టీమిండియా చీఫ్ సెలెక్టర్‌గా అగార్కర్‌నే ఎందుకు ఎంపిక చేశారంటే..!

వన్డే ప్రపంచ కప్ తో పాటు టీ20 వరల్డ్ కప్ జట్లను ఎంపిక చేయాల్సి ఉంటుంది. ఈ క్రమంలో టీ-20లు ఆడిన అనుభవంతో పాటు ఈసారి చీఫ్ సెలెక్టర్‌గా యువ అభ్యర్థిత్వం ఉంటే బాగుంటుందని బీసీసీఐ భావించింది. అయితే గతంలో అగార్కర్ కామెంటరీతో పాటు కోచింగ్ బాధ్యతలను నిర్వర్తించాడు. సెలెక్టర్ గాను అతనికి ఇదే మొదటిదేం కాదు. గతంలో ముంబై క్రికెట్ జట్టు చీఫ్ సెలెక్టర్‌గా వర్క్‌ చేసిన అనుభవం ఉంది. ఐపీఎల్‌లో ఢిల్లీకి సహాయక కోచ్‌గా బాధ్యతలను నిర్వర్తించాడు.

క్రికెట్ విశ్లేషకుడిగానూ.. అగార్కర్‌కి అనుభవం ఉంది. ఆటను సునిశితంగా పరిశీలిస్తాడు. అగార్కర్ భారత్ తరఫున మూడు ఫార్మాట్లలో 349 వికెట్లు తీశాడు. అన్ని విభాగాలపై పట్టుంది. ఆటగాళ్ల బలా,బలాలను అంచనా వేయడంలో తనకు తానే దిట్టని చెప్పాలి. చీఫ్ సెలెక్టర్ పదవి కోసం అగ్రశ్రేణి ఆటగాళ్ల వైపు బీసీసీఐ వెళ్లకపోవడానికి పారితోషికం మరో ప్రధాన అంశంగా చెబుతున్నారు. చీఫ్ సెలక్టర్ గా ఎంపికైన వారికి ప్రస్తుతం రూ.1 కోటి వేతనం ఉంటుంది. మాజీ అగ్ర శ్రేణి ఆటగాళ్లకు ఇది చాలా తక్కువ అనిపిస్తుంది.

అగార్కర్ వ్యాఖ్యాతగా ఇంతకంటే ఎక్కువగానే సంపాదించుకోవచ్చు. దీంతో వేతన ప్యాకేజీని రూ.3 కోట్లకు పెంచేందుకు బీసీసీఐ అంగీకరించిందని తెలుస్తోంది. అగార్కర్ ప్రస్తుతం లండన్‌లో ఉంటున్నాడు. ఒక క్రికెట్ లెజెండ్ అగార్కర్‌ను దీనికోసం ఒప్పించినట్లుగా తెలుస్తోంది. ఈ పదవి కోసం అగార్కర్ ఒక్కడే దరఖాస్తు చేసుకున్నాడని సమాచారం. దీంతో క్రికెట్ సలహా కమిటీ అగార్కర్‌ను మాత్రమే ఇంటర్వ్యూ చేసి, అతని అనుభవం, ఇతర అంశాలను దృష్టిలో పెట్టుకొని దీనికి బీసీసీఐ ఎంపిక చేసినట్లు సమాచారం.