CJP nationwide protests : జూన్ 13 డెడ్‌లైన్.. ప్రధాన్‌కు కాక్రోచ్‌ జనతా పార్టీ(సీజేపీ) అల్టిమేటం

CJP nationwide protests : పోటీ పరీక్షల నిర్వహణలో జరుగుతున్న వరుస వైఫల్యాలు, పేపర్ లీకేజీలపై దేశవ్యాప్తంగా విద్యార్థులు, యువతలో రాజుకున్న ఆగ్రహ జ్వాలలు మరింత ఉగ్రరూపం దాలుస్తున్నాయి. లక్షలాది మంది విద్యార్థుల భవిష్యత్తుతో చెలగాటమాడుతున్న కేంద్ర ప్రభుత్వ వైఖరికి నిరసనగా దేశ రాజధాని ఢిల్లీ వేదికగా మొదలైన ఆందోళనలు ఇప్పుడు సరికొత్త మలుపు తిరిగాయి. 'కాక్రోచ్ జనతా పార్టీ' (సీజేపీ) వ్యవస్థాపకుడు అభిజీత్ దీప్కే కేంద్ర విద్యాశాఖ మంత్రి ధర్మేంద్ర ప్రధాన్‌కు  అల్టిమేటం జారీ చేశారు. పరీక్షల అవకతవకలకు నైతిక బాధ్యత వహిస్తూ ఆయన జూన్ 13 లోగా తన పదవికి రాజీనామా చేయాలని, లేనిపక్షంలో ఊహించని రీతిలో దేశవ్యాప్త ప్రజా ఉద్యమాన్ని ఎదుర్కోవాల్సి వస్తుందని స్పష్టం చేశారు.

సామాజిక మాధ్యమాల (ఎక్స్/ట్విట్టర్) వేదికగా కేవలం వ్యంగ్యాస్త్రాలు, డిజిటల్ ప్రచారంతో మొదలైన ‘కాక్రోచ్ జనతా పార్టీ’ (CJP), నేడు దేశ యువత హక్కుల తరఫున గళమెత్తే ఒక బలమైన ఆఫ్‌లైన్ ప్రజా ఉద్యమంగా రూపాంతరం చెందింది. ఇటీవల ఢిల్లీలోని జంతర్ మంతర్ వద్ద వేలాది మంది విద్యార్థులతో భారీ నిరసన ప్రదర్శనను విజయవంతంగా నిర్వహించిన దీప్కే, ఇప్పుడు పోరాటాన్ని తదుపరి స్థాయికి తీసుకెళ్లేందుకు సిద్ధమయ్యారు. నీట్ (NEET), సీబీఎస్‌ఈ (CBSE), సీయూఈటీ (CUET), ఎస్‌ఎస్‌సీ (SSC) వంటి కీలకమైన జాతీయ స్థాయి నియామక పరీక్షల్లో జరిగిన తీవ్ర అవకతవకలకు కేంద్ర విద్యాశాఖ మంత్రిదే పూర్తి బాధ్యత అని ఆయన తేల్చిచెప్పారు.

నిర్ణీత గడువు (జూన్ 13) లోగా కేంద్ర విద్యాశాఖ మంత్రి తన పదవి నుంచి తప్పుకోకపోతే, ఈ ఆందోళనలను మరింత తీవ్రతరం చేస్తామని  సోషల్ మీడియా వేదికగా విడుదల చేసిన ఓ వీడియో సందేశంలో దీప్కే స్పష్టం చేశారు. కేంద్రం గనుక మెట్టు దిగకపోతే ఉద్యమాన్ని కేవలం ఢిల్లీకే పరిమితం చేయబోమని హెచ్చరించారు. నిరసన ప్రదర్శనలకు స్వయంగా సారథ్యం వహించేందుకు తానే రంగంలోకి దిగి దేశంలోని వివిధ రాష్ట్రాలు, ముఖ్య నగరాలను సందర్శిస్తానని ప్రకటించారు. ప్రతి రాష్ట్రంలోనూ స్థానిక విద్యార్థులు, యువతతో మమేకమై వారి సమస్యలపై క్షేత్రస్థాయిలో చైతన్యం తీసుకురానున్నట్లు వివరించారు.

