Meenakshi Natarajan : మీనాక్షి నటరాజన్‌కు బిగ్ షాక్...మధ్యప్రదేశ్‌లో రాజ్యసభకు బీజేపీ ఏకగ్రీవం

Meenakshi Natarajan :  దేశవ్యాప్తంగా ఖాళీగా ఉన్న పలు రాజ్యసభ స్థానాలకు జరిగిన ఎన్నికల ప్రక్రియలో అనూహ్య పరిణామాలు చోటుచేసుకున్నాయి. ఆంధ్రప్రదేశ్, మధ్యప్రదేశ్ రాష్ట్రాల్లో ప్రధాన పార్టీల అభ్యర్థులు ఏకగ్రీవంగా ఎన్నికైనట్లు కేంద్ర ఎన్నికల సంఘం (ECI) అధికారికంగా ప్రకటించింది. ఆంధ్రప్రదేశ్‌లో ఖాళీగా ఉన్న 4 రాజ్యసభ స్థానాలనూ అధికార కూటమి (NDA) కైవసం చేసుకుంది. ఇందులో తెలుగుదేశం పార్టీ (TDP) నుంచి భాష్యం రామకృష్ణ, సానా సతీష్, చింతకాయల విజయ్.. జనసేన పార్టీ తరఫున లింగమనేని రమేష్ పోటీ చేయగా, ప్రత్యర్థి పార్టీల నుంచి ఎవరూ బరిలో లేకపోవడంతో వీరి నలుగురి ఎన్నిక ఏకగ్రీవమైంది. కూటమి సంపూర్ణ బలంతో ఏపీలో నాలుగు సీట్లనూ క్లీన్ స్వీప్ చేయగా, మధ్యప్రదేశ్‌లో మాత్రం ప్రతిపక్ష కాంగ్రెస్‌కు ఊహించని షాక్ తగిలింది.

మధ్యప్రదేశ్‌లో ముగ్గురు బీజేపీ అభ్యర్థులు ఏకగ్రీవంగా ఎన్నికవ్వడం అక్కడ రాజకీయంగా పెద్ద దుమారానికి దారితీసింది. వాస్తవానికి అసెంబ్లీలో ఉన్న సంఖ్యాబలం ప్రకారం కాంగ్రెస్ పార్టీకి ఒక రాజ్యసభ స్థానం దక్కాల్సి ఉంది. అందుకోసం ఆ పార్టీ తరఫున తెలంగాణ కాంగ్రెస్ వ్యవహారాల ఇన్‌ఛార్జ్, సీనియర్ నేత మీనాక్షి నటరాజన్ నామినేషన్ దాఖలు చేశారు. అయితే, తెలంగాణలోని ఒక పాత కోర్టు నోటీసు వ్యవహారాన్ని అఫిడవిట్‌లో దాచారంటూ బీజేపీ అభ్యర్థి మహేష్ కేవట్ దాఖలు చేసిన ఫిర్యాదును పురస్కరించుకుని, రిటర్నింగ్ అధికారి సాంకేతిక కారణాల దృష్ట్యా మీనాక్షి నామినేషన్‌ను తిరస్కరించారు. ఈ పరిణామంతో కాంగ్రెస్ అభ్యర్థి రేసు నుంచి తప్పుకోవాల్సి రాగా.. బీజేపీ అభ్యర్థులు తరుణ్ చుగ్, రజనీశ్ అగర్వాల్, మహేష్‌లు ఏకగ్రీవంగా ఎన్నికైనట్లు ఈసీ ప్రకటించింది.

ఖచ్చితంగా గెలవాల్సిన సీటు చేజారిపోవడంతో మధ్యప్రదేశ్ కాంగ్రెస్ శ్రేణులు తీవ్ర నిరాశలో మునిగిపోయాయి. ఈ వ్యవహారంపై కాంగ్రెస్ పార్టీ తీవ్ర ఆగ్రహం వ్యక్తం చేస్తూ, దీనిని "ప్రజాస్వామ్య హత్య"గా అభివర్ణించింది. ఎన్నికల సంఘం ఏకపక్షంగా వ్యవహరించిందని, బీజేపీ ఒత్తిడితోనే నామినేషన్‌ను అక్రమంగా తిరస్కరించారని ఆరోపించింది. బీజేపీ కావాలనే కాంగ్రెస్ ఎమ్మెల్యేల రాజ్యాంగ హక్కులను హరిస్తోందని మధ్యప్రదేశ్ పీసీసీ చీఫ్ జీతూ పట్వారీ తీవ్రస్థాయిలో మండిపడ్డారు. ఈ అన్యాయాన్ని జాతీయ స్థాయిలో ఎండగట్టేందుకు కాంగ్రెస్ పార్టీ ఈ వ్యవహారాన్ని అత్యంత ప్రతిష్టాత్మకంగా తీసుకుంది.

ఈ క్రమంలోనే కాంగ్రెస్ పార్టీ కేంద్ర ఎన్నికల సంఘం నిర్ణయాన్ని సవాల్ చేస్తూ అత్యున్నత న్యాయస్థానాన్ని ఆశ్రయించింది. మీనాక్షి నటరాజన్ నామినేషన్ తిరస్కరణపై కాంగ్రెస్ లీగల్ టీమ్ సుప్రీంకోర్టులో అత్యవసర పిటిషన్ దాఖలు చేయగా, కోర్టు విచారణకు స్వీకరించింది. మరోవైపు, ఈ అంశంపై దేశ అత్యున్నత విభాగానికి ఫిర్యాదు చేసేందుకు కాంగ్రెస్ సిద్ధమైంది. ప్రజాస్వామ్యానికి జరిగిన విఘాతాన్ని, రాజకీయ కుట్రలను వివరించడానికి మధ్యప్రదేశ్‌కు చెందిన 62 మంది కాంగ్రెస్ ఎమ్మెల్యేలు ఢిల్లీలో రాష్ట్రపతి ద్రౌపది ముర్ముతో భేటీ కానున్నారు. రాష్ట్రపతి భవన్ అపాయింట్‌మెంట్ ఖరారు కావడంతో, ఎమ్మెల్యేలంతా కలిసి రాష్ట్రపతికి లిఖితపూర్వకంగా ఫిర్యాదు చేయనున్నారు. ఇటు సుప్రీంకోర్టు తీర్పు, అటు రాష్ట్రపతి స్పందనపైనే ఇప్పుడు మధ్యప్రదేశ్ రాజకీయాల తదుపరి భవితవ్యం ఆధారపడి ఉంది.