు సంబంధించి, ప్రయాణ దూర ప్రాతిపదికన ఈ సర్ఛార్జీ రూ. 275 నుండి రూ. 950 మధ్యలో ఉంటుంది. అదే అంతర్జాతీయ మార్గాల్లో ప్రయాణించే వారు రూ. 900 నుండి రూ. 10,000 వరకు అదనంగా చెల్లించాల్సి ఉంటుంది. విమాన ఇంధన ధరల పెరుగుదల నేపథ్యంలో ప్రభుత్వం దేశీయ విమానాలకు కేవలం 25 శాతం మేరకే పెంపును అనుమతించినప్పటికీ, అంతర్జాతీయంగా ఇంధన ధరలు గత నెల రోజుల్లో రెట్టింపు కావడంతో విమానయాన సంస్థలు ఈ కఠిన నిర్ణయం తీసుకోక తప్పలేదు. ప్రస్తుతం ఉన్న ఇంధన ఖర్చుల వాతావరణానికి అనుగుణంగా తమ ధరలను సవరించినట్లు ఇండిగో పేర్కొంది.

ఇండిగో ఇప్పటికే

పశ్చిమ ఆసియాలో నెలకొన్న ఉద్రిక్తతల వల్ల ఇంధన ధరలు పెరగడంతో, ఇండిగో ఇప్పటికే మార్చి 14 నుండి రూ. 425 నుండి రూ. 2,300 వరకు సర్ఛార్జీని అమలు చేస్తోంది. అయితే తాజా పరిస్థితుల దృష్ట్యా దీనిని మళ్లీ సవరించారు. విమానయాన సంస్థల నిర్వహణ ఖర్చులో ఇంధనానిదే ప్రధాన వాటా కావడంతో, పెరుగుతున్న ఖర్చులు నేరుగా టిక్కెట్ ధరలపై ప్రభావం చూపుతున్నాయి. అంతర్జాతీయ రూట్లలో ఇంధన ధరలు విపరీతంగా పెరగడం నిర్వహణపై తీవ్ర ఒత్తిడిని పెంచుతోందని సంస్థ ఆవేదన వ్యక్తం చేసింది.

ఇంధన ధరల పెంపు వల్ల తమపై పడిన మొత్తం భారాన్ని ప్రయాణీకులకు బదిలీ చేయలేదని, అందులో కొంత భాగాన్ని మాత్రమే సర్ఛార్జీ రూపంలో వసూలు చేస్తున్నామని ఇండిగో స్పష్టం చేసింది. ఒకవేళ పెరిగిన ధరల భారాన్ని పూర్తిగా ప్రయాణీకులపై వేయాల్సి వస్తే, విమాన ఛార్జీలు ఇంకా భారీగా పెరిగేవని సంస్థ వివరించింది. ఏప్రిల్ 2వ తేదీ అర్ధరాత్రి 12:01 గంటల నుండి బుక్ చేసుకునే టిక్కెట్లకు ఈ సవరించిన ధరలు వర్తిస్తాయి.