పోలీసులకు రైల్వే షాక్.. టికెట్ లేకుంటే భారీ జరిమానా!

Railway: టికెట్ లేకుండా ప్రయాణించే వారిపై చర్యలు తీసుకునేందుకు భారతీయ రైల్వే శాఖ సిద్ధమైంది. మరో రెండు వారాల్లో దసరా పండుగ సీజన్ మొదలుకానుండగా.. టికెట్ లేని, అనధికారిక ప్రయాణికులను కట్టడి చేసేందుకు ప్రత్యేక డ్రైవ్ నిర్వహించనున్నట్లు తెలిపింది. ఈ మేరకు అక్టోబరు 1 నుంచి 15, అక్టోబరు 25 నుంచి నవంబరు 10 వరకు 17 జోన్ల జనరల్ మేనేజర్లకు ఇందుకు సంబంధించిన విధివిధానాలపై రైల్వేశాఖ లేఖలు పంపించింది. 

ఏసీ కోచ్ లలో వందలాది మంది పోలీసులు..

ఈ మేరకు తనిఖీల నివేదికలను నవంబరు 18 నాటికి పంపించాలని అధికారులకు సూచించింది. ముఖ్యంగా పోలీసులు టికెట్ లేకుండా ప్రయాణిస్తున్నట్లు రైల్వే కమర్షియల్ అధికారులు చెప్పారు. ఇటీవల గాజియాబాద్- కాన్పుర్ సెక్షన్లో తనిఖీలు చేపట్టగా.. వివిధ రైళ్లలోని ఏసీ కోచ్ లలో వందలాది మంది పోలీసులు టికెట్ లేకుండా ప్రయాణిస్తున్నట్లు వెల్లడించారు. అయితే వారందరికీ జరిమానా విధించినట్లు అధికారులు తెలిపారు. ఇక ఆర్టీఐ వివరాల ప్రకారం.. 2023-24 ఆర్థిక సంవత్సరంలో 3.61 కోట్ల మంది టికెట్ లేకుండా పట్టుబడ్డారు. వారి నుంచి రూ.2,231 కోట్లు వసూల్ చేసినట్లు రైల్వే శాఖ తెలిపింది.