Hormuz : హార్ముజ్ జలసంధిలో కాల్పుల మోత..ఇండియన్ ట్యాంకర్‌పై ఇరాన్ అటాక్!

హార్ముజ్ జలసంధి వద్ద మరోసారి ఉద్రిక్తతలు తారాస్థాయికి చేరుకున్నాయి. శనివారం నాడు ఈ మార్గం గుండా వెళ్తున్న రెండు వాణిజ్య నౌకలపై ఇరాన్ సైన్యం కాల్పులు జరపడం అంతర్జాతీయంగా కలకలం రేపుతోంది. వీటిలో సుమారు 20 లక్షల బ్యారెళ్ల ఇరాకీ ముడి చమురును తీసుకెళ్తున్న ఒక భారతీయ సూపర్ ట్యాంకర్ కూడా ఉండటం గమనార్హం. ఇరాన్ మరియు అమెరికా మధ్య కొనసాగుతున్న పరస్పర దిగ్బంధనాల నేపథ్యంలో, ప్రపంచ ఇంధన సరఫరా మార్గాలకు పెను ముప్పు పొంచి ఉందనే ఆందోళనలు వ్యక్తమవుతున్నాయి.

యూకే మారిటైమ్ ట్రేడ్ ఆపరేషన్స్ (UKMTO) తెలిపిన వివరాల ప్రకారం, ఇరాన్ రివల్యూషనరీ గార్డ్ (IRGC) కి చెందిన రెండు గన్‌బోట్లు జలసంధి గుండా వెళ్తున్న ట్యాంకర్‌పై కాల్పులు జరిపాయి. అయితే, అదృష్టవశాత్తూ నౌక మరియు అందులోని సిబ్బంది సురక్షితంగా ఉన్నట్లు సమాచారం. ఈ కాల్పుల నేపథ్యంలో భారతీయ నౌకతో సహా పలు వెసెల్స్ తమ ప్రయాణాన్ని రద్దు చేసుకుని వెనక్కి మళ్లాయి. క్విష్మ్ మరియు లారక్ దీవుల మధ్య ఈ కాల్పులు జరిగినట్లు అంతర్జాతీయ వార్తా సంస్థలు ధృవీకరించాయి.

ఈ పరిణామాల మధ్య, హార్ముజ్ జలసంధిని తాము పూర్తిగా మూసివేస్తున్నట్లు ఇరాన్ రేడియో సందేశాల ద్వారా ప్రకటించింది. "అమెరికా ప్రభుత్వం చర్చల్లో ఇచ్చిన హామీలను నెరవేర్చడంలో విఫలమైంది. అందుకే ఈ జలసంధిని మళ్లీ మూసివేస్తున్నాం. ఏ దేశానికి చెందిన, ఏ రకమైన నౌకను కూడా దీని గుండా వెళ్లడానికి అనుమతించబోము" అని ఆ సందేశంలో పేర్కొన్నారు. ఇరాన్ రేవులపై అమెరికా విధిస్తున్న ఆంక్షలు తొలగించే వరకు ఈ దిగ్బంధనం కొనసాగుతుందని ఇరాన్ సైనిక కమాండ్ హెచ్చరించింది.

10 రోజుల కాల్పుల విరమణ ఒప్పందం

వాస్తవానికి, లెబనాన్‌లో ఇజ్రాయెల్-హిజ్బుల్లా మధ్య కుదిరిన 10 రోజుల కాల్పుల విరమణ ఒప్పందం నేపథ్యంలో ఇరాన్ ఈ మార్గాన్ని తెరుస్తున్నట్లు ప్రకటించింది. కానీ, అమెరికా తన ఆంక్షల పర్వాన్ని కొనసాగించడంతో ఇరాన్ తన నిర్ణయాన్ని మార్చుకుంది. ఇరాన్ పార్లమెంటరీ కమిటీ హెడ్ ఇబ్రహీం అజీజీ మాట్లాడుతూ.. నౌకలు ఇకపై ఇరాన్ నౌకాదళ అనుమతి తీసుకోవాలని, టోల్ చెల్లింపులు చేయాలని స్పష్టం చేశారు. మరోవైపు, ఇరాన్ సుప్రీం లీడర్ మోజ్తబా ఖమేనీ స్పందిస్తూ.. తమ నౌకాదళం శత్రువులకు కొత్త పరాజయాలను రుచి చూపించడానికి సిద్ధంగా ఉందని హెచ్చరించారు.

ప్రపంచ చమురు వాణిజ్యంలో ఐదవ వంతు వాటా కలిగిన హార్ముజ్ జలసంధి మళ్లీ అస్థిరంగా మారడం గ్లోబల్ మార్కెట్‌పై తీవ్ర ప్రభావం చూపే అవకాశం ఉంది. అమెరికా అధ్యక్షుడు డొనాల్డ్ ట్రంప్ ఈ సంక్షోభంపై స్పందిస్తూ.. ఏప్రిల్ 22న కాల్పుల విరమణ ముగిసేలోగా విస్తృత ఒప్పందం కుదరకపోతే మళ్లీ దాడులు మొదలవుతాయని హెచ్చరించారు. దీంతో ఈ కీలక జలమార్గం గుండా సాగే రవాణాపై అనిశ్చితి కొనసాగుతోంది.