UAE agentic AI : ఇక మీదట 50 శాతం ప్రభుత్వ సేవలన్నీ ఏఐ ద్వారానే..యూఏఈ సంచలన ప్రకటన

UAE agentic AI : ప్రపంచ సాంకేతిక ముఖచిత్రాన్ని మార్చే విధంగా యునైటెడ్ అరబ్ ఎమిరేట్స్ (UAE) ప్రభుత్వం ఒక చారిత్రాత్మక నిర్ణయాన్ని తీసుకుంది. ఆర్టిఫీషియల్ ఇంటెలిజెన్స్ (AI) సహాయంతో ప్రభుత్వ కార్యకలాపాలను, ప్రజలకు అందించే సేవలను పూర్తి స్థాయిలో నిర్వహించేందుకు సిద్ధమవుతున్న తొలి దేశంగా యూఏఈ నిలవనుంది. 2028 నాటికి ప్రభుత్వ కార్యకలాపాల్లో సగం 'ఏజెంటిక్ ఏఐ' (Agentic AI) ద్వారా నడుస్తాయని యూఏఈ ప్రధాని షేక్ మహ్మద్ బిన్ రషీద్ అల్ మఖ్తూమ్ తాజాగా ప్రకటించారు.

Under the directives of the President of the UAE, we launch a new government model. Within two years, 50% of government sectors, services, and operations will run on Agentic AI, making the UAE the first government globally to operate at this scale through autonomous systems.

AI… pic.twitter.com/53OQLe7RXl

— HH Sheikh Mohammed (@HHShkMohd) April 23, 2026

 ప్రస్తుతం మనం వాడుతున్న సాధారణ ఏఐ టూల్స్ కేవలం సమాచారాన్ని అందిస్తూ మనకు సహాయపడతాయి, కానీ ఈ 'ఏజెంటిక్ ఏఐ' మాత్రం ఒక అడుగు ముందుకేసి స్వయంగా నిర్ణయాలు తీసుకోవడమే కాకుండా, ఎవరి పర్యవేక్షణా లేకుండా పనులను పూర్తి చేయగలదు. ఇది కేవలం ఒక సహాయకుడిలా కాకుండా, ప్రభుత్వానికి ఒక ఎగ్జిక్యూటివ్ భాగస్వామిలా వ్యవహరిస్తూ రియల్ టైమ్‌లో సమస్యలకు స్పందిస్తుంది. ఈ సాంకేతికత ద్వారా వీసాల మంజూరు, అనుమతులు, లైసెన్సులు, జరిమానాల విధింపు వంటి క్లిష్టమైన ప్రక్రియలను ఈ ఏఐ స్వయంగా ప్రాసెస్ చేయగలదు. దీనివల్ల ఫైల్ క్లియరెన్స్‌లో జాప్యం తగ్గడమే కాకుండా, నిర్ణయాలు తీసుకునే వేగం పెరిగి ప్రభుత్వ ఖర్చులు గణనీయంగా తగ్గుతాయని అధికారులు భావిస్తున్నారు. 

డేటా విశ్లేషణ, నిర్ణయం తీసుకోవడం, దానిని అమలు చేయడం వంటి మూడు కీలక దశలను ఏజెంటిక్ ఏఐ ఒకేసారి నిర్వహించగలగడం దీని ప్రత్యేకత. అయితే, ఇంత భారీ స్థాయిలో ఏఐ వినియోగం వల్ల ఉద్యోగ కోతలపై ఆందోళనలు వ్యక్తమవుతున్న నేపథ్యంలో, యూఏఈ ప్రధాని స్పష్టతనిచ్చారు. ఉద్యోగాలను తగ్గించడం తమ లక్ష్యం కాదని, ఏఐతో కలిసి పనిచేసే విధంగా ప్రస్తుత ఉద్యోగుల నైపుణ్యాలను తీర్చిదిద్దడమే తమ ప్రధాన ఉద్దేశమని ఆయన పేర్కొన్నారు. ఈ సాహసోపేతమైన అడుగు ప్రపంచవ్యాప్తంగా ప్రభుత్వ నిర్వహణలో సరికొత్త విప్లవానికి నాంది పలకనుంది.