Ustaad Bhagat Singh OTT: థియేటర్లలో డిజాస్టర్.. మరి ఓటీటీ సంగతేంటి..? 'ఉస్తాద్ భగత్ సింగ్' స్ట్రీమింగ్ షురూ..!

Ustaad Bhagat Singh OTT: పవర్ స్టార్ పవన్ కళ్యాణ్ నటించిన యాక్షన్ సినిమా ‘ఉస్తాద్ భగత్ సింగ్’ ఇప్పుడు ఓటీటీలోకి వచ్చింది. ఈ చిత్రం ఏప్రిల్ 16, 2026 నుండి నెట్‌ఫ్లిక్స్‌లో స్ట్రీమింగ్ అవుతోంది. థియేటర్లలో విడుదలైన ఐదు వారాల తర్వాత ఈ సినిమా డిజిటల్ ప్లాట్‌ఫారమ్‌లో ప్రేక్షకుల ముందుకు వచ్చింది.

మార్చి 19, 2026న విడుదలైన ఈ సినిమా మొదట భారీ అంచనాల మధ్య ప్రేక్షకుల ముందుకు వచ్చింది. హరీష్ శంకర్ దర్శకత్వంలో వచ్చిన ఈ సినిమా పై అభిమానులు చాలా ఆశలు పెట్టుకున్నారు. ‘గబ్బర్ సింగ్’ తర్వాత ఈ ఇద్దరి కాంబినేషన్‌లో వస్తున్న సినిమా కావడంతో మరింత హైప్ ఏర్పడింది. కానీ థియేటర్లలో ఈ సినిమా ఆశించిన స్థాయిలో విజయాన్ని సాధించలేకపోయింది. కథ బలహీనంగా ఉండటం, కొన్ని సీన్లు ప్రేక్షకులకు నచ్చకపోవడం వల్ల మిక్స్‌డ్ రెస్పాన్స్ వచ్చింది.

Ustaad ochhadu ante Ugadi malli ochinatte 😎🚨 pic.twitter.com/rYGEDgGLyG

— Netflix India South (@Netflix_INSouth) April 16, 2026

అయినా కూడా ఈ సినిమాకు ఓటీటీలో మంచి డిమాండ్ ఏర్పడింది. నెట్‌ఫ్లిక్స్ ఈ సినిమా డిజిటల్ హక్కులను భారీ మొత్తానికి తీసుకున్నట్లు సమాచారం. తెలుగు మాత్రమే కాకుండా హిందీ, తమిళం, కన్నడ, మలయాళ భాషల్లో కూడా ఈ సినిమా అందుబాటులో ఉంది. దీంతో దేశవ్యాప్తంగా ప్రేక్షకులు ఈ సినిమాను చూడగలుగుతున్నారు.

ఈ సినిమాలో పవన్ కళ్యాణ్ ఒక పోలీస్ ఆఫీసర్ పాత్రలో కనిపిస్తారు. సమాజంలో జరిగే అన్యాయాలపై పోరాడే పాత్రలో ఆయన నటించారు. ఆయన స్టైల్, డైలాగులు అభిమానులకు బాగా నచ్చే విధంగా ఉన్నాయి. దేవిశ్రీ ప్రసాద్ ఇచ్చిన పాటలు, సంగీతం సినిమాకు మంచి బలం ఇచ్చాయి. ముఖ్యంగా  పవన్ కళ్యాణ్ తొలిప్రేమ సినిమాలోని 'ఈ మనసే' పాటను మళ్ళీ ఈ సినిమాలో వాడడం ప్రేక్షకులను బాగా ఆకట్టుకుంది. అలాగే శ్రీలీల, రాశీ ఖన్నా పాత్రలు కూడా ప్రేక్షకులను ఆకట్టుకుంటాయి.

థియేటర్లలో సినిమా ఆశించిన స్థాయిలో రాణించకపోయినా, ఓటీటీలో మాత్రం పరిస్థితి మారే అవకాశం ఉంది. ఇంట్లో కూర్చుని చూసే ప్రేక్షకులకు సినిమా నచ్చే అవకాశం ఉంది. ముఖ్యంగా పవన్ కళ్యాణ్ అభిమానులు ఈ సినిమాను మళ్ళీ చూడాలని భావిస్తున్నారు.

ఇప్పటికే సోషల్ మీడియాలో ఈ సినిమాపై చర్చ మొదలైంది. థియేటర్లలో వచ్చిన విమర్శలు ఓటీటీలో కూడా కొనసాగుతాయా లేదా కొత్తగా మంచి టాక్ వస్తుందా అనేది చూడాలి. దర్శకుడు హరీష్ శంకర్ ఈసారి విమర్శలను ఎలా తీసుకుంటారో కూడా ఆసక్తికరంగా మారింది.

మొత్తానికి ‘ఉస్తాద్ భగత్ సింగ్’ సినిమా ఇప్పుడు ఓటీటీలో కొత్త పరీక్షను ఎదుర్కొంటోంది. థియేటర్లలో మిస్ అయిన వారు ఇప్పుడు ఈ సినిమాను నెట్‌ఫ్లిక్స్‌లో చూసి తమ అభిప్రాయం చెప్పే అవకాశం ఉంది. ఈ సినిమా ఓటీటీలో మంచి రెస్పాన్స్ తెచ్చుకుంటే, సినిమాపై ఉన్న అభిప్రాయం మారే అవకాశం కూడా ఉంది.