గుడ్‎న్యూస్.. 8.5 కోట్లమంది రైతులకు మోదీ కానుక...నేడు రైతుల ఖాతాల్లోకి పీఎం కిసాన్ నగదు జమ..!!

దేశవ్యాప్తంగా 8.5 కోట్ల మంది రైతులకు గురువారం శుభవార్త చెప్పనున్నారు ప్రధానమంత్రి నరేంద్రమోదీ. ప్రధానమంత్రి- కిసాన్ సమ్మాన్ నిధి పథకం కింద సుమారు 8.5 కోట్ల మంది రైతు లబ్ధిదారులకు 14వ విడతగా రూ. 17,000 కోట్లను ప్రధాని నరేంద్ర మోదీ గురువారం విడుదల చేయనున్నారు. నేడు రాజస్థాన్‌లోని సికార్‌లో జరిగే కార్యక్రమంలో లబ్ధిదారుల బ్యాంకు ఖాతాలకు ఈ మొత్తాన్ని బదిలీ చేయనున్నట్లు అధికారిక ప్రకటన తెలిపింది. పథకం ప్రారంభించినప్పటి నుంచి లబ్ధిదారులకు బదిలీ చేయబడిన మొత్తం రూ. 2.59 లక్షల కోట్లు దాటుతుందని అంచనా. ఈ ఆర్థిక సహాయం రైతులకు వారి రోజువారీ అవసరాలను తీర్చడానికి, వారి మొత్తం సంక్షేమానికి దోహదపడుతుందని ప్రకటన పేర్కొంది.

2019లో ప్రారంభమైంది :
ప్రధాన్ మంత్రి కిసాన్ సమ్మాన్ నిధి (PM-కిసాన్) ఫిబ్రవరి 24, 2019న ప్రారంభించారు. డిసెంబర్ 2018 నుండి అమలులోకి వచ్చింది. ఈ పథకం కింద, ప్రత్యక్ష ప్రయోజన బదిలీ (DBT) మోడ్ ద్వారా దేశవ్యాప్తంగా ఉన్న రైతు కుటుంబాల బ్యాంకు ఖాతాలకు సంవత్సరానికి 6వేల రూపాయాల ఆర్థిక ప్రయోజనం మూడు సమాన వాయిదాలలో బదిలీ చేస్తారు. ఇప్పటివరకు ఈ స్కీం ద్వారా దేశవ్యాప్తంగా 11 కోట్ల మందికిపైగా రైతులకు రూ.2.42 లక్షల కోట్లకు పైగా లబ్ధి చేకూరింది.

పీఎం కిసాన్ సమృద్ధి కేంద్రం బహుమతి:
ఈ కార్యక్రమంలో మోదీ 1.25 లక్షల పీఎం కిసాన్ సమృద్ధి కేంద్రాన్ని (పీఎంకేఎస్‌కే) దేశానికి అంకితం చేస్తారు. దేశంలోని రిటైల్ ఎరువుల దుకాణాలను దశలవారీగా PMKSKగా మారుస్తోంది ప్రభుత్వం. ఈ PMKSKలు రైతులకు వ్యవసాయ-ఇన్‌పుట్‌లు, మట్టి, విత్తనాలు, ఎరువుల కోసం పరీక్ష సౌకర్యాలను అందించనున్నాయి. ఈ కేంద్రాలు రైతులకు అవగాహన కల్పిస్తాయి. అంతేకాదు పలు ప్రభుత్వ పథకాల గురించి సమాచారాన్ని అందజేస్తాయి, బ్లాక్, జిల్లా స్థాయి అవుట్‌లెట్‌లలో రిటైలర్ల క్రమబద్ధమైన సామర్థ్యాన్ని పెంచుతాయి.

యూరియా గోల్డ్‌ను ప్రధాని మోదీ ఆవిష్కరించనున్నారు :
ఈ కార్యక్రమంలో రైతులకు మరో భారీ బహుమతి అందించనున్నారు మోదీ. నేటి కార్యక్రమంలో సల్ఫర్ కోటెడ్ యూరియా (యూరియా గోల్డ్)ను ప్రధాని మోదీ ప్రారంభించనున్నారు. దీనితో పాటు, ONDCలో 1,600 రైతు ఉత్పత్తి సంస్థల ఆన్‌బోర్డింగ్‌ను కూడా ప్రారంభించనున్నారు.