Bamako : మాలిలో సాయుధుల కాల్పులు..ఏకంగా రాజధాని బమాకో లక్ష్యంగా దాడులు

Bamako : పశ్చిమ ఆఫ్రికా దేశమైన మాలిలో శనివారం తెల్లవారుజామున ఉగ్రవాదులు భారీ దాడులకు తెగబడ్డారు. రాజధాని బమాకో లక్ష్యంగా జరిగిన ఈ దాడులు ఆ దేశ భద్రతా వ్యవస్థను ఉలిక్కిపడేలా చేశాయి. ఈ ఘటనకు సంబంధించిన పూర్తి వివరాలు ఇలా ఉన్నాయి: మాలి రాజధాని బమాకోలోని అత్యంత కీలకమైన సైనిక శిబిరాలు, వ్యూహాత్మక ప్రాంతాలపై గుర్తుతెలియని సాయుధ బృందాలు ఏకకాలంలో దాడులు ప్రారంభించాయి. ముఖ్యంగా విమానాశ్రయానికి సమీపంలో ఉన్న సైనిక శిక్షణ కేంద్రం (జెండర్‌మెరీ స్కూల్) లక్ష్యంగా కాల్పులు,పేలుళ్లు జరిగాయి. స్థానిక కాలమానం ప్రకారం తెల్లవారుజామున 5 గంటల సమయంలో ప్రారంభమైన ఈ కాల్పుల శబ్దాలు నగరం అంతటా కలకలం రేపాయి.

ఈ దాడులను వెంటనే గమనించిన మాలి సాయుధ దళాలు ఎదురుదాడికి దిగాయి. సైనిక స్థావరాల్లోకి చొరబడేందుకు ప్రయత్నించిన ఉగ్రవాదులను సమర్థవంతంగా అడ్డుకున్నట్లు సైన్యం ప్రకటించింది. బమాకోలోని కొన్ని ప్రాంతాలను లక్ష్యంగా చేసుకున్న సాయుధ బృందాలను ఏరివేసేందుకు క్లీనింగ్ ఆపరేషన్ కొనసాగుతోందని, ప్రస్తుతానికి పరిస్థితి అదుపులోకి వచ్చిందని ఆర్మీ తన అధికారిక ప్రకటనలో వెల్లడించింది. విమానాశ్రయం వైపు వెళ్లే మార్గాలను భద్రతా బలగాలు తమ ఆధీనంలోకి తీసుకున్నాయి.

రాజధానిలోని అంతర్జాతీయ విమానాశ్రయానికి అత్యంత సమీపంలో కాల్పులు, పేలుళ్లు సంభవించడంతో విమాన రాకపోకలకు తాత్కాలికంగా ఆటంకం ఏర్పడింది. భద్రతా కారణాల దృష్ట్యా విమానాశ్రయాన్ని కాసేపు మూసివేసినట్లు సమాచారం. ఈ పరిణామాల నేపథ్యంలో బమాకోలోని అమెరికా రాయబార కార్యాలయం తమ పౌరులకు కీలక హెచ్చరికలు జారీ చేసింది. పౌరులు అప్రమత్తంగా ఉండాలని, అనవసర ప్రయాణాలు మానుకోవాలని సూచించింది.

మాలి దేశం గత దశాబ్ద కాలంగా అల్-ఖైదా,ఐఎస్ఐఎస్ (ISIS) అనుబంధ సంస్థల నుంచి తీవ్రమైన ఉగ్రవాద ముప్పును ఎదుర్కొంటోంది. అయితే, సాధారణంగా దేశంలోని ఉత్తర, మధ్య ప్రాంతాల్లో దాడులు చేసే ఉగ్రవాదులు, ఈసారి ఏకంగా రాజధాని నగరం బమాకోలోని సురక్షిత ప్రాంతాలను లక్ష్యంగా చేసుకోవడం ఆందోళన కలిగిస్తోంది.ప్రస్తుతానికి ఈ దాడులకు బాధ్యత వహిస్తూ ఏ సంస్థా అధికారిక ప్రకటన చేయలేదు. ఈ ఘటనలో ఎంతమంది ప్రాణాలు కోల్పోయారు లేదా ఎంతమేర ఆస్తి నష్టం జరిగింది అనే వివరాలను ప్రభుత్వం ఇంకా వెల్లడించాల్సి ఉంది. నగరం అంతటా హై అలర్ట్ ప్రకటించి, భద్రతను కట్టుదిట్టం చేశారు.