Blood Donation: రక్తదానం చేసిన 24 గంటల్లో శరీరంలో ఏం జరుగుతోందో తెలుసా?

Blood Donation: రక్తదానం అనేది ఎంతో గొప్ప పని. ఒకరి రక్తం మరొకరి ప్రాణాలను కాపాడగలదు. శస్త్రచికిత్సలు, ప్రమాదాలు లేదా కొన్ని ఆరోగ్య సమస్యల సమయంలో రక్తం చాలా అవసరం అవుతుంది. అయినప్పటికీ, మొదటిసారి రక్తదానం చేసే వారిలో కొంత భయం, సందేహాలు ఉంటాయి. అయితే వైద్యుల ప్రకారం రక్తదానం పూర్తిగా సురక్షితం. రక్తం ఇచ్చిన వెంటనే మన శరీరం కోలుకునే పనిని ప్రారంభిస్తుంది.

రక్తంలో ప్లాస్మా అనే లిక్విడ్ భాగం ఉంటుంది. రక్తదానం చేసిన తర్వాత శరీరం ముందుగా ఈ భాగాన్ని తిరిగి భర్తీ చేయడానికి ప్రయత్నిస్తుంది. సాధారణంగా ఆరోగ్యంగా ఉన్న వ్యక్తుల్లో 24 నుంచి 48 గంటలలోపు ప్లాస్మా మళ్లీ సాధారణ స్థాయికి చేరుకుంటుంది.

శరీరంలోని ఇతర కణజాలాల్లో ఉన్న లిక్విడ్స్ రక్తనాళాల్లోకి చేరి రక్త పరిమాణాన్ని నిలబెడతాయి. అలాగే లింఫాటిక్ వ్యవస్థ కూడా తనలో నిల్వ ఉన్న లిక్విడ్లను, ప్రోటీన్లను రక్తంలోకి పంపిస్తుంది. మూత్రపిండాలు నీటిని ఆదా చేస్తాయి. మెదడు దాహం ఎక్కువగా కలిగేలా సంకేతాలు ఇస్తుంది. దీంతో మనం ఎక్కువ నీరు తాగుతాం. ఈ చర్యలన్నీ కలిసి రక్త పరిమాణాన్ని త్వరగా పునరుద్ధరిస్తాయి.

ప్లాస్మా త్వరగా భర్తీ అయినా, ఎర్ర రక్త కణాలు పూర్తిగా తిరిగి తయారవడానికి కొన్ని వారాలు పడుతుంది. అయితే తెల్ల రక్త కణాలు, ప్లేట్‌లెట్లు మాత్రం వేగంగా కోలుకుంటాయి. రక్తదానం చేసిన వెంటనే ఎముకల లోపలి భాగంలో ఉండే మృదువైన కణాల తయారీని ప్రారంభిస్తుంది. కొన్ని రోజుల్లో లేదా వారం రోజుల్లో ఇవి సాధారణ స్థాయికి చేరుకుంటాయి.

తల తిరగడం ఎందుకు జరుగుతుంది?

రక్తదానం చేసిన తర్వాత కొందరికి అలసట, తల తిరగడం లేదా బలహీనంగా అనిపించవచ్చు. రక్త పరిమాణం తాత్కాలికంగా తగ్గడం వల్ల ఇలా జరుగుతుంది. కొన్ని సందర్భాల్లో శరీరంలోని నరాల స్పందన కారణంగా గుండె వేగం తగ్గి, మెదడుకు రక్తప్రసరణ కొద్దిసేపు తగ్గవచ్చు.

ముఖ్యంగా మొదటిసారి రక్తదానం చేసే వారు, యువకులు లేదా శరీర బరువు తక్కువగా ఉన్నవారిలో ఈ సమస్యలు కొంచెం ఎక్కువగా కనిపించవచ్చు. అలాగే నీరు తక్కువ తాగడం, భోజనం చేయకుండా రావడం, నిద్ర సరిగా లేకపోవడం కూడా కారణాలు కావచ్చు.

రక్తదానం తర్వాత ఏమి చేయాలి?

రక్తదానం చేసిన తర్వాత తగినంత నీరు తాగాలి. తేలికపాటి ఆహారం తీసుకోవాలి. కొంతసేపు విశ్రాంతి తీసుకుంటే శరీరం త్వరగా కోలుకుంటుంది. అలాగే ఐరన్ ఎక్కువగా ఉండే ఆహారాలు తీసుకోవడం వల్ల ఎర్ర రక్త కణాలు వేగంగా తయారవుతాయి.

రక్తదానం చేసిన తర్వాత మొదటి 24 గంటల్లోనే శరీరం అనేక మార్పులు చేసి కోలుకునే ప్రక్రియను ప్రారంభిస్తుంది. రక్తంలోని లిక్విడ్ భాగం భర్తీ అవుతుంది. కొత్త రక్త కణాల తయారీ మొదలవుతుంది. గుండె, మెదడు, మూత్రపిండాలు, కాలేయం వంటి అవయవాలు కలిసి పనిచేసి శరీరాన్ని మామూలు స్థితికి తీసుకువస్తాయి. అందుకే ఆరోగ్యంగా ఉన్న వ్యక్తులకు రక్తదానం సాధారణంగా సురక్షితమైనదిగా వైద్యులు చెబుతున్నారు.