Pahalgam : పహల్గాం గుండె మీద మానని గాయం... నిశ్చబ్ధం రాజ్యమేలుతున్న "బైసరన్‌'

Pahalgam : భూతల స్వర్గం కశ్మీర్.. ఈ పేరు వింటేనే మంచు కొండలు, అందమైన లోయలు గుర్తొస్తాయి. అందులోనూ పహల్గాం అంటే పర్యాటకులకి ఒక కల. ఎత్తైన కొండలు, మంచు ముసుగులు, గుర్రపు స్వారీలు.. అక్కడికి వెళ్తే లోకాన్ని మర్చిపోతాం. కానీ సరిగ్గా ఏడాది క్రితం.. పర్యాటకుల నవ్వులతో కళకళలాడాల్సిన ఆ లోయ, తుపాకుల మోతతో వణికిపోయింది. అమాయకుల రక్తంతో ఆ తెల్లని మంచు ప్రాంతం ఎర్రబడింది. ఆ విషాద ఘటనకు నేటితో ఏడాది పూర్తయింది. ఉగ్రవాదుల తూటాలకు అమాయకులు ప్రాణాలు విడిచారు. మరి ఇప్పుడక్కడ పరిస్థితి ఏంటి? ఆ గాయం మానేనా? పర్యాటకులు మళ్ళీ వస్తున్నారా? ఒకసారి గుర్తు చేసుకుందాం..

 అది 2025, ఏప్రిల్ 22. పహల్గాం పర్యాటకులతో కిక్కిరిసి ఉంది. అప్పుడే మినీ స్విట్జర్లాండ్‌గా పిలిచే బైసరన్‌ లోయ నుంచి పర్యాటకులు తిరిగి వస్తున్నారు.  సడన్‌గా ఉగ్రవాదులు విరుచుకుపడ్డారు. ఆ క్షణం.. ఏం జరుగుతుందో అర్థమయ్యేలోపే అంతా రక్తంమయమైంది. తల్లుల ఒడిలో పిల్లలు, భార్యల కళ్ల ముందే భర్తలు ప్రాణాలు వదిలారు. హాహాకారాలు.. రక్తపు మడుగులు.. నిమిషాల వ్యవధిలో అందరూ నేల కొరిగారు. ఆ ఒక్క దాడి ఎన్నో కుటుంబాల్లో తీరని శోకాన్ని మిగిల్చింది. ఆ దాడి నుంచి పహల్గాం ముఖచిత్రమే మారిపోయింది.

పహల్గాం వెళ్లే ప్రతి పర్యాటకుడు అడిగే మొదటి పేరు.. బైసరన్‌ . దీనినే మనం మినీ స్విట్జర్లాండ్ అంటాం. కానీ ఏడాది గడిచినా, ఆ దాడి జరిగిన ఈ ప్రాంతం ఇంకా తెరుచుకోలేదు. భద్రతా కారణాల వల్ల ప్రభుత్వం దీనిని ఇంకా మూసే ఉంచింది. దాడి తర్వాత మూతపడిన 50 పర్యాటక కేంద్రాలు ఇప్పుడిప్పుడే ఒక్కొక్కటిగా తెరుచుకుంటున్నా.. పహల్గాం గుండెకాయ లాంటి బైసరన్‌ మాత్రం ఇంకా నిశ్శబ్దంగానే ఉంది.

ఈ దాడి ప్రభావం కేవలం ప్రాణాల మీద మాత్రమే కాదు, అక్కడ బతికే వేల కుటుంబాల మీద పడింది. దాడికి ముందు పహల్గాంకు ఏడాదికి 10 లక్షల మందికి పైగా పర్యాటకులు వచ్చేవారు. కానీ దాడి తర్వాత ఆ సంఖ్య 4లక్షల 30వేల 495కి పడిపోయింది. అంటే సగానికి పైగా పర్యాటకం దెబ్బతింది.  ఒకప్పుడు రోజుకు 3వేల నుంచి 4,500 మంది వచ్చే చోట.. ఇప్పుడు పర్యాటకుల కోసం హోటల్ యజమానులు, దుకాణదారులు ఎదురుచూడాల్సిన పరిస్థితి ఏర్పడింది.

