Google AI Data Centre: విశాఖ చరిత్రలో సరికొత్త అధ్యాయం.. గూగుల్‌ ఏఐ డేటా సెంటర్‌కు శంకుస్థాపన

Google AI Data Centre: ఆంధ్రప్రదేశ్ ఐటీ రంగ చరిత్రలో ఏప్రిల్ 28, 2026 ఒక చారిత్రాత్మక దినంగా నిలిచిపోనుంది. విశాఖపట్నం జిల్లా ఆనందపురం మండలం తర్లువాడలో అంతర్జాతీయ ఐటీ దిగ్గజం 'గూగుల్' ఏర్పాటు చేయనున్న మెగా ఏఐ డేటా సెంటర్‌కు ముఖ్యమంత్రి నారా చంద్రబాబు నాయుడు, కేంద్ర మంత్రి అశ్విని వైష్ణవ్ కలిసి భూమి పూజ చేశారు. సుమారు రూ.1.35 లక్షల కోట్ల భారీ పెట్టుబడితో (15 బిలియన్ డాలర్లు) నిర్మించనున్న ఈ ప్రాజెక్టు, భారతదేశంలోనే అతిపెద్ద విదేశీ ప్రత్యక్ష పెట్టుబడులలో ఒకటిగా నిలవడమే కాకుండా, విశాఖను ఆసియా ఖండంలోనే అత్యున్నత ఏఐ, కనెక్టివిటీ హబ్‌గా మార్చనుంది.

ఈ భారీ ప్రాజెక్టును గూగుల్ సంస్థ అదానీ కనెక్స్ ,భారతీ ఎయిర్‌టెల్‌ భాగస్వామ్యంతో అభివృద్ధి చేస్తోంది. విశాఖపట్నం, అనకాపల్లి జిల్లాల పరిధిలో మొత్తం 600 ఎకరాల విస్తీర్ణంలో మూడు క్యాంపస్‌లుగా దీనిని నిర్మిస్తున్నారు. ఇందులో భాగంగా తర్లువాడలో 266.6 ఎకరాలు, రాంబిల్లిలో 174.8 ఎకరాలు, అడవివరంలో 160 ఎకరాలను ప్రభుత్వం కేటాయించింది. 1 గిగావాట్ సామర్థ్యం కలిగిన ఈ డేటా సెంటర్ కేవలం సమాచార నిధిగా మాత్రమే కాకుండా, అత్యాధునిక ఏఐ వర్క్‌లోడ్స్, క్లౌడ్ సేవలకు ప్రపంచ స్థాయి మౌలిక వసతిగా ఉపయోగపడనుంది.

ఈ మెగా ప్రాజెక్టు ద్వారా ప్రత్యక్షంగా, పరోక్షంగా సుమారు 1.88 లక్షల మందికి పైగా యువతకు ఉద్యోగ అవకాశాలు లభిస్తాయని అంచనా. ఈ ప్రాజెక్టు కేవలం సాంకేతిక రంగానికే పరిమితం కాకుండా, స్థానిక ఆర్థిక వ్యవస్థకు భారీ ఊతాన్నివ్వనుంది. గూగుల్ సంస్థ స్థానిక యువతకు అడ్వాన్స్‌డ్ క్లౌడ్ మరియు ఏఐ రంగాలలో ప్రత్యేక శిక్షణ అందించడమే కాకుండా, 10 వేల మంది మహిళలను మైక్రో ఎంట్రప్రైజర్లుగా తీర్చిదిద్దేందుకు సహకారం అందిస్తామని ప్రకటించడం గమనార్హం.

విశాఖపట్నం భౌగోళికంగా సముద్ర తీరాన ఉండటం ఈ ప్రాజెక్టుకు ప్రధాన బలంగా మారింది. అంతర్జాతీయ సముద్రగర్భ కేబుల్స్ (Submarine Cables) ల్యాండింగ్ పాయింట్ ద్వారా విశాఖ నగరం తూర్పు తీరంలో కీలకమైన డిజిటల్ గేట్‌వేగా మారుతుంది. ముంబై, చెన్నై నగరాల సరసన విశాఖ కూడా గ్లోబల్ టెక్ మ్యాప్‌లో స్థిరపడనుంది. కొత్త ఫైబర్ ఆప్టిక్ లైన్లు మరియు ఇంటర్నేషనల్ సబ్ సీ గేట్ వేలు రాబోయే కాలంలో సాంప్రదాయ నౌకాయాన మార్గాలను డిజిటల్ ట్రేడ్ రూట్లుగా మారుస్తాయని గూగుల్ ప్రతినిధులు ఆశాభావం వ్యక్తం చేశారు.

పర్యావరణ హితంగా ఈ ప్రాజెక్టును తీర్చిదిద్దేందుకు గూగుల్ క్లీన్ ఎనర్జీ మరియు ఎనర్జీ స్టోరేజీ సిస్టమ్స్‌ను ఉపయోగిస్తోంది. కొత్త ట్రాన్స్‌మిషన్ లైన్లు ఈ ప్రాంతానికి ఇంధన భద్రతను కల్పిస్తాయి. అలాగే నీటి వినియోగం, పర్యావరణ పరిరక్షణలో అత్యున్నత ప్రమాణాలు పాటిస్తూ ఈ డేటా సెంటర్‌ను నిర్మిస్తున్నారు. రాష్ట్ర ప్రభుత్వం ఐటీ దిగ్గజాలను ఆకర్షించేందుకు ఎకరాకు కేవలం 99 పైసల లీజు వంటి విప్లవాత్మక రాయితీలు ప్రకటించడం వల్లే ఇలాంటి మెగా ప్రాజెక్టులు సాధ్యమయ్యాయని నిపుణులు అభిప్రాయపడుతున్నారు.

ఈ శంకుస్థాపన కార్యక్రమంలో కేంద్ర మంత్రులు రామ్మోహన్ నాయుడు, పెమ్మసాని చంద్రశేఖర్, రాష్ట్ర ఐటీ మంత్రి నారా లోకేష్,ఇతర ఉన్నతాధికారులు పాల్గొన్నారు. గూగుల్ క్లౌడ్ ప్రతినిధి బికాస్ కోలే మాట్లాడుతూ, విశాఖలో ఈ అడుగు 2047 నాటికి 'వికసిత్ భారత్' లక్ష్యాన్ని చేరుకోవడానికి ఒక పునాది రాయి అని పేర్కొన్నారు. 2028 నాటికి ఈ మూడు డేటా సెంటర్లు పూర్తి స్థాయిలో అందుబాటులోకి వస్తే, విశాఖపట్నం గ్లోబల్ ఏఐ ఎకానమీలో అత్యంత కీలకమైన నగరంగా ఆవిర్భవించనుంది.