IPL 2026 Final: విరాట్ మాస్టర్ క్లాస్ బ్యాటింగ్.. వరుసగా రెండోసారి ఛాంపియన్‌గా బెంగళూరు

IPL 2026 Final: ఐపీఎల్ 2026 ఫైనల్ మ్యాచ్‌లో రాయల్ ఛాలెంజర్స్ బెంగళూరు (ఆర్‌సీబీ) అద్భుత ప్రదర్శనతో గుజరాత్ టైటాన్స్‌పై ఐదు వికెట్ల తేడాతో విజయం సాధించింది. అహ్మదాబాద్‌లో జరిగిన ఈ కీలక పోరులో గెలిచిన ఆర్‌సీబీ వరుసగా రెండోసారి ఐపీఎల్ ట్రోఫీని సొంతం చేసుకుని చరిత్ర సృష్టించింది.

బౌలర్ల అద్భుత ప్రదర్శన

టాస్ గెలిచిన ఆర్‌సీబీ కెప్టెన్ రజత్ పాటిదార్ ముందుగా బౌలింగ్ ఎంచుకున్నాడు. ఆ నిర్ణయం జట్టుకు బాగా ఉపయోగపడింది. అనుభవజ్ఞులైన భువనేశ్వర్ కుమార్, జోష్ హేజిల్‌వుడ్ తొలి ఓవర్లలోనే గుజరాత్‌కు గట్టి దెబ్బ కొట్టారు. ఓపెనర్లు శుభ్‌మన్ గిల్ (10), సాయి సుదర్శన్ (12) త్వరగా అవుట్ కావడంతో గుజరాత్ ఒత్తిడిలో పడింది.

ఆ తర్వాత యువ బౌలర్ రసిక్ సలామ్ అద్భుతంగా బౌలింగ్ చేశాడు. అతను 27 పరుగులు ఇచ్చి మూడు వికెట్లు తీసి గుజరాత్ బ్యాటింగ్‌ను కట్టడి చేశాడు. నిషాంత్ సింధు (20), రాహుల్ తెవాటియా (7) వంటి కీలక ఆటగాళ్లను పెవిలియన్‌కు పంపాడు. మరోవైపు జోస్ బట్లర్ (19)ను వేగంగా స్టంపింగ్ చేయడం ద్వారా క్రునాల్ పాండ్యా కూడా జట్టుకు కీలక బ్రేక్ ఇచ్చాడు.

ఒక దశలో గుజరాత్ భారీ ఇబ్బందుల్లో పడినప్పటికీ వాషింగ్టన్ సుందర్ ఒంటరి పోరాటం చేశాడు. అతను 37 బంతుల్లో 50 పరుగులు చేసి జట్టును 155/8 స్కోర్‌కు చేర్చాడు.

కోహ్లీ సూపర్ ఇన్నింగ్స్‌

156 పరుగుల లక్ష్యంతో బరిలోకి దిగిన ఆర్‌సీబీకి విరాట్ కోహ్లీ అద్భుత ఆరంభం ఇచ్చాడు. మొదటి నుంచే దూకుడుగా ఆడిన కోహ్లీ కేవలం 42 బంతుల్లో 75 పరుగులు చేశాడు. అతని ఇన్నింగ్స్‌లో 9 ఫోర్లు, 3 సిక్సర్లు ఉన్నాయి. కగిసో రబాడా, మహ్మద్ సిరాజ్ వంటి బౌలర్లను ధైర్యంగా ఎదుర్కొని జట్టును విజయానికి దగ్గర చేశాడు.

వెంకటేష్ అయ్యర్ కూడా వేగంగా 16 బంతుల్లో 32 పరుగులు చేసి మంచి సహకారం అందించాడు. టిమ్ డేవిడ్ 24 పరుగులు, రజత్ పాటిదార్ 15 పరుగులు చేసి జట్టుకు మద్దతుగా నిలిచారు.

చివర్లో జితేష్ శర్మతో కలిసి కోహ్లీ జట్టును విజయ తీరాలకు చేర్చాడు. ఆర్‌సీబీ 18 ఓవర్లలోనే ఐదు వికెట్లు కోల్పోయి లక్ష్యాన్ని చేరుకుంది.

ఆర్‌సీబీకి మరో చారిత్రక క్షణం

గత ఏడాది తమ తొలి ఐపీఎల్ టైటిల్ గెలిచిన ఆర్‌సీబీ, ఈసారి కూడా ఛాంపియన్‌గా నిలిచి వరుసగా రెండోసారి ట్రోఫీని అందుకుంది. మ్యాచ్ ముగిసిన వెంటనే నరేంద్ర మోదీ స్టేడియంలో అభిమానుల సంబరాలు అంబరాన్ని తాకాయి. ఈ విజయంతో ఆర్‌సీబీ ఐపీఎల్‌లో అత్యంత బలమైన జట్లలో ఒకటిగా తన స్థానాన్ని మరింత బలపరుచుకుంది.