White House shooting : శ్వేతసౌధం కాల్పుల నిందితుడు విద్యావంతుడు..కానీ....

White House : అమెరికా అధ్యక్షుడు డొనాల్డ్ ట్రంప్ పాల్గొన్న శ్వేతసౌధం కరస్పాండెంట్స్ డిన్నర్‌లో కాల్పులకు తెగబడిన నిందితుడి నేపథ్యం ఇప్పుడు సర్వత్రా చర్చనీయాంశంగా మారింది. దర్యాప్తు బృందాల సమాచారం ప్రకారం, నిందితుడిని కాలిఫోర్నియాలోని టోరెన్స్‌కు చెందిన 31 ఏళ్ల కోలో టామోస్ అలెన్‌గా గుర్తించారు. ఆశ్చర్యకరమైన విషయం ఏమిటంటే, నిందితుడు అలెన్ నేర ప్రవృత్తి కలిగిన వ్యక్తిలా కాకుండా ఒక ఉన్నత విద్యావంతుడిగా, మేధావిగా రికార్డుల్లో కనిపిస్తున్నాడు. అతడి విద్యా నేపథ్యాన్ని పరిశీలిస్తే, 2017లో ప్రతిష్టాత్మకమైన కాలిఫోర్నియా ఇన్‌స్టిట్యూట్ ఆఫ్ టెక్నాలజీ (కాల్‌టెక్) నుంచి మెకానికల్ ఇంజినీరింగ్‌లో డిగ్రీ పూర్తి చేశాడు. ఆ తర్వాత కాలిఫోర్నియా స్టేట్ యూనివర్శిటీ నుంచి కంప్యూటర్ సైన్స్‌లో మాస్టర్స్ కూడా సాధించాడు.

అలెన్ విద్యాభ్యాసం చేస్తున్న సమయంలోనే తనలోని సృజనాత్మకతను చాటుకున్నాడు. 2017లో కాల్‌టెక్‌లో చదువుతున్నప్పుడే వీల్‌ఛైర్ల కోసం ప్రత్యేకమైన 'ఎమర్జెన్సీ బ్రేక్' వ్యవస్థను రూపొందించి స్థానిక పత్రికల దృష్టిని ఆకర్షించాడు. సాంకేతిక రంగంలో అతడి ప్రతిభకు నిదర్శనంగా 2014లోనే నాసా (NASA) నిర్వహించిన జెట్ ప్రొపెల్షన్ ల్యాబ్ ఫెలోషిప్ ప్రోగ్రామ్‌లో కూడా పాల్గొన్నాడు. కేవలం ఇంజినీరింగ్‌కే పరిమితం కాకుండా సాఫ్ట్‌వేర్ రంగంలోనూ రాణించాడు. 2018లో ఒక వీడియో గేమ్‌ను తయారు చేసి ట్రేడ్‌మార్క్ పొందడమే కాకుండా, ఇటీవల 'ఫస్ట్‌లా' అనే మరో గేమ్‌ను అభివృద్ధి చేస్తున్నట్లు తన ప్రొఫైల్‌లో పేర్కొన్నాడు. ప్రస్తుతం అతడు 'సీ2 ఎడ్యూకేషన్' అనే సంస్థలో టీచర్‌గా పనిచేస్తున్నాడు. బోధనలో అతడి నిబద్ధతకు గుర్తింపుగా డిసెంబర్ 2024లో 'టీచర్ ఆఫ్ ది మంత్'గా కూడా ఎంపికయ్యాడు.

రాజకీయ పరంగా చూస్తే, అలెన్ డెమోక్రటిక్ పార్టీ సానుభూతిపరుడిగా కనిపిస్తున్నాడు. కమలా హ్యారిస్ అధ్యక్ష ఎన్నికల ప్రచారానికి 25 డాలర్లు విరాళం ఇచ్చినట్లు ఫెడరల్ ఎలక్షన్ కమిషన్ రికార్డులు స్పష్టం చేస్తున్నాయి. ఇంతటి ఉన్నత విద్యావంతుడు, సృజనాత్మక నైపుణ్యాలు కలిగిన వ్యక్తి అకస్మాత్తుగా ఒక విధ్వంసకర నిర్ణయం తీసుకోవడానికి గల కారణాలను అధికారులు విశ్లేషిస్తున్నారు. రాజకీయ వైరుధ్యమా లేక ఇతర మానసిక కారణాలా అనే కోణంలో దర్యాప్తు కొనసాగుతోంది. ఒక మేధావిగా సమాజంలో గుర్తింపు పొందిన వ్యక్తి ఇలాంటి అమానుష ఘటనకు పాల్పడటం ఇప్పుడు అమెరికాలో కలకలం రేపుతోంది.