International tensions : కొనసాగుతున్న అంతర్జాతీయ ఉద్రిక్తతలు..ఉక్రెయిన్‌ పై రష్యా బాంబుల వర్షం...అఫ్గాన్‌ పై పాక్‌ దాడి

International tensions : 

అంతర్జాతీయంగా నెలకొన్న యుద్ధ వాతావరణం ఇప్పట్లో ముగిసేలా లేదు. ఒకవైపు ఇరాన్‌, అమెరికా యుద్ధం ముగించి శాంతి చర్చలకు సిద్ధమవుతుంటే మరోవైపు రష్యా, ఉక్రెయిన్‌, అఫ్గానిస్థాన్‌, పాకిస్థాన్‌ ల మధ్య ఉద్రిక్తలు కొనసాగు తున్నాయి.  ఉక్రెయిన్‌పై రష్యా చేసిన దాడిలో ఇద్దరు, అఫ్గానిస్థాన్‌ పై పాక్‌ చేసిన దాడుల్లో ఏడుగురు మరణించారు.

రష్యా-ఉక్రెయిన్ యుద్ధం

  రష్యా-ఉక్రెయిన్ యుద్ధంలో భాగంగా ఉక్రెయిన్‌లోని దక్షిణ నగరమైన ఒడెసాపై రష్యా బలగాలు సోమవారం తెల్లవారుజామున డ్రోన్లతో భీకర దాడులకు పాల్పడ్డాయి. ఈ దాడిలో ఇద్దరు పౌరులు ప్రాణాలు కోల్పోగా, మరో 14 మంది తీవ్రంగా గాయపడ్డారు. బాధితుల్లో ఇద్దరు చిన్న పిల్లలు కూడా ఉన్నారని అధికారులు ధృవీకరించారు. ముఖ్యంగా నివాస సముదాయాలు మరియు సాధారణ పౌర మౌలిక సదుపాయాలే లక్ష్యంగా ఈ దాడులు జరగడం కలకలం రేపుతోంది. మరోవైపు రష్యా ఆక్రమిత ఖేర్సన్ ప్రాంతంలో జరిగిన ఇతర దాడుల్లో కూడా ఇద్దరు వ్యక్తులు మరణించినట్లు సమాచారం అందుతోంది.

గత వారం రోజులుగా రష్యా తన వైమానిక దాడులను విపరీతంగా పెంచింది. ఈ స్వల్ప కాలంలోనే సుమారు 1,900 డ్రోన్లు, 1,400 గైడెడ్ బాంబులు, 60 క్షిపణులను రష్యా ఉక్రెయిన్ భూభాగంపై ప్రయోగించినట్లు ఉక్రెయిన్ అధికారిక వర్గాలు వెల్లడించాయి. దీనికి ప్రతిచర్యగా ఉక్రెయిన్ కూడా తన వ్యూహాలను పదును పెట్టింది. రష్యా ఆర్థిక మూలాలను దెబ్బతీసే లక్ష్యంతో, ఆ దేశంలోని లోతట్టు ప్రాంతాల్లో ఉన్న చమురు శుద్ధి కర్మాగారాలను లక్ష్యంగా చేసుకుని ఉక్రెయిన్ నిరంతరాయంగా ఎదురుదాడులు చేస్తోంది. ఇరు దేశాల మధ్య దాడులు, ప్రతిదాడులతో యుద్ధం మరింత తీవ్ర రూపం దాలుస్తోంది.

అఫ్గాన్‌ పై పాక్‌ దాడి

అఫ్గానిస్థాన్‌లోని అసాదాబాద్‌ నగరంలో ఉన్న సయ్యద్‌ జమాలుద్దీన్‌ అఫ్గానీ యూనివర్సిటీపై సోమవారం పాకిస్థాన్ క్షిపణులు, మోర్టార్లతో విరుచుకుపడిందని అఫ్గాన్ ప్రభుత్వం వెల్లడించింది. ఈ భీకర దాడుల కారణంగా ఏడుగురు పౌరులు ప్రాణాలు కోల్పోగా, మరో 85 మంది తీవ్రంగా గాయపడ్డారు. బాధితుల్లో అత్యధికులు విశ్వవిద్యాలయానికి చెందిన విద్యార్థులు మరియు ప్రొఫెసర్లు ఉన్నట్లు అధికారులు ధృవీకరించారు. విద్యాసంస్థనే లక్ష్యంగా చేసుకుని జరిగిన ఈ దాడిపై అఫ్గాన్ తీవ్ర నిరసన వ్యక్తం చేస్తోంది.

అయితే, అఫ్గానిస్థాన్ చేస్తున్న ఈ ఆరోపణలను పాకిస్థాన్ ప్రభుత్వం పూర్తిగా తోసిపుచ్చింది. తాము అఫ్గాన్ భూభాగంపై ఎటువంటి దాడులు చేయలేదని, అఫ్గాన్ చెబుతున్న మాటల్లో వాస్తవం లేదని పాక్ స్పష్టం చేసింది. సరిహద్దుల్లో ఉద్రిక్తతలు పెరుగుతున్న నేపథ్యంలో, ఈ దాడి ఘటన ఇరు దేశాల మధ్య దౌత్యపరమైన వివాదానికి దారితీసింది. పౌరులే లక్ష్యంగా దాడులు జరగడం పట్ల మానవ హక్కుల సంఘాలు ఆందోళన వ్యక్తం చేస్తున్నాయి