Kaleshwaram case : తెలంగాణ హైకోర్టులో కేసీఆర్, హరీష్‌రావుకు ఊరట

Kaleshwaram case : కాళేశ్వరం ప్రాజెక్టు అవకతవకలపై విచారణ జరుపుతున్న జస్టిస్ పి.సి. ఘోష్ కమిషన్ వ్యవహారంలో తెలంగాణ మాజీ ముఖ్యమంత్రి కె. చంద్రశేఖర రావు, మాజీ మంత్రి టి. హరీశ్ రావులకు తెలంగాణ హైకోర్టులో భారీ ఊరట లభించింది. కమిషన్ నివేదిక ఆధారంగా ప్రభుత్వం ఎలాంటి చర్యలు తీసుకోకూడదని స్పష్టం చేస్తూ హైకోర్టు బుధవారంకీలక తీర్పు వెలువరించింది.
 
జస్టిస్ ఘోష్ కమిషన్ సమర్పించిన రిపోర్టు ఆధారంగా పిటిషనర్లపై ఎలాంటి చట్టపరమైన చర్యలు చేపట్టవద్దని హైకోర్టు ఆదేశించింది. ఈ నివేదిక ఆధారంగా చివరకు సీబీఐ (CBI) కూడా ఎటువంటి చర్యలు తీసుకోవడానికి వీల్లేదని ధర్మాసనం స్పష్టం చేయడం గమనార్హం.కమిషన్ విచారణ జరిపిన తీరులో ప్రాథమిక నిబంధనలు పాటించలేదని కోర్టు అభిప్రాయపడింది. ముఖ్యంగా, అభియోగాలు ఎదుర్కొంటున్న వ్యక్తులకు సరైన నోటీసులు ఇవ్వకుండా, వారి వాదనలు వినకుండానే నివేదికను సిద్ధం చేయడాన్ని హైకోర్టు తప్పుబట్టింది. పిటిషనర్లు లేవనెత్తిన 'సహజ న్యాయ సూత్రాల ఉల్లంఘన' వాదనతో కోర్టు ఏకీభవించింది.

అయితే, ప్రభుత్వం జస్టిస్ ఘోష్ కమిషన్‌ను ఏర్పాటు చేస్తూ జారీ చేసిన జీవో 6 (మార్చి 14, 2024) చట్టబద్ధమేనని హైకోర్టు పేర్కొంది. కమిషన్ ఏర్పాటును కోర్టు కొట్టివేయలేదు కానీ, ఆ కమిషన్ అనుసరించిన 'విచారణా విధానం' (Procedure) లోపభూయిష్టంగా ఉందని తేల్చింది.

 మేడిగడ్డ, అన్నారం, సుందిళ్ల బ్యారేజీల కుంగుబాటు మరియు నిర్మాణ లోపాలపై విచారణకు కాంగ్రెస్ ప్రభుత్వం ఈ కమిషన్‌ను నియమించింది. దీనిని సవాలు చేస్తూ కేసీఆర్, హరీశ్ రావుతో పాటు ఐఏఎస్ అధికారులు స్మితా సభర్వాల్, ఎస్.కె. జోషిలు హైకోర్టును ఆశ్రయించారు. తమ ప్రతిష్ఠకు భంగం కలిగేలా, తమ వివరణ తీసుకోకుండానే కమిషన్ ఏకపక్షంగా వ్యవహరిస్తోందని వారు పిటిషన్‌లో పేర్కొన్నారు.ప్రధాన న్యాయమూర్తి జస్టిస్ అపరేశ్ కుమార్ సింగ్, జస్టిస్ జి.ఎం. మొహియుద్దీన్‌లతో కూడిన ధర్మాసనం ఈ తీర్పును వెలువరిస్తూ.. విచారణా సంస్థలు లేదా కమిషన్లు ప్రజాప్రయోజనాల కోసం పనిచేస్తున్నప్పటికీ, వ్యక్తుల హక్కులను, విచారణా నియమాలను విస్మరించకూడదని గుర్తుచేసింది.

