కోకాపేట్‌లో యువకుడి దారుణ హత్య.. స్నేహితుడే హంతకుడు

హైదరాబాద్ లోని కోకాపేట్ లో యువకుడు హత్యకు గురైన ఘ‌ట‌న నగరాన్ని భయాందోళనకు గురిచేసింది. క్షణికావేశంలో స్నేహితుడినే ఇనుప రాడ్ తో కొట్టి చంపేశాడు ఓ దుర్మార్గుడు. ఎంతమంది అడ్డుకున్న వినకుండా విచక్షణ రహితంగా కొట్టడంతో  అక్కడికక్కడే చనిపోయాడు. దీంతో స్థానికుల సమాచారం మేరకు నార్సింగ్ పోలీసులు ఘటనా స్థలానికి చేరుకొని కేసు నమోదు చేసి దర్యాప్తు చేస్తున్నట్లు తెలిపారు.

కోకాపేట్ పరిధిలోని పోలీసులు తెలిపిన వివరాల ప్రకారం.. వెస్ట్ బెంగాల్‌కు చెందిన నయన్ పహారియా, రూబెల్ షేక్ అనే ఇద్దరు జీవనోపాధి నిమిత్తం హైదరాబాద్‌కు వలస వచ్చారు. ఈ క్రమంలోనే కోకాపేటలోని ప్రెస్టీజ్ కంపెనీకి చెందిన భవన నిర్మాణంలో కార్మికులుగా పనిచేస్తున్నారు. అయితే ఈ బిల్డింగ్ పదవ అంతస్తులో పనిచేస్తున్న సమయంలో ఈ ఇద్దరు యువకులు మధ్య ఘర్షణ చెలరేగింది. మాట మాట పెరగడంతో ఘర్షణ కాస్త పెద్దదైంది. అక్కడ పని చేస్తున్న మిగతా కార్మికులందరూ నచ్చ చెప్పేందుకు ప్రయత్నించినా వినలేదు. దీంతో ఆగ్రహానికి లోనైనా రూబెల్ షేక్ తన పక్కనే ఉన్న రాడ్ తీసుకొని ఆవేశంలో నయాన్ పహారియా తలపై గట్టి గట్టిగా బాదాడు. దీంతో నయన్ తలకు తీవ్ర గాయమై అధిక రక్తస్రావం కావడంతో అక్కడికక్కడే మృతి చెందాడు. హత్య చేసిన అనంతరం భయపడిపోయిన రూబెల్ షేక్ అక్కడినుంచి పారిపోయినట్లు స్థానికుల సమాచారం ఆధారంగా పోలీసులు వెల్లడించారు.

Also read :క్లాస్ రూమ్ లోనే దారుణంగా తన్నుకున్న టీచ‌ర్లు.. వీడియో వైరల్

అయితే అక్కడున్న కార్మికుల కళ్లముందే నయాన్ మృతి చెందగా భయభ్రాంతులకు గురై వెంటనే 100 డయల్ కు ఫోన్ చేసి సమాచారం అందించారు. ఘటన స్థలానికి చేరుకుని మృతదేహాన్ని పోస్టుమార్టం నిమిత్తం ఉస్మానియా హాస్పిటల్ తరలించినట్లు చెప్పిన నార్సింగ్ పోలీసులు.. కేసు నమోదు చేసుకొని దర్యాప్తు చేస్తున్నట్లు వెల్లడించారు. హత్య చేసి పారిపోయిన రూబెల్ షేక్ ను సీసీటీవీ ఫుటేజ్ ఆధారంగా పట్టుకునే ప్రయత్నం చేస్తున్నట్లు తెలిపారు.