సుప్రీం తీర్పుపై కేంద్రం సంచలనం.. వ్యభిచారంపై తీర్పు పునఃసమీక్షించాల్సిందే!

వ్యభిచారాన్ని లీగల్ చేస్తూ 2018లో సుప్రీంకోర్టు ఇచ్చిన ‘జోసెఫ్ షైన్’ తీర్పుని కేంద్ర ప్రభుత్వం సవాలు చేసింది. ఐపీసీ సెక్షన్ 497ను రద్దు చేయడాన్ని తాము వ్యతిరేకించనప్పటికీ, ఆ తీర్పులో కోర్టు ఉపయోగించిన "రాజ్యాంగ నైతికత" అనే భావన అస్పష్టంగా ఉందని, దానిని "చెల్లుబాటు కాని చట్టం"గా ప్రకటించాలని కేంద్రం సుప్రీంకోర్టును కోరింది. శబరిమల కేసు విచారణ సందర్భంగా దాఖలు చేసిన లిఖితపూర్వక వాదనలలో కేంద్రం ఈ కీలక అంశాలను ప్రస్తావించింది.

జోసెఫ్ షైన్, స్వలింగ సంపర్కాన్ని లీగల్ చేసిన నవతేజ్ సింగ్ జోహార్ కేసులలో సుప్రీంకోర్టు "రాజ్యాంగ నైతికత" అనే పదాన్ని ఎక్కువగా వాడిందని కేంద్రం పేర్కొంది. ఇది ఒక "అస్పష్టమైన, అనిశ్చితమైన భావన" అని, దీనివల్ల న్యాయ సమీక్షా పరిధులు అతిక్రమించబడుతున్నాయని వాదించింది. న్యాయస్థానాలు తమ వ్యక్తిగత అభిప్రాయాలను లేదా విదేశీ విద్యాసంబంధ వ్యాసాలను ఆధారం చేసుకుని చట్టాలను రూపొందించడం సరికాదని కేంద్రం స్పష్టం చేసింది.

ప్రభుత్వ వాదన ప్రకారం, న్యాయస్థానాలు "సామాజిక నైతికత"ను తక్కువ చేసి చూపుతూ, దానిని మెజారిటీవాదంగా చిత్రీకరించడం తప్పు. రాజ్యాంగంలోని ‘అధికారాల విభజన’ సిద్ధాంతం ప్రకారం శాసన వ్యవస్థ, కార్యనిర్వాహక వ్యవస్థ, న్యాయవ్యవస్థల మధ్య సమతుల్యత ఉండాలి. అయితే, రాజ్యాంగ నైతికత పేరుతో కోర్టులు తీసుకునే నిర్ణయాలు ఈ సమతుల్యతను దెబ్బతీస్తున్నాయని కేంద్రం ఆందోళన వ్యక్తం చేసింది.

విదేశీ చట్టాల ప్రభావంపై విమర్శ
జోసెఫ్ షైన్ తీర్పులో అమెరికన్ ప్రొఫెసర్ల రచనలు, విదేశీ కోర్టుల మైనారిటీ తీర్పులను ఉదహరించడాన్ని కేంద్రం తప్పుబట్టింది. "అంతర్జాతీయ తీర్పులపై గుడ్డిగా ఆధారపడటం మన దేశ రాజ్యాంగ స్ఫూర్తికి తగదు" అని పేర్కొంది. రాజ్యాంగంలోని ఆర్టికల్ 25, 26 కింద పేర్కొన్న 'నైతికత' అనే పదానికి రాజ్యాంగ నైతికత అని అర్థం మార్చడం పూర్వ నిర్ణయాలకు విరుద్ధమని వాదించింది.
 
శబరిమల కేసులో మత స్వేచ్ఛను ఏ ప్రాతిపదికన పరీక్షించాలనేది ఇప్పుడు ప్రధాన ప్రశ్నగా మారింది. సామాజిక నైతికతనా లేక న్యాయస్థానాలు నిర్వచించిన రాజ్యాంగ నైతికతనా? సుప్రీంకోర్టు ఇవ్వబోయే తుది తీర్పు కేవలం వ్యభిచార చట్టంపైనే కాకుండా, భవిష్యత్తులో ప్రాథమిక హక్కులు, మతపరమైన ఆచారాల వ్యాఖ్యానంపై కూడా తీవ్ర ప్రభావం చూపే అవకాశం ఉంది. న్యాయవ్యవస్థ తన పరిధిని ఎంతవరకు విస్తరించుకోవచ్చనే అంశంపై ఈ కేసు ఇప్పుడు దేశవ్యాప్తంగా చర్చకు దారితీసింది.