 పరిస్థితులు చక్కదిద్దడానికి ప్రభుత్వం గట్టి చర్యలే తీసుకుంటోంది. భద్రతను పటిష్టం చేయడంలో భాగంగా.. ఇప్పుడు అక్కడ కొత్తగా క్యూఆర్‌ కోడ్ వ్యవస్థను అమల్లోకి తెచ్చారు. అక్కడ సేవలందించే ప్రతి వ్యాపారికి, గుర్రపు యజమానికి ఒక QR కోడ్ ఉంటుంది.  పర్యాటకులను, స్థానికులను సులభంగా గుర్తించడానికి, భద్రతను పర్యవేక్షించడానికి ఇది ఉపయోగపడుతుంది. టెక్నాలజీ సాయంతో పర్యాటకుల్లో భరోసా నింపే ప్రయత్నం జరుగుతోంది.
-- "అయితే, ఈ ఏడాది కాలంలో భారత్ కేవలం కన్నీరు పెట్టుకుంటూ కూర్చోలేదు. ఉగ్రవాదులు చేసిన ప్రతి గాయానికి బదులు తీర్చుకోవడానికి, కాశ్మీర్‌లో శాంతిని శాశ్వతం చేయడానికి భారత సైన్యం **'ఆపరేషన్ సిందూర 2.0'**కు సిద్ధమవుతోంది.లోయలో దాక్కున్న ఉగ్రవాదులను ఏరిపారేయడమే లక్ష్యంగా ఈ ఆపరేషన్ సాగనుంది.

అత్యాధునిక నిఘా వ్యవస్థలు, పక్కా ఇంటెలిజెన్స్‌తో సరిహద్దులను సైన్యం జల్లెడ పడుతోంది.పర్యాటకుల ప్రాణాలతో ఆడుకునే ఏ శక్తినైనా సరే మట్టి కరిపిస్తామనే హెచ్చరికను ఈ ఆపరేషన్ ద్వారా భారత్ పంపుతోంది. ఉగ్రవాదుల గుండెల్లో వణుకు పుట్టిస్తూ, కాశ్మీర్ గడ్డపై మునుపటి ప్రశాంతతను తీసుకురావడమే ఈ ఆపరేషన్ సిందూర 2.0 ప్రధాన ఉద్దేశ్యం."

పహల్గాం ఉగ్ర దాడికి ఏడాది పూర్తయిన సందర్భంగా భారత సైన్యం స్పందించింది. మానవత్వపు సరిహద్దులు దాటినప్పుడు స్పందన నిర్ణయాత్మకంగానే ఉంటుంది. న్యాయం జరుగుతుంది. భారత్‌ ఐక్యంగా నిలుస్తుంది అంటూ అని ఎక్స్‌లో ట్వీట్ చేసింది.  దీంతోపాటు కొన్ని సరిహద్దులను ఎప్పటికీ అతిక్రమించలేరు అనే క్యాప్షన్‌తో ఓ ఫొటోను కూడా పోస్ట్ చేసింది. 

 చివరగా పహల్గాం.. ఇది కేవలం ఒక పర్యాటక ప్రాంతం కాదు, లక్షలాది మంది భారతీయుల భావోద్వేగం. ఏడాది క్రితం మినీ స్విట్జర్లాండ్‌లో ఆగిపోయిన కాలం.. మళ్ళీ పరుగు తీయాలి. ప్రకృతి ఎప్పుడూ ఓడిపోదు, మనుషుల సంకల్పం ముందు ఉగ్రవాదం నిలవదు. మూతపడిన ఆ ఇనుప గేట్లు మళ్ళీ తెరుచుకోవాలి. మంచు ముక్కలతో ఆడుకునే పిల్లల నవ్వులు ఆ కొండల్లో ప్రతిధ్వనించాలి. ఈ మౌనం శాశ్వతం కాదు.. భయం పారిపోవాల్సిందే, శాంతి.. గెలవాల్సిందే. ఆనాడు ప్రాణాలు కోల్పోయిన అమాయకుల ఆత్మలకు శాంతి కలగాలంటే.. మనం ఐక్యంగా ఉండాలి. ఇప్పుడిప్పుడే పర్యాటకులు మళ్ళీ ధైర్యంగా అడుగు వేస్తున్నారు. వ్యాపారులు ఆశగా ఎదురుచూస్తున్నారు. బైసరన్‌ గేట్లు త్వరలోనే తెరుచుకోవాలని, ఆ లోయలో మళ్ళీ పర్యాటకుల కేరింతలు వినిపించాలని కోరుకుందాం. ఆపరేషన్ సిందూర్ ధైర్యంతో ముందుకెళ్తున్న మన సైన్యానికి మద్దతుగా నిలబడదాం.