Iran : ట్రంప్ చమురు దెబ్బ.. ఇరాన్‌కు రోజుకు రూ. 4 వేల కోట్ల నష్టం!

హార్ముజ్ జలసంధి వద్ద అమెరికా విధిస్తున్న నౌకాదళ దిగ్బంధనం ఇరాన్ ఆర్థిక మూలాలను తీవ్రంగా దెబ్బతీసే ప్రమాదం ఉందని వాల్ స్ట్రీట్ జర్నల్ నివేదిక స్పష్టం చేస్తోంది. వాషింగ్టన్, టెహ్రాన్ మధ్య ఉద్రిక్తతలు గరిష్ట స్థాయికి చేరుకున్న తరుణంలో, అధ్యక్షుడు డొనాల్డ్ ట్రంప్ సోమవారం నుండి ఈ దిగ్బంధనాన్ని అమలులోకి తెచ్చారు.

 దీనివల్ల ఇరాన్ కేవలం చమురు ఎగుమతుల ద్వారానే కాకుండా, ఎరువులు, ఆహార పదార్థాలు ఇతర నిత్యావసరాల రవాణా నిలిచిపోవడం వల్ల రోజుకు దాదాపు 435 మిలియన్ డాలర్లు అంటే భారతీయ కరెన్సీలో సుమారు 4,081 కోట్ల రూపాయల భారీ ఆర్థిక నష్టాన్ని చవిచూడాల్సి వస్తుంది. ఈ చర్య వల్ల ఇరాన్‌లో ద్రవ్యోల్బణం ఆకాశాన్ని తాకడమే కాకుండా, అంతర్జాతీయ మార్కెట్‌లో చమురు ధరలపై కూడా తీవ్ర ప్రభావం పడే అవకాశం ఉంది.

అయితే, ఈ ఆర్థిక నష్టం తీవ్రత అనేది అమెరికా ఎంత కఠినంగా ఈ దిగ్బంధనాన్ని అమలు చేస్తుంది అనే అంశంపై ఆధారపడి ఉంటుందని విశ్లేషకులు అభిప్రాయపడుతున్నారు. ఇరాన్ తన ఎగుమతులను హార్ముజ్ జలసంధికి వెలుపల ఉన్న 'జాస్క్' టెర్మినల్‌కు మళ్లించగలిగితే ఈ నష్టాన్ని కొంతవరకు తగ్గించుకునే అవకాశం ఉంది. ప్రస్తుతానికి సముద్రంపై ఉన్న సుమారు 154 మిలియన్ బారెళ్ల నిల్వలు ఇరాన్‌కు స్వల్పకాలికంగా ఊరటనిస్తాయి. 

కానీ, ఇరాన్ చమురు ఎగుమతుల్లో 90 శాతానికి పైగా 'ఖార్గ్ ఐలాండ్' ద్వారానే జరుగుతాయి, ఇది పర్షియన్ గల్ఫ్ లోపల ఉండటం వల్ల అమెరికా దీనిని సులభంగా లక్ష్యం చేసుకోగలదు. చైనా తన అవసరాల కోసం అత్యధికంగా ఈ మార్గంపైనే ఆధారపడుతున్నందున, ట్రంప్ తీసుకున్న ఈ నిర్ణయం అటు చైనాను కూడా ఒత్తిడిలోకి నెట్టి, ఇరాన్‌పై ఆంక్షల విషయంలో అమెరికాతో చేతులు కలిపేలా చేసే వ్యూహాత్మక ఎత్తుగడగా కనిపిస్తోంది.

ఒక భారీ సవాలు

ఈ దిగ్బంధనాన్ని అమలు చేయడం అమెరికా నౌకాదళానికి ఒక భారీ సవాలుగా పరిణమించనుంది. ప్రపంచ చమురు రవాణాలో ఐదవ వంతు ఈ చిన్న మార్గం నుంచే సాగుతుంది కాబట్టి, ప్రతి నౌకను తనిఖీ చేయడం సాంకేతికంగా, సైనికంగా క్లిష్టమైన ప్రక్రియ. పర్షియన్ గల్ఫ్ వెలుపల అమెరికాకు యుద్ధనౌకలు ఉన్నప్పటికీ, గల్ఫ్ లోపల శాశ్వత నౌకలు లేకపోవడం, అపారమైన షిప్పింగ్ ట్రాఫిక్‌ను నియంత్రించాల్సి రావడం వల్ల ఈ చర్య ఎంతవరకు సఫలమవుతుందనేది వేచి చూడాలి. 

అమెరికా కేవలం ఆర్థిక నష్టాన్ని కలిగించడమే కాకుండా, భూభాగంపై సైన్యాన్ని మోహరించి యుద్ధం చేసే ప్రమాదం లేకుండా ఇరాన్ నగదు ప్రవాహాన్ని గొంతు నులిమి లొంగదీసుకోవడమే ప్రధాన లక్ష్యంగా పెట్టుకుంది. దీనివల్ల ఇరాన్ ఎగుమతులు దాదాపుగా నిలిచిపోయి ఆ దేశం తీవ్ర సంక్షోభంలోకి వెళ్లే ప్రమాదం ఉందని నిపుణులు హెచ్చరిస్తున్నారు.