Mojtaba Khamenei : రక్తానికి ప్రతీకారం తీర్చుకుంటాం..   మొజ్తబా ఖమేనీ సంచలన ప్రకటన !

ఇరాన్ కొత్త సుప్రీం లీడర్‌గా బాధ్యతలు చేపట్టిన మొజ్తబా ఖమేనీ తన తొలి ప్రసంగంతోనే ప్రపంచ దేశాలకు గట్టి హెచ్చరికలు జారీ చేశారు. ముఖ్యంగా అమెరికాను లక్ష్యంగా చేసుకుంటూ ఆయన చేసిన వ్యాఖ్యలు ఇప్పుడు మధ్యప్రాచ్యంలో తీవ్ర ఉత్సాహాన్ని, ఆందోళనను కలిగిస్తున్నాయి. హోర్ముజ్ జలసంధిని మూసి ఉంచాలనే కఠిన నిర్ణయాన్ని ప్రకటిస్తూ, అమెరికాతో సహా శత్రు దేశాలకు ఆయన అల్టిమేటం ఇచ్చారు. ఈ మేరకు ఇరాన్ ప్రభుత్వ టెలివిజన్ ద్వారా ఒక ప్రజెంటర్ ఈ సందేశాన్ని చదివి వినిపించారు. అలీ ఖమేనీ మరణం తర్వాత మొజ్తబా ఇంకా బహిరంగంగా ఎక్కడా కనిపించకపోయినప్పటికీ, ఈ ప్రకటన ద్వారా తన పాలన ఎలా ఉండబోతోందో స్పష్టమైన సంకేతాలిచ్చారు.

మధ్యప్రాచ్యంలో ఉన్న అన్ని అమెరికా సైనిక స్థావరాలను వెంటనే మూసివేయాలని, లేనిపక్షంలో వాటిపై దాడులు తప్పవని మొజ్తబా ఖమేనీ హెచ్చరించారు. తమ దేశంపై బలవంతంగా రుద్దిన ఈ యుద్ధానికి సంబంధించి శత్రువుల నుంచి కచ్చితంగా యుద్ధ నష్టపరిహారం వసూలు చేస్తామని ఆయన స్పష్టం చేశారు. ఒకవేళ శత్రువు అందుకు నిరాకరిస్తే, వారికి సంబంధించిన ఆస్తులను స్వాధీనం చేసుకుంటామని లేదా వాటికి సమానమైన విలువ కలిగిన ఆస్తిని ధ్వంసం చేస్తామని తీవ్రస్థాయిలో మండిపడ్డారు. దేశం కోసం ప్రాణాలర్పించిన అమరవీరుల రక్తం వృథా పోదని, ప్రతి చుక్కకూ ప్రతీకారం తీర్చుకుంటామని ఆయన తన ప్రసంగంలో పేర్కొన్నారు.

ప్రపంచ ఇంధన రవాణాలో అత్యంత కీలకమైన హోర్ముజ్ జలసంధిని ఒక ఆయుధంగా వాడుకోవాలని మొజ్తబా పిలుపునిచ్చారు. పర్షియన్ గల్ఫ్,  గల్ఫ్ ఆఫ్ ఒమన్‌లను కలిపే ఈ మార్గం ద్వారానే ప్రపంచంలోని సింహభాగం చమురు రవాణా జరుగుతుంది. ఈ వ్యూహాత్మక ప్రాంతాన్ని మూసివేసి ఉంచడం ద్వారా శత్రువులపై ఒత్తిడి తీసుకురావాలని ఆయన సూచించారు. అదే సమయంలో పొరుగు దేశాలతో స్నేహపూర్వక సంబంధాలను కొనసాగిస్తామని చెబుతూనే, అమెరికా దళాలకు ఆశ్రయం కల్పించే దేశాలపై దాడులు తప్పవని పరోక్షంగా హెచ్చరించారు.

168 మంది ప్రాణాలు

దక్షిణ ఇరాన్‌లోని మినాబ్ నగరంలో ఒక బాలికల పాఠశాలపై జరిగిన క్షిపణి దాడి ఇరాన్ నాయకత్వాన్ని తీవ్ర ఆగ్రహానికి గురిచేసింది. ఈ దాడిలో సుమారు 110 మంది చిన్నారులతో సహా మొత్తం 168 మంది ప్రాణాలు కోల్పోయారు. కేవలం తమ నాయకుడి మరణానికే కాకుండా, మినాబ్ పాఠశాల చిన్నారుల మరణానికి కూడా కారకులైన నేరస్థులను వదిలిపెట్టబోమని మొజ్తబా ప్రతిజ్ఞ చేశారు. ఈ క్రమంలో యెమెన్, ఇరాక్ వంటి దేశాల్లోని తమ మిత్రపక్షాలైన సాయుధ గ్రూపులకు ఆయన ధన్యవాదాలు తెలుపుతూ, శత్రువులపై పోరాటంలో వారి మద్దతును కొనసాగించాలని కోరారు. ఫిబ్రవరి 28న జరిగిన వైమానిక దాడుల్లో తన తండ్రి అలీ ఖమేనీ మరణించిన తర్వాత మొజ్తబా అధికార బాధ్యతలు చేపట్టడం గమనార్హం.