Nautapa Summer Heat: నేటి నుండి 9 డేంజరస్ డేస్ షురూ.. ఎండలో బయటకు వెళ్తే మీ పని అవుట్!

Nautapa Summer Heat: ఎండాకాలంలో అత్యంత వేడిగా ఉండే రోజులుగా చెప్పుకునే నౌతపా ప్రారంభమైంది. ఈ తొమ్మిది రోజుల పాటు ఎండలు మరింత తీవ్రంగా ఉండే అవకాశం ఉంది. చాలా ప్రాంతాల్లో ఉష్ణోగ్రతలు 45 డిగ్రీలకు పైగా నమోదవుతాయి. దీంతో వడదెబ్బ, డీహైడ్రేషన్, అలసట వంటి సమస్యలు ఎక్కువగా కనిపిస్తాయి. ముఖ్యంగా చిన్నపిల్లలు, వృద్ధులు, బయట పనులు చేసే వారు ఈ సమయంలో చాలా జాగ్రత్తగా ఉండాలి.

సరైన ఆహారం, తగినంత నీరు, మంచి అలవాట్లు పాటిస్తే ఈ వేడి రోజులను ఆరోగ్యంగా గడపవచ్చు. ఇప్పుడు నౌతపా సమయంలో ఏమి చేయాలి, ఏమి చేయకూడదు తెలుసుకుందాం.

India is set to witness Nautapa, the most intense phase of summer heat, from May 25 to June 2. Stay safe!

(ET) pic.twitter.com/mifuMmWVOp

— Digital Bharat (@MDigitalBharat) May 25, 2026

నౌతపా సమయంలో ప్రమాదం ఎందుకు ఎక్కువ?

ఈ సమయంలో సూర్యకిరణాలు నేరుగా భూమిపై పడటంతో వాతావరణం చాలా వేడిగా మారుతుంది. వేడి గాలులు ఎక్కువగా వీయడంతో శరీర ఉష్ణోగ్రత పెరుగుతుంది. దీనివల్ల వడదెబ్బ, తలనొప్పి, వాంతులు, తల తిరగడం, బలహీనత వంటి సమస్యలు రావచ్చు.

నౌతపా సమయంలో తప్పకుండా చేయాల్సినవి

1. ఎక్కువగా నీరు తాగాలి

వేసవిలో చెమట రూపంలో శరీరంలోని నీరు త్వరగా తగ్గిపోతుంది. అందుకే రోజంతా తగినంత నీరు తాగాలి. నిమ్మరసం, మజ్జిగ, కొబ్బరి నీరు, బెల్లం శర్బత్ వంటి పానీయాలు కూడా మంచివే.

2. తేలికైన ఆహారం తీసుకోవాలి

ఎక్కువ మసాలా, వేయించిన పదార్థాలు తగ్గించాలి. దోసకాయ, పుచ్చకాయ, ఖర్బూజా, పెరుగు వంటి చల్లదనాన్ని ఇచ్చే ఆహారం తినడం మంచిది.

3. బయటకు వెళ్లేటప్పుడు జాగ్రత్తలు తీసుకోవాలి

అత్యవసరం అయితేనే బయటకు వెళ్లాలి. తలపై టోపీ, లేదా గొడుగు వాడాలి. పలుచని లేత రంగు దుస్తులు ధరించడం మంచిది.

4. మధ్యాహ్నం ఎండలో తిరగకండి

ఉదయం 11 గంటల నుంచి సాయంత్రం 4 గంటల వరకు ఎండ చాలా ఎక్కువగా ఉంటుంది. ఈ సమయంలో బయటకు వెళ్లకుండా ఉండటం మంచిది.

5. ఇంటిని చల్లగా ఉంచాలి

ఇంట్లో గాలి సరిగ్గా వచ్చేలా చూడాలి. ఫ్యాన్, కూలర్ వాడాలి. కిటికీలకు తెరలు వేయడం వల్ల వేడి కొంత తగ్గుతుంది.

నౌతపా సమయంలో చేయకూడనివి

1. ఖాళీ కడుపుతో బయటకు వెళ్లకండి

ఏమీ తినకుండా ఎండలోకి వెళ్లితే త్వరగా నీరసం వస్తుంది. తల తిరిగే ప్రమాదం కూడా ఉంటుంది.

2. ఎక్కువ టీ, కాఫీ, కూల్‌డ్రింక్స్ తగ్గించండి

ఇవి శరీరంలో నీటి శాతం తగ్గించే అవకాశం ఉంది.

3. ఎండలో నుంచి వచ్చాక వెంటనే ఐస్ నీరు తాగకండి

బయట నుంచి వచ్చిన వెంటనే చల్లని నీరు తాగడం ఆరోగ్యానికి మంచిది కాదు. ముందు మాములు నీరు తాగాలి.

4. ఎక్కువ శారీరక శ్రమ చేయకండి

తీవ్ర ఎండలో భారీ వ్యాయామం లేదా కష్టమైన పనులు చేయడం వల్ల వడదెబ్బ ప్రమాదం పెరుగుతోంది.

5. పిల్లలు, వృద్ధులపై ప్రత్యేక శ్రద్ధ పెట్టాలి

వారికి తట్టుకునే శక్తి తక్కువగా ఉంటుంది. కాబట్టి తరచూ నీరు ఇవ్వాలి, వేడిలో ఎక్కువసేపు ఉండనివ్వకండి.

వడదెబ్బ లక్షణాలు ఎలా గుర్తించాలి?

ఎవరైనా అకస్మాత్తుగా తల తిరగడం, అధిక జ్వరం, వాంతులు, శ్వాస తీసుకోవడంలో ఇబ్బంది లేదా స్పృహ తప్పడం వంటి లక్షణాలు కనిపిస్తే వెంటనే చల్లని ప్రదేశానికి తీసుకెళ్లాలి. అవసరమైతే వెంటనే డాక్టర్‌ను సంప్రదించాలి.

ఈ తొమ్మిది రోజుల నౌతపా సమయంలో చిన్న చిన్న జాగ్రత్తలు తీసుకుంటే ఆరోగ్యంగా ఉండవచ్చు. తగినంత నీరు తాగడం, శరీరాన్ని చల్లగా ఉంచడం, అవసరం లేకుండా ఎండలో తిరగకుండా ఉండడం చాలా ముఖ్యం.