Mr. Work From Home: మోడీ ఐడియాతో వచ్చిన "మిస్టర్ వర్క్ ఫ్రమ్ హోమ్".. ఎలా ఉందంటే..?

Mr. Work From Home: ఇటీవల ప్రధాని నరేంద్ర మోదీ వర్క్ ఫ్రమ్ హోమ్, గ్రామీణ అభివృద్ధి, వ్యవసాయ టెక్నాలజీ గురించి మాట్లాడిన నేపథ్యంలో టాలీవుడ్‌లో తాజాగా ఒక కొత్త కాన్సెప్ట్‌ తో తెరకెక్కిన సినిమా ఒకటి అందుకు ప్రేరణగా నిలిచింది. అదే దర్శకుడు మధుదీప్ చెలికాని తెరకెక్కించిన మిస్టర్ వర్క్ ఫ్రమ్ హోమ్ సినిమా.. ఈ మూవీ తాజాగా విడుదలయింది. యువ హీరో త్రిగుణ్, హీరోయిన్ పాయల్ రాధాకృష్ణ జంటగా నటించిన ఈ మూవీకి రిలీజ్‌కు ముందే ట్రైలర్, పాటల ద్వారా మంచి బజ్ వచ్చింది. ముఖ్యంగా టైటిల్‌తోనే ప్రేక్షకుల్లో ఆసక్తి పెంచిన ఈ సినిమా అంచనాలను అందుకుందా లేదా ఇప్పుడు చూద్దాం.

కథ ఏమిటంటే?

అరవింద్ (త్రిగుణ్) అమెరికాలో మంచి జీతంతో సాఫ్ట్‌వేర్ ఉద్యోగం చేస్తుంటాడు. కానీ ఆ జీవితానికి బోర్ కొట్టడంతో స్వదేశానికి తిరిగి వస్తాడు. కేవలం ఉద్యోగం కోసం కాకుండా సమాజానికి ఉపయోగపడే పని చేయాలని నిర్ణయించుకుంటాడు. రసాయన ఎరువుల వల్ల భూములు నాశనం అవుతున్నాయని, ఆ పంటలు తినడం వల్ల మనుషుల ఆరోగ్యం కూడా దెబ్బతింటోందని అతను గుర్తిస్తాడు.

దీంతో ఆర్గానిక్ వ్యవసాయం వైపు అడుగులు వేస్తాడు. రైతులకు కొత్త టెక్నాలజీ పరిచయం చేస్తూ, తక్కువ ఖర్చుతో ఎక్కువ లాభం వచ్చేలా ప్రయత్నిస్తాడు. రైతులకు సహాయం చేయడానికి ‘మిస్టర్ వర్క్ ఫ్రమ్ హోమ్’ అనే యాప్ కూడా రూపొందిస్తాడు.

ఈ ప్రయాణంలో మహి (పాయల్ రాధాకృష్ణ)తో ప్రేమలో పడతాడు. అయితే ఉద్యోగం లేని వ్యక్తిని పెళ్లి చేసుకోనని మహి అతని ప్రేమను తిరస్కరిస్తుంది. తర్వాత అరవింద్ తన లక్ష్యాన్ని సాధించాడా? రైతుల జీవితాల్లో మార్పు తీసుకొచ్చాడా? మహి తిరిగి అతని ప్రేమను అంగీకరించిందా? అనేదే సినిమా కథ.

సినిమా ఎలా ఉంది?

దర్శకుడు మధుదీప్ చెలికాని మంచి కాన్సెప్ట్‌ను ఎంచుకున్నాడు. సాధారణంగా ‘వర్క్ ఫ్రమ్ హోమ్’ అంటే ఐటీ ఉద్యోగుల కథ అనుకుంటారు. కానీ ఈ సినిమాలో ఆ కాన్సెప్ట్‌ను వ్యవసాయానికి కలిపి చూపించడం కొత్తగా అనిపిస్తుంది.

ప్రస్తుతం చాలా మంది చిన్న వయసులోనే షుగర్, బీపీ, గుండె జబ్బులతో బాధపడుతున్నారు. దీనికి కారణం మనం తీసుకుంటున్న ఆహారమే అని సినిమాలో చెప్పే ప్రయత్నం చేశారు. పాతకాలంలో మన పెద్దలు సహజ పద్ధతుల్లో పండించిన ఆహారం తినేవారని, అందుకే ఆరోగ్యంగా ఉండేవారని చూపించారు.