 ఈ తీర్పుతో కాళేశ్వరం విషయంలో దూకుడుగా వెళ్తున్న ప్రస్తుత ప్రభుత్వానికి కొంత వెనకడుగు పడినట్లయింది. ముఖ్యంగా నివేదిక ఆధారంగా తక్షణ చర్యలు తీసుకోవాలని భావించిన ప్రభుత్వానికి కోర్టు ఆదేశాలు అడ్డంకిగా మారాయి. మరోవైపు, విచారణ ఎదుర్కొంటున్న బీఆర్ఎస్ ముఖ్య నేతలకు ఇది పెద్ద ఊరటగా మారింది.హైకోర్టు తీర్పుతో జస్టిస్ ఘోష్ కమిషన్ రిపోర్టు ప్రస్తుతానికి బుట్టదాఖలైనట్లేనని న్యాయ నిపుణులు విశ్లేషిస్తున్నారు. ప్రభుత్వం ఈ తీర్పుపై సుప్రీంకోర్టుకు వెళ్తుందా లేదా కమిషన్ ప్రక్రియను మళ్లీ మొదటి నుంచి ప్రారంభిస్తుందా అన్నది వేచి చూడాలి.

కేసు నేపథ్యం ..
కాళేశ్వరం ప్రాజెక్టులోని బ్యారేజీలు కుంగిపోవడం, లీకేజీలు తదితర అంశాలపై విచారణకు రాష్ట్ర ప్రభుత్వం 2024 మార్చి 14న జీవో 6 ద్వారా జస్టిస్ ఘోష్ కమిషన్‌ను నియమించింది. అయితే, ఈ కమిషన్ నియామకాన్ని, విచారణ ప్రక్రియను సవాలు చేస్తూ అప్పటి ముఖ్యమంత్రి కె. చంద్రశేఖర రావు (KCR), మాజీ మంత్రి టి. హరీశ్ రావు, ఐఏఎస్ అధికారులు స్మితా సభర్వాల్, ఎస్.కె. జోషిలు వేర్వేరుగా హైకోర్టులో పిటిషన్లు దాఖలు చేశారు.కమిషన్ విచారణ జరిపే విధానంలో నిబంధనల ఉల్లంఘన జరిగిందని, సహజ న్యాయ సూత్రాలను పాటించడం లేదని పిటిషనర్లు పేర్కొన్నారు.

వాదనల విస్మరణ: తమపై అభియోగాలు మోపే ముందు లేదా నివేదికలో తమ పేర్లను ప్రస్తావించే ముందు, తమ వాదనను కనీసం పరిగణనలోకి తీసుకోలేదని ఆరోపించారు. ప్రజాప్రయోజనాల పేరుతో విచారణ జరుపుతూ వ్యక్తుల పరువు ప్రతిష్ఠలకు భంగం కలిగించడం సరికాదని కోర్టుకు విన్నవించారు.మరోవైపు ప్రభుత్వం తరఫు న్యాయవాదులు వాదనలు వినిపిస్తూ.. వేల కోట్ల ప్రజా ధనంతో నిర్మించిన ప్రాజెక్టు విఫలమైనప్పుడు, బాధ్యులను గుర్తించడం ప్రభుత్వ బాధ్యతని తెలిపారు. ప్రజాప్రయోజనాలను దృష్టిలో ఉంచుకుని, నిపుణులతో కూడిన కమిషన్ ద్వారా పారదర్శక విచారణ చేపట్టినట్లు సమర్థించుకున్నారు.

తీర్పు వాయిదాల పరంపర:
ముఖ్య న్యాయమూర్తి జస్టిస్ అపరేశ్ కుమార్ సింగ్, జస్టిస్ జి.ఎం. మొహియుద్దీన్‌లతో కూడిన ధర్మాసనం ఈ పిటిషన్లపై సుదీర్ఘంగా వాదనలు విని మార్చి 12న తీర్పును రిజర్వు చేసింది. తొలుత ఈ నెల 8న తీర్పు వెలువరించాల్సి ఉన్నప్పటికీ, తీర్పు ప్రతి సిద్ధం కాకపోవడంతో కోర్టు దానిని ఏప్రిల్ 22కు వాయిదా వేసిన విషయం తెలిసిందే.

రాష్ట్రవ్యాప్తంగా ఉత్కంఠ రేపుతున్న ఈ తీర్పు నేపథ్యంలో, హైకోర్టు ప్రాంగణంలో భద్రతను కట్టుదిట్టం చేశారు. నేడు వెలువడనున్న ఈ తీర్పు తెలంగాణ రాజకీయాలపై తీవ్ర ప్రభావం చూపే అవకాశం ఉంది.