రాష్ట్రాల వ్యాప్తంగా ఆందోళనలు నిర్వహించిన తర్వాత కూడా కేంద్ర ప్రభుత్వం స్పందించని పక్షంలో, దేశ నలుమూలలకు చెందిన లక్షలాది మంది విద్యార్థులు, అభ్యర్థులు మళ్లీ దేశ రాజధానికి కదలివస్తారని దీప్కే తెలిపారు. అందరినీ ఒకే వేదికపైకి తీసుకొచ్చి ఢిల్లీలో భారీ 'మహాధర్నా'కు శ్రీకారం చుడతామని వెల్లడించారు.  మహారాష్ట్రలోని ఛత్రపతి శంభాజీనగర్ (ఔరంగాబాద్) లోని తన నివాసానికి చేరుకున్న అనంతరం ఏర్పాటు చేసిన మీడియా సమావేశంలో ఆయన మాట్లాడుతూ.. ఇది కోట్ల మంది విద్యార్థుల జీవితాలు, దేశ భవితకు సంబంధించిన అంశమని, బాధ్యులపై కఠిన చర్యలు తీసుకునే వరకూ తాను వెనక్కి తగ్గేదే లేదని పునరుద్ఘాటించారు.

దేశంలోని ప్రస్తుత రాజకీయాలపై దీప్కే ఈ సందర్భంగా కీలక వ్యాఖ్యలు చేశారు. గత 10-12 సంవత్సరాలుగా భారతీయ రాజకీయాలు కేవలం హిందూ-ముస్లిం వంటి మతపరమైన అంశాలపైనే దృష్టి కేంద్రీకరించాయని, అయితే అటువంటి విభజన రాజకీయాలు దేశ యువతకు ఉద్యోగ అవకాశాలను కల్పించలేకపోయాయని ఆయన విమర్శించారు. అంతర్జాతీయ వేదికలపై రష్యా-ఉక్రెయిన్ యుద్ధాన్ని కూడా ఆపగలిగామని చెప్పుకునే ప్రధానమంత్రి నరేంద్ర మోదీ, స్వదేశంలో విద్యార్థుల జీవితాలను అతలాకుతలం చేస్తున్న పరీక్షల పేపర్ లీకేజీలను ఎందుకు అడ్డుకోలేకపోతున్నారని దీప్కే సూటిగా ప్రశ్నించారు.

ఇదే సమయంలో తమ సీజేపీ ఉద్యమాన్ని పొరుగు దేశాలైన బంగ్లాదేశ్, నేపాల్ వంటి ప్రాంతాల్లో ఇటీవల చోటుచేసుకున్న హింసాత్మక లేదా వ్యవస్థా వ్యతిరేక నిరసనలతో ముడిపెట్టవద్దని దీప్కే ప్రజలకు, ప్రభుత్వానికి విజ్ఞప్తి చేశారు. ఆయా దేశాల్లో జరిగిన పరిణామాలకు, తాము సాగిస్తున్న పోరాటానికి ఎలాంటి పోలిక లేదన్నారు. ఇది పూర్తిగా భారత రాజ్యాంగ పరిధిలో, ప్రజాస్వామ్యబద్ధంగా మరియు శాంతియుత మార్గంలో మాత్రమే సాగుతున్న పౌర ఉద్యమమని స్పష్టం చేశారు. ఎటువంటి హింసకు తావులేకుండా, క్రమశిక్షణతో కూడిన శాంతియుత మార్గంలోనే తమ హక్కులను కాపాడుకోవడానికి ఎందాకైనా వెళ్తామని ఆయన తేల్చిచెప్పారు.