DK Shivakumar : మా ఎమ్మెల్యేలను కొనాలనుకున్నారు.. ఒక్కొక్కరికి రూ.5 కోట్లు ఇచ్చారు.. డీకే సంచలన కామెంట్స్!

కర్ణాటక(karnataka) డిప్యూటీ సీఎం డీకే శివకుమార్(DK Shivakumar) సంచలన కామెంట్స్ చేశారు. మార్చి 16న  అంటే ఈ రోజు జరగబోయే రాజ్యసభ ఎన్నిక(rajyasabha-elections) లను ప్రభావితం చేసేందుకు కొంతమంది ప్రయత్నిస్తున్నారని ఆరోపించారు. ఒడిశా(odisha) కాంగ్రెస్ ఎమ్మెల్యేలకు ఒక్కొక్కరికి రూ.5 కోట్ల చొప్పున ఆఫర్ చేశారని చెప్పుకొచ్చారు. ఇది బీజేపీ ఆపరేషన్ లోటస్ లో భాగమేనన్నారు. నలుగురు వ్యక్తలు తమ ఎమ్మెల్యేలను కాంటాక్ట్ చేశారని తెలిపారు. ఇద్దరు నిందితులను అరెస్ట్ చేసినట్లుగా  తెలిపారు. 

సదాశివనగర్‌లోని తన నివాసంతో పాటు ఏఐసీసీ అధ్యక్షుడు మల్లికార్జున ఖర్గే నివాసంలో విలేకరులతో మాట్లాడిన శివకుమార్, బిదాది సమీపంలోని ఒక రిసార్ట్‌లో బస చేసిన ఎమ్మెల్యేలను నలుగురు వ్యక్తులు సంప్రదించారని తెలిపారు. వారు భారీగా నగదుతో వచ్చి క్రాస్ ఓటింగ్ చేయాలని ఒత్తిడి తెచ్చారని ఆయన వివరించారు. ఈ ప్రలోభాలకు తమ ఎమ్మెల్యేలు లొంగలేదని, తక్షణమే పార్టీ నాయకత్వానికి సమాచారం అందించారని ఆయన పేర్కొన్నారు.

నలుగురు వ్యక్తులు ఈ కుట్రలో పాల్గొన్నారని, సురేష్ అనే స్థానిక వ్యక్తి వారికి సహకరించాడని శివకుమార్ తెలిపారు. ఆన్‌లైన్ ద్వారా ఎమ్మెల్యేలను సంప్రదించి, నేరుగా కలవడానికి ప్రయత్నించినట్లు ఆయన చెప్పారు. తమ ఎమ్మెల్యేకు ఐదు కోట్ల రూపాయలు ఆఫర్ చేశారని, అయితే తాను అమ్ముడుపోయే వ్యక్తిని కాదని సదరు ఎమ్మెల్యే స్పష్టంగా చెప్పినట్లు డిప్యూటీ సీఎం వెల్లడించారు. నిందితుల వద్ద ఉన్న చెక్కులు, ఇతర సామగ్రిని స్వాధీనం చేసుకుని పోలీసులకు ఫిర్యాదు చేస్తామని, చట్టపరమైన చర్యలు తప్పవని ఆయన హెచ్చరించారు.

Also Read :  ద్రవిడ గడ్డపై ఎన్నికల యుద్ధం.. డీఎంకే కోటకు బీటలు పడుతున్నాయా?

మిగిలిన వారిని పట్టుకునేందుకు ప్రయత్నాలు

పట్టుబడ్డ వ్యక్తులు తాము ఏ పని కోసం వచ్చామో అంగీకరించారని, మిగిలిన వారిని పట్టుకునేందుకు ప్రయత్నాలు జరుగుతున్నాయని శివకుమార్ అన్నారు. కర్ణాటకలోని బీజేపీ మిత్రులు సాగిస్తున్న భారీ ఆపరేషన్ లోటస్ కు ఇది ప్రత్యక్ష నిదర్శనమని ఆయన విమర్శించారు. సాధారణంగా ప్రతిపక్ష ప్రభుత్వాలను కూల్చేందుకు లేదా రాజ్యసభ ఎన్నికల్లో తమ అభ్యర్థులను గెలిపించుకునేందుకు బీజేపీ చేసే ప్రయత్నాలను కాంగ్రెస్ పార్టీ 'ఆపరేషన్ లోటస్'గా అభివర్ణిస్తుంటుంది.

ఇక పార్టీలో ఎలాంటి గందరగోళం లేదని శివకుమార్ స్పష్టం చేశారు. అధిష్టానం తీసుకునే నిర్ణయానికి కట్టుబడి ఉంటామని అందరు నాయకులు అంగీకరించారని ఆయన చెప్పారు. మరోవైపు, ఒడిశాకు చెందిన కాంగ్రెస్ ఎమ్మెల్యేలు ఆదివారం రాత్రి భువనేశ్వర్‌కు బయలుదేరి వెళ్లనున్నట్లు తెలుస్తోంది. సోమవారం ఉదయం జరిగే రాజ్యసభ ఓటింగ్‌లో వారు పాల్గొననున్నారు. బీజేపీ అదనంగా ఒక అభ్యర్థిని బరిలోకి దించడంతోనే ఇలాంటి గుర్రపు వ్యాపారం జరుగుతోందనే ఆందోళనలు వ్యక్తమవుతున్నాయి.

Also Read :  గ్యాస్‌ వినియోగదారులకు అలెర్ట్.. కేంద్రం సంచలన ఆదేశాలు