Pakistan : అప్పుల్లో పాకిస్తాన్..  సౌదీ భారీ ఆర్థిక సాయం!

పాకిస్థాన్ ఆర్థిక కష్టాల్లో ఉన్న సమయంలో సౌదీ అరేబియా ఆపన్నహస్తం అందించింది. తన విదేశీ మార్పిడి నిల్వలను పెంచుకోవడానికి, అలాగే యునైటెడ్ అరబ్ ఎమిరేట్స్ (UAE)కి చెల్లించాల్సిన అప్పును తీర్చడానికి పాకిస్థాన్‌కు సౌదీ అరేబియా 3 బిలియన్ డాలర్ల ఆర్థిక సాయాన్ని ప్రకటించింది. ఈ నిధులు వచ్చే వారంలోనే అందుతాయని పాకిస్థాన్ ఆర్థిక మంత్రి మహమ్మద్ ఔరంగజేబు వెల్లడించారు.

దీంతో పాటు, గతంలో పాకిస్థాన్ దగ్గర సౌదీ ఉంచిన 5 బిలియన్ డాలర్ల డిపాజిట్ గడువును కూడా పొడిగించింది. ఇకపై దీనికి పాత పద్ధతిలో ఏటా పొడిగింపు (రోల్‌ఓవర్) కోసం దరఖాస్తు చేయాల్సిన అవసరం లేదు. ప్రస్తుతం పాకిస్థాన్ విదేశీ నిల్వలు కేవలం 16 బిలియన్ డాలర్లు మాత్రమే ఉన్నాయి, ఇవి కేవలం మూడు నెలల దిగుమతులకు మాత్రమే సరిపోతాయి. ఇలాంటి క్లిష్ట సమయంలో సౌదీ సాయం ఆ దేశానికి పెద్ద ఊరటనిచ్చింది.

రక్షణ సంబంధాలు కూడా

మరోవైపు, ఈ రెండు దేశాల మధ్య రక్షణ సంబంధాలు కూడా బలపడుతున్నాయి. గత ఏడాది సెప్టెంబర్‌లో చేసుకున్న రక్షణ ఒప్పందం ప్రకారం.. "ఒక దేశంపై దాడి జరిగితే అది రెండు దేశాలపై జరిగిన దాడిగానే భావిస్తామని" ప్రకటించాయి. ఇందులో భాగంగానే పాకిస్థాన్‌కు చెందిన యుద్ధ విమానాలు, సైనిక బృందాలు సౌదీ అరేబియాలోని కింగ్ అబ్దుల్ అజీజ్ ఎయిర్ బేస్‌కు చేరుకున్నాయి. ప్రాంతీయ భద్రతను పటిష్టం చేయడమే ఈ చర్యల ముఖ్య ఉద్దేశమని తెలుస్తోంది.

పాకిస్థాన్ విఫలం

నిజానికి, యూఏఈ నుంచి రావాల్సిన 3 బిలియన్ డాలర్ల రుణ గడువును పెంచుకోవడంలో పాకిస్థాన్ విఫలమైంది. గత ఏడేళ్లలో ఇలా జరగడం ఇదే మొదటిసారి. ఈ నెల చివరికల్లా ఆ అప్పును యూఏఈకి తిరిగి చెల్లించాల్సి ఉంది. ఆ ఒత్తిడిని తట్టుకోవడానికి సౌదీ అరేబియా ఇప్పుడు ఆర్థికంగా వెన్నుదన్నుగా నిలిచింది. అమెరికా-ఇరాన్ మధ్య జరుగుతున్న శాంతి చర్చలకు పాకిస్థాన్ ఆతిథ్యం ఇస్తున్న తరుణంలో ఈ పరిణామాలు చోటు చేసుకోవడం విశేషం.