New Delhi : కూలిన ఐదంతస్తుల భవనం.. ఢిల్లీలో దారుణం!

ఢిల్లీలోని సాకేత్ మెట్రో స్టేషన్ సమీపంలో భారీ ప్రమాదం చోటుచేసుకుంది. ఇక్కడి సైదుల్ అజాబ్ ప్రాంతంలో ఉన్న ఐదంతస్తుల భవనం అకస్మాత్తుగా కుప్పకూలిపోయింది. భవనం కూలిన వెంటనే భారీ ఎత్తున సహాయక చర్యలు ప్రారంభమయ్యాయి. శిథిలాల కింద ఇంకా పలువురు చిక్కుకుని ఉండవచ్చనే ఆందోళనలు వ్యక్తమవుతున్నాయి. అత్యంత రద్దీగా ఉండే మెట్రో కారిడార్‌కు సమీపంలో, శనివారం సాయంత్రం సుమారు 7:44 గంటల సమయంలో ఈ ప్రమాదం జరిగింది. కూలిపోయిన ఈ భవనంలో ఒక కోచింగ్ ఇన్‌స్టిట్యూట్, కెఫేలు, వివిధ కార్యాలయాలు నడుస్తున్నాయి. అంతేకాకుండా ఈ భవనంలోని మూడవ అంతస్తులో కొంత నిర్మాణ పని కూడా జరుగుతోంది.

10 మందిని సురక్షితంగా

ఈ ప్రమాదం జరిగిన వెంటనే రంగంలోకి దిగిన అత్యవసర రెస్క్యూ బృందాలు శనివారం రాత్రంతా శ్రమించి ఇప్పటివరకు కనీసం 10 మందిని సురక్షితంగా బయటకు తీశాయి. ఢిల్లీ ఫైర్ సర్వీస్ సిబ్బంది ఘటనా స్థలానికి చేరుకోవడానికి ముందే స్థానిక ప్రజలు, పిసిఆర్ వాహన సిబ్బంది కలిసి ముగ్గురిని రక్షించగా, ఆ తర్వాత వచ్చిన ఫైర్ సర్వీస్ సిబ్బంది మరో ఏడుగురిని శిథిలాల నుండి వెలికితీశారు. ప్రమాదం గురించి సమాచారం అందిన వెంటనే బహుళ అత్యవసర సహాయక బృందాలు వేగంగా ఘటనా స్థలానికి చేరుకున్నాయి.

ఈ ప్రమాదంలో గాయపడిన 25 ఏళ్ల నీలం అనే యువతి తండ్రి బలవంత్ యాదవ్  మాట్లాడుతూ, తన కుమార్తె భవనం పక్కనే ఉన్న క్యాంటీన్‌లో ఉన్న సమయంలో ఈ ప్రమాదం జరిగిందని తెలిపారు. విదేశాలలో ఎంబీబీఎస్ పూర్తి చేసుకుని ఇటీవలనే స్వదేశానికి తిరిగి వచ్చిన నీలం, సాకేత్‌లోని అరైజ్ మెడికల్ అకాడమీలో పీజీ మెడికల్ ఎంట్రన్స్ పరీక్ష కోసం ప్రిపేర్ అవుతోంది. ప్రమాదం జరిగిన సమయంలో ఆ క్యాంటీన్‌లో సుమారు 30 నుండి 35 మంది విద్యార్థులు ఉన్నారని యాదవ్ పేర్కొన్నారు. వీరిలో ఎక్కువ మంది వివిధ వైద్య ప్రవేశ పరీక్షల కోసం కోచింగ్ తీసుకుంటున్న అభ్యర్థులేనని చెప్పారు. ఈ ప్రమాదంలో తన కుమార్తె కాలు విరిగిందని, ప్రస్తుతం ఆమెకు ఆసుపత్రిలో చికిత్స అందుతోందని ఆయన వెల్లడించారు. ఈ క్యాంటీన్,  పరిసర ప్రాంతాలు ఎప్పుడూ విద్యార్థులు, ఉద్యోగులతో ఎంతో రద్దీగా ఉంటాయని స్థానికులు చెబుతున్నారు.