Peddi Promotions: బెంగళూరులో 'పెద్ది’గాడి సందడి.. ప్రమోషన్స్ కోసం నయా స్ట్రాటజీ..!

Peddi Promotions: రామ్ చరణ్ హీరోగా తెరకెక్కుతున్న భారీ సినిమా 'పెద్ది' ఇప్పుడు తెలుగు రాష్ట్రాలతో పాటు ఇతర భాషల్లో కూడా మంచి హైప్ తెచ్చుకుంటోంది. ఇప్పటికే భోపాల్‌లో సినిమా ప్రమోషన్స్ నిర్వహించిన రామ్ చరణ్, ఇప్పుడు బెంగళూరుకు వెళ్లి కన్నడ వెర్షన్ ప్రచారాన్ని ప్రారంభించనున్నాడు. దర్శకుడు బుచ్చిబాబు సానా తెరకెక్కిస్తున్న ఈ స్పోర్ట్స్ యాక్షన్ డ్రామా కన్నడలో కూడా విడుదల కానుంది. ఈ సందర్భంగా ఈరోజు బెంగళూరులో ప్రత్యేక ప్రెస్ మీట్ ఏర్పాటు చేశారు.

ఇటీవల తెలుగులో తెరకెక్కిన సినిమాలు కన్నడలో డబ్ అయి మంచి స్పందన తెచ్చుకుంటున్నాయి. అదే విధంగా పెద్ది కూడా అక్కడ మంచి ఫలితం సాధిస్తుందా అనే ఆసక్తి నెలకొంది. ముఖ్యంగా కన్నడ స్టార్ శివరాజ్ కుమార్ ఈ సినిమాలో ఉండటం వల్ల కర్ణాటకలో సినిమాకు మరింత బలం వచ్చే అవకాశాలు కనిపిస్తున్నాయి. జాన్వీ కపూర్ ఈ చిత్రంలో హీరోయిన్‌గా నటిస్తోంది.

ఇక మరోవైపు పెద్ది సినిమా విడుదలకు ముందే నిర్మాతలు, ఎగ్జిబిటర్ల మధ్య కొత్త వివాదం మొదలైంది. తెలంగాణలో ప్రస్తుతం అమల్లో ఉన్న రెంటల్ విధానానికి బదులుగా శాతం ఆధారిత షేరింగ్ విధానం తీసుకురావాలని ఎగ్జిబిటర్లు డిమాండ్ చేస్తున్నారు. అయితే నిర్మాతలు మాత్రం ఇది సరైన సమయం కాదని భావిస్తున్నారు.

ఈ సమస్యను పరిష్కరించేందుకు మెగాస్టార్ చిరంజీవి రంగంలోకి దిగినట్లు వార్తలు వినిపిస్తున్నాయి. ఈరోజు ఆయన ప్రముఖ ఎగ్జిబిటర్లతో సమావేశమై ఇరువర్గాల మధ్య చర్చలు జరపనున్నట్లు సమాచారం. పరిశ్రమలో చిరంజీవికి ఉన్న గౌరవం కారణంగా ఈ సమావేశంపై అందరి దృష్టి పడింది.

పెద్ది నిర్మాత రవి శంకర్ యెలమంచిలి మాట్లాడుతూ, ఒక్క సినిమాపై ఒత్తిడి తీసుకురావడం సరైంది కాదని అన్నారు. సినిమా పరిశ్రమ మొత్తం కలిసి ముందుకు వెళ్లాలని, ఇలాంటి పెద్ద నిర్ణయాలు చర్చల ద్వారా తీసుకోవాలని చెప్పారు. వెంటనే కొత్త విధానం అమలు చేయాలంటే సమస్యలు వచ్చే అవకాశం ఉందని ఆయన అభిప్రాయపడ్డారు.

ఇండస్ట్రీ వర్గాల సమాచారం ప్రకారం, పెద్ది సినిమాపై షేరింగ్ విధానం అమలు చేస్తే తెలుగు రాష్ట్రాల్లో నిర్మాతలు, డిస్ట్రిబ్యూటర్లకు భారీ ఆదాయ నష్టం వచ్చే అవకాశం ఉందని చెబుతున్నారు. ముఖ్యంగా భారీ స్థాయిలో విడుదలకు సిద్ధమవుతున్న ఈ సినిమాకు సింగిల్ స్క్రీన్ థియేటర్ల కలెక్షన్లు చాలా ముఖ్యమని అంటున్నారు.

అయితే ఎగ్జిబిటర్లు మాత్రం తమ డిమాండ్‌పై వెనక్కి తగ్గడం లేదు. తెలంగాణలో 180కి పైగా ఎగ్జిబిటర్లు కలిసి పెద్ది నుంచే కొత్త విధానం ప్రారంభించాలని కోరుతున్నారు. కర్ణాటక, తమిళనాడు, కేరళ, మహారాష్ట్ర వంటి రాష్ట్రాల్లో ఇప్పటికే శాతం పద్ధతి అమల్లో ఉందని, తెలంగాణలో కూడా అదే విధానం ఉండాలని వారు చెబుతున్నారు.

ఎగ్జిబిటర్ విజయేందర్ రెడ్డి మాట్లాడుతూ, మల్టీప్లెక్స్ థియేటర్లకు షేరింగ్ విధానం అమలు అవుతుంటే, సింగిల్ స్క్రీన్ థియేటర్లకు ఎందుకు ఇవ్వకూడదని ప్రశ్నించారు. తమ ఉద్దేశ్యం సినిమాను ఆపడం కాదని, అందరికీ న్యాయం జరిగేలా నిర్ణయం రావాలని కోరుతున్నట్లు తెలిపారు.

ఇప్పుడందరూ చిరంజీవి నిర్వహించే చర్చలపైనే ఆసక్తిగా ఎదురుచూస్తున్నారు. ఈ సమావేశం తర్వాత సమస్యకు పరిష్కారం దొరుకుతుందా లేదా అన్నది చూడాలి. పెద్ది విడుదలకు ముందు ఈ వివాదం ఎలా ముగుస్తుందో ఇండస్ట్రీ మొత్తం ఆసక్తిగా ఎదురుచూస్తుంది.