Pezeshkian : మా హక్కులను హరించే అధికారం నీకెక్కడిది: ట్రంప్‌కు ఇరాన్‌ అధ్యక్షుడు పెజెష్కియాన్ సూటి ప్రశ్న

Pezeshkian :  అమెరికా అధ్యక్షుడు డొనాల్డ్ ట్రంప్ ఇరాన్ అణు కార్యక్రమంపై చేసిన వ్యాఖ్యలపై ఆ దేశ అధ్యక్షుడు మసూద్ పెజెష్కియన్ తీవ్ర ఆగ్రహం వ్యక్తం చేశారు. ఇరాన్ అణు హక్కులను కాలరాసే అధికారం ట్రంప్‌కు ఎక్కడిదని ఆయన సూటిగా ప్రశ్నించారు. ఒక స్వతంత్ర దేశం యొక్క హక్కులను లాక్కోవడానికి ఆయన ఎవరని నిలదీస్తూ, ఏ ప్రాతిపదికన లేదా ఏ నేరం కింద ఇరాన్ తన అణు సాంకేతికతను ఉపయోగించుకోకూడదని అంటున్నారో వెల్లడించాలని డిమాండ్ చేశారు. వాషింగ్టన్ తీసుకుంటున్న ఇటువంటి చర్యలు ఇరాన్ సార్వభౌమత్వాన్ని ఉల్లంఘించడమేనని ఆయన ఈ సందర్భంగా స్పష్టం చేశారు.

తమ దేశ గౌరవాన్ని కాపాడుకుంటూనే ప్రస్తుత యుద్ధ వాతావరణాన్ని ముగించాలని తాము భావిస్తున్నట్లు పెజెష్కియన్ పునరుద్ఘాటించారు. యూరేనియం శుద్ధి అనేది తమ దేశ ప్రాథమిక హక్కు అని, దీన్ని అడ్డుకోవడానికి ఏ దేశమూ ప్రయత్నించకూడదని ఆయన తేల్చి చెప్పారు. ఇరాన్ అణు కార్యక్రమాన్ని కనీసం 20 ఏళ్ల పాటు పునరుద్ధరించకూడదని అమెరికా పట్టుబడుతున్న తరుణంలో, పెజెష్కియన్ చేసిన ఈ వ్యాఖ్యలు అంతర్జాతీయ స్థాయిలో ప్రాధాన్యత సంతరించుకున్నాయి. తమ అణు హక్కులను ఎట్టి పరిస్థితుల్లోనూ వదులుకోబోమని ఆయన ఖరాఖండిగా చెప్పారు.

ప్రస్తుతం పశ్చిమాసియాలో నెలకొన్న ఉద్రిక్తతల దృష్ట్యా, యుద్ధాన్ని మరింత విస్తృతం చేయడం తమ ఉద్దేశం కాదని పెజెష్కియన్ స్పష్టం చేశారు. గల్ఫ్ ప్రాంతంలో శాంతి ,సుస్థిరత నెలకొల్పడమే తమ ప్రధాన లక్ష్యమని, అయితే తమ అణు కార్యక్రమంపై వివక్షతో కూడిన ఆంక్షలు విధిస్తే సహించేది లేదని ఆయన హెచ్చరించారు. అంతర్జాతీయ సమాజం అన్ని దేశాల విషయంలోనూ ఒకే రకమైన నిబంధనలను పాటించాలని, కేవలం ఇరాన్‌ను లక్ష్యంగా చేసుకోవడం సరికాదని ఆయన తన అసహనాన్ని వ్యక్తం చేశారు.

మరోవైపు, అమెరికా మరియు ఇరాన్ మధ్య అణు ఒప్పందంపై చర్చలు కొనసాగుతున్నప్పటికీ, వాటి ఫలితాలపై సందిగ్ధత నెలకొంది. త్వరలో జరగబోయే చర్చల వల్ల పెద్దగా ప్రయోజనం ఉండకపోవచ్చని ఇరాన్ పార్లమెంట్ స్పీకర్ మహమ్మద్ బఘేర్ ఘలీబాఫ్ అభిప్రాయపడ్డారు. ఇరు దేశాల మధ్య ఉన్న భారీ అంతరాలు చర్చల విజయానికి అడ్డంకిగా మారే అవకాశం ఉందని ఆయన పేర్కొన్నారు. బుధవారంతో తాత్కాలిక కాల్పుల విరమణ గడువు ముగియనుండటంతో, రానున్న రోజుల్లో ఇరాన్ తీసుకోబోయే నిర్ణయాలు అంతర్జాతీయంగా కీలకంగా మారనున్నాయి.