Donald Trump : 8,300 మంది సైన్యం.. రూ. 26 కోట్ల బడ్జెట్.. ట్రంప్ సెక్యూరిటీ వెనుక సీక్రెట్స్ ఇవే!

అమెరికా అధ్యక్షుడు డొనాల్డ్ ట్రంప్‌పై నిన్న జరిగిన దాడి యావత్ ప్రపంచాన్ని దిగ్భ్రాంతికి గురిచేసింది. అత్యంత కట్టుదిట్టమైన భద్రత ఉండే ప్రెసిడెన్షియల్ క్యాంపెయిన్‌లో తుపాకీ తూటాలు పేలడం.. నేరుగా ట్రంప్‌ను లక్ష్యంగా చేసుకోవడం అమెరికా రక్షణ వ్యవస్థపై అనేక ప్రశ్నలను రేకెత్తిస్తోంది. అసలు అమెరికా అధ్యక్షులకు రక్షణ కల్పించే ఆ సీక్రెట్ సర్వీస్ ఏజెంట్లు ఎంతమంది ఉంటారు? వారి భద్రతా వ్యూహాలు ఎలా ఉంటాయి? 

అమెరికా అధ్యక్షుడికి ఎంతమంది భద్రతా సిబ్బంది కాపలా ఉంటారనేది ప్రపంచంలోనే అత్యంత రహస్యమైన విషయం. ఈ వివరాలు బయటకు తెలిస్తే శత్రువులకు అవకాశం ఇచ్చినట్లవుతుంది కాబట్టి, భద్రతా కారణాల దృష్ట్యా ఆ సంఖ్యను ఎప్పుడూ గోప్యంగా ఉంచుతారు. దేశాధినేతను, ఆయన కుటుంబాన్ని రక్షించే బాధ్యతను ప్రెసిడెన్షియల్ ప్రొటెక్టివ్ డివిజన్ (PPD) అనే అత్యున్నత విభాగం చూసుకుంటుంది. ఫెడరల్ ప్రభుత్వంలోనే అత్యంత కఠినమైన శిక్షణ పొందిన స్పెషల్ ఏజెంట్లు ఈ విభాగంలో ఉంటారు. వీరి ఏకైక లక్ష్యం అధ్యక్షుడికి రక్షణ కల్పించడమే.

ఈ భారీ భద్రతా వ్యవస్థ నిర్వహణ కోసం అమెరికా ప్రభుత్వం ప్రతి ఏటా దాదాపు 3.2 బిలియన్ డాలర్లు. మన భారతీయ కరెన్సీలో చెప్పాలంటే  సుమారు 26,500 కోట్ల రూపాయల వరకు ఖర్చు చేస్తోంది. సీక్రెట్ సర్వీస్ మొత్తంలో సుమారు 8,300 మంది సిబ్బంది పనిచేస్తుండగా, అందులో దాదాపు 3,600 మంది నేరుగా రక్షణ కార్యకలాపాల్లో నిమగ్నమై ఉంటారు. మొత్తం సంస్థలో దాదాపు 44 శాతం మంది సిబ్బంది ఈ రక్షణ విభాగంలోనే పనిచేయడం గమనార్హం. ఇందులో 3,200 మంది స్పెషల్ ఏజెంట్లతో పాటు, వారికి మద్దతుగా 1,300 మంది యూనిఫాం ధరించిన అధికారులు నిరంతరం పహారా కాస్తుంటారు.

చట్టం ప్రకారం అధ్యక్షుడితో పాటు ఆయన కుటుంబ సభ్యులకు కూడా 24 గంటల పాటు కట్టుదిట్టమైన భద్రత కల్పిస్తారు. ప్రతి కుటుంబ సభ్యుడికి ఒక ప్రత్యేక భద్రతా బృందం ఉంటుంది. భద్రతలో గోప్యత పాటించడం కోసం కుటుంబ సభ్యులకు ప్రత్యేక కోడ్ పేర్లను కూడా కేటాయిస్తారు. కేవలం సూట్లు వేసుకుని చెవుల్లో ఇయర్‌ఫోన్లు పెట్టుకునే ఏజెంట్లు మాత్రమే కాకుండా, ఈ భద్రతా వలయంలో ఆధునిక సాంకేతికత కూడా ఉంటుంది.

అధ్యక్షుడి రక్షణ కోసం భారీ ఆయుధాలు కలిగిన కౌంటర్ స్నైపర్ బృందాలు, ప్రమాదకరమైన రసాయనాలను గుర్తించే నిపుణులు, ప్రత్యేక శిక్షణ పొందిన బెల్జియన్ మాలినోయిస్ జాతి కుక్కలు ఎప్పుడూ సిద్ధంగా ఉంటాయి. పేలుడు పదార్థాలు, జీవ రసాయన దాడులు, సైబర్ బెదిరింపుల నుంచి అధ్యక్షుడిని కాపాడటానికి ప్రపంచవ్యాప్తంగా అత్యాధునిక రక్షణ ఏర్పాట్లను ఈ విభాగం నిర్వహిస్తుంది. ఏ సమయంలోనైనా అధ్యక్షుడి చుట్టూ ఒక అజేయమైన రక్షణ కవచం ఉండేలా ఈ భారీ బడ్జెట్,  సిబ్బంది పని చేస్తారు.

మాజీ అధ్యక్షులకు కూడా శక్తివంతమైన భద్రత

ఇక అమెరికాలో మాజీ అధ్యక్షులకు కూడా చాలా శక్తివంతమైన భద్రతా వలయం ఉంటుంది. సాధారణంగా పదవిలో ఉన్నప్పుడు ఉండేంత భారీ స్థాయిలో కాకపోయినా, వారి ప్రాణాలకు ఉండే ముప్పును బట్టి సీక్రెట్ సర్వీస్ పకడ్బందీ ఏర్పాట్లు చేస్తుంది. అమెరికా చట్టాల ప్రకారం మాజీ అధ్యక్షులకు, వారి జీవిత భాగస్వాములకు జీవితకాలం పాటు సీక్రెట్ సర్వీస్ రక్షణ లభిస్తుంది. 1997 తర్వాత ఎన్నికైన వారికి కేవలం 10 ఏళ్లు మాత్రమే భద్రత ఉండాలని ఒకప్పుడు నిబంధన ఉండేది, కానీ 2013లో ఒబామా హయాంలో దీనిని మళ్ళీ జీవితకాలానికి మారుస్తూ చట్టం చేశారు.

 మాజీ అధ్యక్షుడి భార్య లేదా భర్తకు కూడా జీవితకాలం రక్షణ ఉంటుంది. ఒకవేళ వారు విడాకులు తీసుకుంటే లేదా మరొకరిని వివాహం చేసుకుంటే ఆ భద్రత రద్దవుతుంది. అధ్యక్షుడి పిల్లలకు వారు 16 ఏళ్ల వయస్సు వచ్చే వరకు మాత్రమే సీక్రెట్ సర్వీస్ రక్షణ కల్పిస్తుంది. ఆ తర్వాత వారి భద్రతను ఉపసంహరించుకుంటారు. వీరి కోసం ప్రత్యేక కార్యాలయ ఖర్చులు, ప్రయాణ ఖర్చులను కూడా ప్రభుత్వం భరిస్తుంది. మాజీ అధ్యక్షులకు వచ్చే పెన్షన్‌తో సంబంధం లేకుండా, వారి భద్రతకు అయ్యే ఖర్చును ప్రభుత్వం విడిగా కేటాయిస్తుంది.