శాంతి చర్చల వేళ మరోసారి పశ్చిమాసియాలో ఉద్రిక్తత.. గగనతలంలో అమెరికా, ఇరాన్‌ బిగ్‌ ఫైట్‌

పశ్చిమాసియాలో అమెరికా-ఇరాన్‌ల మధ్య కొద్దిరోజులుగా కొనసాగుతున్న ఉద్రిక్తతలు సరికొత్త మలుపు తిరిగాయి. ఒకవైపు ఇరు దేశాల మధ్య కీలకమైన శాంతి చర్చలు జరుగుతుండగానే.. మరోవైపు ఆకాశంలో డ్రోన్ల కూల్చివేతలు, భూమిపై అణు అస్త్రాల నియంత్రణకు సంబంధించిన హెచ్చరికలతో ఇరు పక్షాల మధ్య మాటల యుద్ధం ముదిరింది.  

అమెరికా అత్యాధునిక 'రీపర్' డ్రోన్‌ను కూల్చేసిన ఇరాన్

అమెరికా సైన్యానికి చెందిన అత్యంత ప్రతిష్టాత్మక, బిలియన్ డాలర్ల విలువైన ఎంక్యూ-9 రీపర్ (MQ-9 Reaper) డ్రోన్‌ను తాము విజయవంతంగా కూల్చివేసినట్లు ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) అధికారికంగా ప్రకటించింది.తమ దేశ గగనతలంలోకి ప్రవేశించినందుకు గానూ ఈ చర్య తీసుకున్నట్లు ఇరాన్ తెలిపింది. అంతేకాకుండా, అమెరికాకు చెందిన ఆర్‌క్యూ-4 డ్రోన్, ఎఫ్‌-35 యుద్ధ విమానాలపై కూడా తాము కాల్పులు జరిపామని వెల్లడించింది. టెహ్రాన్‌లోని పలు ప్రాంతాలపై అమెరికా గతంలో జరిపిన దాడులకు ప్రతీకారంగానే ఈ చర్యలు తీసుకున్నట్లు ఐఆర్‌జీసీ స్పష్టం చేసింది.

మొజ్తాబా ఖమేనీ హెచ్చరిక...

ఇరాన్ సుప్రీం లీడర్ మొజ్తాబా ఖమేనీ అమెరికాను తీవ్రంగా హెచ్చరిస్తూ.. "శాంతి ఒప్పందంపై చర్చలు నడుస్తున్న తరుణంలో అమెరికా దాడులకు దిగితే సహించేది లేదు. ఇకపై పశ్చిమాసియాలో అమెరికా సైనిక స్థావరాలకు ఏ ప్రదేశమూ సురక్షితం కాదు. ఒకవేళ డొనాల్డ్ ట్రంప్ సైనిక చర్యలను తిరిగి ప్రారంభిస్తే.. యూఎస్ బలగాలపై మరిన్ని ఆశ్చర్యకరమైన దాడులు ఎదురవుతాయి" అని పేర్కొన్నారు. తన తండ్రి అయతుల్లా ఖమేనీ మరణం తర్వాత కూడా దేశ రక్షణ విషయంలో వెనక్కి తగ్గేదే లేదని ఆయన స్పష్టం చేశారు.

అమెరికాకు భారీ నష్టం..

ఇరాన్ దాడుల కారణంగా అమెరికా రక్షణ శాఖ (పెంటగాన్) తన డ్రోన్ నిల్వల్లో దాదాపు 20 శాతం నష్టపోయినట్లు అంతర్జాతీయ మీడియా కథనాలు వెల్లడిస్తున్నాయి. ఈ ఘర్షణల్లో అమెరికా దాదాపు 30 డ్రోన్‌లను కోల్పోగా, అందులో ఎక్కువ భాగం గాల్లోనే కూలిపోయాయి, మరికొన్ని నేలపై క్షిపణి దాడుల్లో ధ్వంసమయ్యాయి. ఒక్కో ఎంక్యూ-9 రీపర్ డ్రోన్ తయారీకి సుమారు 30 మిలియన్ డాలర్ల వరకు ఖర్చవుతుంది. ప్రస్తుతం వీటి ఉత్పత్తి నిలిచిపోవడం అమెరికాకు గట్టి ఎదురుదెబ్బగా మారింది. అయితే, తాము ఉద్దేశపూర్వకంగా దాడులు చేయడం లేదని, సముద్రంలో మందుపాతరలు వేస్తున్న బోట్లను, ఇరాన్ క్షిపణి లాంచ్ ప్యాడ్‌లను లక్ష్యంగా చేసుకుని ఆత్మరక్షణ కోసమే దాడులు చేస్తున్నట్లు అమెరికా అధికారులు సమర్థించుకుంటున్నారు.

యురేనియం అప్పగించాల్సిందే: ఇరాన్‌కు డొనాల్డ్ ట్రంప్ అల్టిమేటం

ఈ సాయుధ ఘర్షణల మధ్యే.. అమెరికా-ఇరాన్ శాంతి చర్చల్లో అణు కార్యక్రమం అత్యంత కీలకమైన వివాదాస్పద అంశంగా మారింది. ఇరాన్ వద్ద నిల్వ ఉన్న శుద్ధి చేసిన యురేనియంపై అమెరికా అధ్యక్షుడు డొనాల్డ్ ట్రంప్ అత్యంత కఠినమైన హెచ్చరికలు జారీ చేశారు.ఇరాన్ వద్ద ఉన్న అధికంగా శుద్ధి చేసిన యురేనియం (Enriched Uranium) మొత్తాన్ని వెంటనే అమెరికాకు అప్పగించాలి, లేదా అంతర్జాతీయ పర్యవేక్షణలో దానిని పూర్తిగా నాశనం చేయాలి. ఇరాన్ అణు కార్యక్రమం ప్రపంచ శాంతికి ముప్పుగా మారుతోందని, శుద్ధి చేసిన యురేనియం ద్వారా అణ్వాయుధాల తయారీ సులువవుతుందని ట్రంప్ ఆందోళన వ్యక్తం చేశారు. అమెరికా జాతీయ భద్రత కోసం అవసరమైతే మరిన్ని కఠిన నిర్ణయాలు తీసుకుంటామని హెచ్చరించారు.

ఇరాన్ అంతర్గత మథనం..

మరోవైపు, తాము అణ్వాయుధాల తయారీ కోసం ప్రయత్నించడం లేదని ఇరాన్ అధ్యక్షుడు మసౌద్ పెజెష్కియాన్ స్పష్టం చేసినప్పటికీ, తమ సార్వభౌమత్వానికి గుర్తింపుగా ఉన్న యురేనియం నిల్వలను పూర్తిగా వదులుకోవడానికి ఇరాన్ అంగీకరించడం లేదని తెలుస్తోంది.ఒకవైపు ఆకాశంలో డ్రోన్ల యుద్ధం, మరోవైపు అణు నిల్వలపై ట్రంప్ అల్టిమేటాల మధ్య పశ్చిమాసియాలో శాంతి చర్చలు సఫలమవుతాయా లేదా అనేది ఇప్పుడు ప్రపంచవ్యాప్తంగా ఉత్కంఠ రేపుతోంది.