Mohammad Zolghadr : ఇరాన్‌ కొత్త సెక్యూరిటీ చీఫ్‌గా మహమ్మద్‌ జోల్‌ఘాద్‌

ఇరాన్ రాజకీయాల్లో కీలక మార్పులు చోటుచేసుకున్నాయి. గత వారం జరిగిన దాడిలో శక్తివంతమైన నేత అలీ లారిజానీ మరణించడంతో, ఆ ఖాళీని భర్తీ చేస్తూ మొహమ్మద్ బగేర్ జోల్గాదర్‌ను ఇరాన్ సుప్రీం నేషనల్ సెక్యూరిటీ కౌన్సిల్ కార్యదర్శిగా నియమించారు. ఇరాన్ రివల్యూషనరీ గార్డ్ మాజీ కమాండర్‌గా పనిచేసిన జోల్గాదర్‌కు రక్షణ రంగంలో అపారమైన అనుభవం ఉంది.

అలీ లారిజానీ మరణం ఇరాన్ ప్రభుత్వానికి కోలుకోలేని దెబ్బ అని విశ్లేషకులు భావిస్తున్నారు. ఇరాన్ లోని వివిధ అధికార కేంద్రాలను సమన్వయం చేయడంలో, అలాగే బయటి దేశాలతో చర్చలు జరపడంలో ఆయనకు ఉన్న నేర్పు ఇరాన్‌కు పెద్ద బలంగా ఉండేది. ఆయన స్థానంలో వచ్చిన జోల్గాదర్ ఇప్పుడు ఇరాన్ భద్రతను ఎలా కాపాడతారనేది ఆసక్తికరంగా మారింది.

మరోవైపు, ఇరాన్ యుద్ధం ముగింపు దశకు చేరుకుంటోందన్న ఆశలు చిగురిస్తున్నాయి. అమెరికా అధ్యక్షుడు డోనాల్డ్ ట్రంప్ సోమవారం మాట్లాడుతూ.. ఇరాన్‌తో జరుపుతున్న చర్చలు సానుకూలంగా సాగుతున్నాయని వెల్లడించారు. ఇరాన్ విద్యుత్ కేంద్రాలపై దాడులు చేయాలన్న నిర్ణయాన్ని మరో ఐదు రోజులు వాయిదా వేస్తున్నట్లు ఆయన ప్రకటించారు. ఒక గౌరవనీయమైన ఇరాన్ నేతతో అమెరికా ప్రతినిధులు మాట్లాడుతున్నారని, ఈలోపు హార్ముజ్ జలసంధిని తెరిచే అవకాశం ఉందని ట్రంప్ ఆశాభావం వ్యక్తం చేశారు.

లక్షలాది మంది ప్రజలు

అయితే, అమెరికా తన హెచ్చరికల నుంచి వెనక్కి తగ్గిందని ఇరాన్ అధికారులు వ్యాఖ్యానిస్తున్నారు. చర్చల మాట ఎలా ఉన్నా, క్షేత్రస్థాయిలో మాత్రం యుద్ధం కొనసాగుతూనే ఉంది. ఈ భీకర పోరులో ఇప్పటివరకు ఇరాన్‌లో 1,500 మందికి పైగా, లెబనాన్‌లో 1,000 మందికి పైగా ప్రాణాలు కోల్పోయారు. అలాగే 13 మంది అమెరికా సైనికులు, 15 మంది ఇజ్రాయెల్ పౌరులు కూడా మరణించారు. లక్షలాది మంది ప్రజలు తమ ఇళ్లను వదిలి సురక్షిత ప్రాంతాలకు వలస వెళ్లాల్సి రావడం ఈ యుద్ధం సృష్టించిన విషాదానికి నిదర్శనం.