లాక్‌డౌన్ టైంలో లాక్‌అప్ డెత్.. 9 మంది పోలీసులకు ఉరిశిక్ష విధించిన కోర్టు

దేశవ్యాప్తంగా పెను సంచలనం సృష్టించిన తమిళనాడులోని సాతంకులం కస్టడీ మరణాల కేసులో న్యాయస్థానం చారిత్రాత్మక తీర్పు వెలువరించింది. కరోనా లాక్డౌన్ సమయంలో తండ్రీకొడుకులను అన్యాయంగా ప్రాణతీసిన తొమ్మిది మంది పోలీసులకు మధురై ప్రత్యేక కోర్టు మరణశిక్ష విధిస్తూ నిర్ణయం తీసుకుంది. మానవత్వాన్ని మంటగలిపేలా వ్యవహరించిన ఖాకీల తీరుపై కోర్టు తీవ్ర ఆగ్రహం వ్యక్తం చేసింది.

అసలేం జరిగింది?

2020 జూన్ 19న లాక్డౌన్ నిబంధనలు అమల్లో ఉన్న సమయంలో తూత్తుకుడి జిల్లా సాతంకులానికి చెందిన జయరాజ్, ఆయన కుమారుడు బెన్నిక్స్ తమ మొబైల్ షాపును నిర్ణీత సమయం కంటే ఎక్కువ సేపు తెరిచి ఉంచారనే ఆరోపణతో పోలీసులు వారిని అరెస్టు చేశారు. స్టేషన్‌కు తరలించిన తర్వాత ఆ రాత్రంతా పోలీసులు వారిపై పైశాచికత్వాన్ని ప్రదర్శించారు. కర్రలు, ఇనుప రాడ్లతో విచక్షణారహితంగా దాడి చేశారు. అనంతరం వారిని కోవిల్‌పట్టి సబ్ జైలుకు తరలించగా, తీవ్ర గాయాల కారణంగా తండ్రీకొడుకులిద్దరూ మరణించారు.

#TamilNadu: #Sathankulam custodial deaths case: Death penalty awarded to 9 police personnel

In a landmark verdict in the Sathankulam custodial deaths case, the Madurai First Additional District Court has awarded the death penalty to all nine convicted police personnel, including…

— South First (@TheSouthfirst) April 6, 2026

ఈ కేసును విచారించిన సీబీఐ, పోలీసులు బాధితులను చిత్రహింసలకు గురిచేసినట్లు పక్కా ఆధారాలను సమర్పించింది. నిందితులు తమ తప్పును కప్పిపుచ్చుకోవడానికి నకిలీ రికార్డులను సృష్టించారని, దర్యాప్తును అడ్డుకునేందుకు ప్రయత్నించారని కోర్టు నిర్ధారించింది. ఈ కేసులో ప్రధాన నిందితులైన ఇన్‌స్పెక్టర్ శ్రీధర్, సబ్ ఇన్‌స్పెక్టర్లు రఘుగణేష్, బాలకృష్ణన్‌లతో పాటు మురుగన్, ముత్తురాజ్, చెల్లాదురై, థోమన్ ఫ్రాన్సిస్, సముదురై, వేయిల్ ముత్తులకు కోర్టు మరణశిక్ష ఖరారు చేసింది. ప్రధాన నిందితుడు శ్రీధర్‌కు శిక్షతో పాటు రూ. 15 లక్షల జరిమానా కూడా విధించింది.

నాడు ఈ ఘటన బయటకు రాగానే తమిళనాడుతో పాటు దేశమంతటా నిరసనలు వెల్లువెత్తాయి. లాక్డౌన్ వేళ సామాన్యుల పట్ల పోలీసులు ఇంత క్రూరంగా ఎలా ప్రవర్తిస్తారంటూ పౌర సమాజం, సినీ సెలబ్రిటీలు, రాజకీయ నాయకులు మండిపడ్డారు. ఈ కేసులో బాధితులకు న్యాయం జరగాలంటూ పెద్ద ఎత్తున డిమాండ్లు రావడంతో ప్రభుత్వం విచారణను సీబీఐకి అప్పగించింది.

చివరికి నాలుగేళ్ల తర్వాత వెలువడిన ఈ తీర్పు, అధికార బలంతో సామాన్యులను హింసించే వారికి గట్టి హెచ్చరికగా నిలిచింది. బాధితుల కుటుంబ సభ్యులు ఈ తీర్పు పట్ల హర్షం వ్యక్తం చేస్తూ, న్యాయం గెలిచిందని భావిస్తున్నారు. పోలీసు వ్యవస్థలో జవాబుదారీతనం పెంచేలా ఈ తీర్పు ఒక మైలురాయిగా నిలిచిపోనుంది.