Economic Blockade : ఇరాన్‌కు బిగ్‌ షాక్‌..దీర్ఘకాలిక ఆర్థిక ముట్టడికి ట్రంప్‌ ప్లాన్‌

Economic Blockade : పశ్చిమ ఆసియాలో యుద్ధ మేఘాలు విడిపోకపోగా, హర్మూజ్ జలసంధి వేదికగా అమెరికా-ఇరాన్ మధ్య ఉద్రిక్తతలు పరాకాష్టకు చేరుకున్నాయి. ప్రపంచ చమురు రవాణాకు అత్యంత కీలకమైన ఈ జలసంధిని అమెరికా దిగ్బంధించడంతో ఇరాన్ ఆర్థికంగా, వ్యూహాత్మకంగా ఉక్కిరిబిక్కిరి అవుతోంది. ఈ క్రమంలో అమెరికా అధ్యక్షుడు డొనాల్డ్ ట్రంప్ తన యంత్రాంగానికి కీలక ఆదేశాలు జారీ చేశారు. ప్రత్యక్ష సైనిక దాడుల కంటే, దీర్ఘకాలిక ఆర్థిక ముట్టడి (Economic Blockade) ద్వారానే ఇరాన్‌ను దెబ్బతీయడం సులభమని ట్రంప్ భావిస్తున్నారు. ఈ దిగ్బంధనం వల్ల ఇరాన్ చమురు ఎగుమతులు నిలిచిపోయి, ఆ దేశ ఆర్థిక వ్యవస్థ కుప్పకూలే ప్రమాదం ఏర్పడటంతో, ముట్టడిని మరికొంత కాలం పొడిగించాలని ట్రంప్ నిర్ణయించారు.

అమెరికా చర్యలపై ఇరాన్ తీవ్రస్థాయిలో విరుచుకుపడుతోంది. ఇరాన్ శక్తివంతమైన సైనిక విభాగం 'ఇస్లామిక్ రివల్యూషనరీ గార్డ్ కోర్' (IRGC) అమెరికాకు అల్టిమేటం జారీ చేసింది. ఒకవేళ అమెరికా తన దూకుడును తగ్గించకుండా సైనిక చర్యలకు దిగితే, పశ్చిమాసియా వ్యాప్తంగా ఉన్న తమ మద్దతుదారులైన సాయుధ గ్రూపులన్నీ రంగంలోకి దిగుతాయని హెచ్చరించింది. అమెరికాకు చెందిన భారీ నౌకలను సముద్రంలోనే దహనం చేస్తామని ఐఆర్‌జీసీ నావికాదళ అధికారులు హెచ్చరించారు. అటు ఇరాన్ ఆర్మీ ప్రతినిధి అమిర్ అక్రమినియా మాట్లాడుతూ.. అధికారికంగా సీజ్‌ఫైర్ కుదిరినప్పటికీ, తెర వెనుక యుద్ధం ఇంకా కొనసాగుతూనే ఉందని, హర్మూజ్ జలసంధి తమ సాయుధ దళాల పూర్తి నియంత్రణలోనే ఉందని స్పష్టం చేశారు.

మరోవైపు, ఇరాన్ వ్యవహారం అంతర్జాతీయ దౌత్య విభేదాలకు కూడా దారితీసింది. జర్మన్ ఛాన్సలర్ ఫెడ్రిక్ మెర్జ్‌పై డొనాల్డ్ ట్రంప్ తీవ్ర అసహనం వ్యక్తం చేశారు. ఇరాన్ పట్ల అమెరికా అనుసరిస్తున్న కఠిన వైఖరిని, అలాగే పాకిస్థాన్‌లో చర్చల వైఫల్యాన్ని మెర్జ్ విమర్శించడమే ఇందుకు కారణం. దీనిపై ట్రూత్ సోషల్‌ వేదికగా స్పందించిన ట్రంప్.. మెర్జ్‌కు అసలు పరిస్థితిపై అవగాహన లేదని మండిపడ్డారు. ఇరాన్ అణు కార్యక్రమం వల్ల ప్రపంచానికి పొంచి ఉన్న ముప్పును మెర్జ్ తక్కువ చేసి చూస్తున్నారని, టెహ్రాన్ వద్ద అణ్వాయుధం ఉండటం ప్రపంచ శాంతికే ప్రమాదకరమని ట్రంప్ పునరుద్ఘాటించారు.

మొత్తంగా, హర్మూజ్ జలసంధిపై పట్టు కోసం సాగుతున్న ఈ పోరు కేవలం రెండు దేశాల మధ్యే కాకుండా, అగ్రరాజ్యాల మధ్య మాటల యుద్ధానికి, అంతర్జాతీయ మార్కెట్లో చమురు సంక్షోభానికి దారితీస్తోంది. అమెరికా తన దిగ్బంధనాన్ని కొనసాగిస్తే, ఇరాన్ ఎలాంటి ఆత్మాహుతి చర్యలకు దిగుతుందోనని అంతర్జాతీయ సమాజం ఆందోళన చెందుతోంది. ఒకవైపు ఆర్థిక ఆంక్షలు, మరోవైపు సైనిక హెచ్చరికలతో పశ్చిమాసియా ప్రస్తుతం ఒక అగ్నిపర్వతంలా కనిపిస్తోంది.