విజయ్ దళపతి సంచలన నిర్ణయం.. ఎన్నికల్లో పోటీ అక్కడి నుంచే!

విజయ్ తన రాజకీయ ప్రస్థానాన్ని ఉత్తర చెన్నై (నార్త్ చెన్నై) నుండి ప్రారంభించాలని నిర్ణయించుకున్నారు. ఈ ప్రాంతం దశాబ్దాలుగా డీఎంకే నిర్లక్ష్యానికి గురైందని, అభివృద్ధిలో వెనుకబడిందని టీవీకే పార్టీ గట్టిగా నమ్ముతోంది. అందుకే స్టాలిన్ ప్రభుత్వ వైఫల్యాలను ఎండగట్టేందుకు నార్త్ చెన్నైలోని ఒక నియోజకవర్గం నుండి విజయ్ స్వయంగా పోటీ చేస్తారని పార్టీ ప్రధాన కార్యదర్శి స్పష్టం చేశారు.

రాజకీయాల్లో పొత్తుల అంశంపై విజయ్ అత్యంత కీలకమైన ప్రకటన చేశారు. ప్రస్తుతం దేశంలోని రెండు ప్రధాన కూటములైన ఎన్డీయే (NDA) లేదా ఇండియా (INDIA) కూటములతో తాము జతకట్టబోమని ఆయన తేల్చి చెప్పారు. ఎన్నికలకు ముందు గానీ, ఎన్నికల తర్వాత గానీ ఎవరితోనూ పొత్తు ఉండదని, ఒంటరిగానే పోటీ చేసి ప్రభుత్వాన్ని ఏర్పాటు చేస్తామని ధీమా వ్యక్తం చేశారు.

దశాబ్దాలుగా తమిళనాడును ఏలుతున్న సంప్రదాయ పార్టీలకు తామే అసలైన ప్రత్యామ్నాయమని విజయ్ భావిస్తున్నారు. డీఎంకే ప్రభుత్వాన్ని గద్దె దించడమే తన ఏకైక లక్ష్యమని ప్రకటించిన ఆయన, ప్రజల్లో ఉన్న వ్యతిరేకతను తమకు అనుకూలంగా మార్చుకునే ప్రయత్నం చేస్తున్నారు. విజయ్ తీసుకున్న ఈ 'ఏకపక్ష పోరు' నిర్ణయం తమిళనాడు రాజకీయ సమీకరణాలను ఒక్కసారిగా మార్చేసింది.

యువతలో ఉన్న క్రేజ్, స్పష్టమైన వ్యూహాలతో విజయ్ అడుగులు వేస్తుండటంతో రాబోయే ఎన్నికలు రసవత్తరంగా మారనున్నాయి.