సినిమాలో చిరుధాన్యాల ప్రాముఖ్యత, ఆర్గానిక్ వ్యవసాయం అవసరం, రైతుల సమస్యలను బాగా చూపించారు. భూములు పాడవడంతో రైతులు వాటిని ప్లాట్లుగా అమ్మేస్తున్న విషయాన్ని కూడా టచ్ చేశారు.

కొన్ని సన్నివేశాలు ప్రేక్షకులను ఆలోచింపజేస్తాయి. ముఖ్యంగా రైతుల జీవితం, టెక్నాలజీ ద్వారా వ్యవసాయంలో మార్పులు తీసుకురావడం వంటి అంశాలు బాగున్నాయి. కొన్ని చోట్ల కథనం కాస్త నెమ్మదిగా సాగినా మొత్తం మీద సినిమా మెసేజ్ బాగుంది.

‘మహర్షి’ సినిమాను గుర్తు చేస్తుందా?

సూపర్ స్టార్ మహేష్ బాబు నటించిన మహర్షి సినిమాలో రైతుల కష్టాలను చూపించిన విషయం తెలిసిందే. ‘మిస్టర్ వర్క్ ఫ్రమ్ హోమ్’ కూడా అదే తరహాలో రైతుల గురించి మాట్లాడుతుంది. కానీ ఇందులో టెక్నాలజీ, యాప్ కాన్సెప్ట్‌ను జోడించడం ప్రత్యేకంగా నిలిచింది.

ఇటీవల ప్రధాని నరేంద్ర మోదీ కూడా వర్క్ ఫ్రమ్ హోమ్, గ్రామీణ అభివృద్ధి, వ్యవసాయ టెక్నాలజీ గురించి మాట్లాడిన నేపథ్యంలో ఈ సినిమా మరింత ప్రాధాన్యం సంపాదించింది.

నటీనటుల నటన

త్రిగుణ్ ఈ సినిమాలో చాలా ఎనర్జీతో నటించాడు. కొన్ని సన్నివేశాల్లో అతని స్టైల్ హీరో రామ్ పోతినేనిను గుర్తు చేస్తుంది. ముఖ్యంగా ఎమోషనల్ సీన్స్‌లో మంచి నటన కనబరిచాడు.

పాయల్ రాధాకృష్ణ స్క్రీన్‌పై అందంగా కనిపించింది. తన పాత్రకు తగ్గట్టుగా నటించింది. హీరో తండ్రి పాత్రలో అవినాష్ కురువిల్లా, హీరోకు మార్గం చూపించే పాత్రలో శివాజీ రాజా బాగా నటించారు.

టెక్నికల్‌గా ఎలా ఉంది?

సినిమాలో మ్యూజిక్, బ్యాక్‌గ్రౌండ్ స్కోర్ బాగున్నాయి. సినిమాటోగ్రఫీ కూడా ఆకట్టుకుంటుంది. గ్రామీణ వాతావరణాన్ని అందంగా చూపించారు. నిర్మాణ విలువలు కూడా మంచి స్థాయిలో ఉన్నాయి.

ప్లస్ పాయింట్స్

• మంచి మెసేజ్‌తో కూడిన కథ
• రైతుల సమస్యలను చూపించడం
• త్రిగుణ్ నటన
• ఆర్గానిక్ వ్యవసాయం కాన్సెప్ట్
• సంగీతం, విజువల్స్

మైనస్ పాయింట్స్

• కొన్ని చోట్ల నెమ్మదిగా సాగే కథనం
• కమర్షియల్ ఎలిమెంట్స్ కొద్దిగా తక్కువగా ఉండటం

మిస్టర్ వర్క్ ఫ్రమ్ హోమ్ కేవలం ఎంటర్‌టైన్‌మెంట్ సినిమా మాత్రమే కాదు. రైతులు, ఆరోగ్యం, సహజ వ్యవసాయం గురించి ఆలోచింపజేసే సినిమా. టెక్నాలజీని సరైన విధంగా ఉపయోగిస్తే రైతుల జీవితాల్లో మార్పు తీసుకురాగలమని చెప్పే మంచి ప్రయత్నం. కుటుంబంతో కలిసి ఒకసారి తప్పక చూడదగిన చిత్రం.