Madhya Pradesh: ఇండోర్‌లో ఘోర అగ్నిప్రమాదం: ఒకే ఇంట్లో ఏడుగురు సజీవ దహనం!

మధ్యప్రదేశ్‌(Madhya Pradesh) లోని ఇండోర్(indore) లో దారుణం జరిగింది. బ్రిజేశ్వరి అనెక్స్ నివాస ప్రాంతంలో తెల్లవారుజామున సంభవించిన భారీ అగ్నిప్రమాదం(fire accident) పెను విషాదాన్ని నింపింది. ఒక బహుళ అంతస్తుల భవనంలో ఒక్కసారిగా మంటలు చెలరేగడంతో ఏడుగురు ప్రాణాలు కోల్పోయారు. నిశ్శబ్దంగా ఉన్న ఆ ప్రాంతం ఒక్కసారిగా ఆర్తనాదాలు, దట్టమైన పొగతో అల్లకల్లోలంగా మారింది. సమాచారం అందుకున్న ఇండోర్ జిల్లా మేజిస్ట్రేట్ శివం వర్మ నేతృత్వంలోని బృందాలు ఘటనా స్థలానికి చేరుకుని సహాయక చర్యలు చేపట్టాయి.

పోలీసు కమిషనర్ సంతోష్ కుమార్ సింగ్ తెలిపిన ప్రాథమిక వివరాల ప్రకారం.. ఈ ప్రమాదానికి ప్రధాన కారణం ఇంటి బయట ఛార్జింగ్‌లో ఉన్న ఒక ఎలక్ట్రిక్ వాహనం. ఆ వాహనం ఛార్జింగ్ పాయింట్ వద్ద ఒక్కసారిగా పేలుడు సంభవించి మంటలు అంటుకున్నాయి. దురదృష్టవశాత్తూ, ఆ ఇంట్లో సుమారు 10కి పైగా గ్యాస్ సిలిండర్లు ఉండటంతో అవి కూడా పేలి మంటల తీవ్రత ఊహించని స్థాయికి పెరిగింది. ఈ భవనం మనోజ్ పుగాలియా అనే వ్యక్తికి చెందినది. ఆయన పాలిమర్ వ్యాపారం చేస్తుండటంతో, ఇంట్లోనే నిల్వ ఉంచిన రసాయనాలు మంటలు వేగంగా వ్యాపించడానికి కారణమయ్యాయి.

Also Read :  వదిలిపెట్టే ప్రసక్తే లేదు.. వెతికి మరీ వేటాడతాం.. ఇజ్రాయెల్ సంచలన ప్రకటన!

ముగ్గురు వ్యక్తులు ప్రాణాలతో

ఈ ప్రమాద సమయంలో స్థానికులు చూపిన చొరవతో ముగ్గురు వ్యక్తులు ప్రాణాలతో బయటపడ్డారు. పోలీసులు, ఫైర్ బ్రిగేడ్ రాకముందే తాము ముగ్గురిని రక్షించామని ఒక పొరుగు వ్యక్తి తెలిపారు. ప్రస్తుతం అగ్నిమాపక సిబ్బంది మంటలను అదుపులోకి తెచ్చారు. ఏడుగురు చనిపోయినట్లు అధికారులు ధృవీకరించారు. భవనంలోని రెండు అంతస్తులను క్లియర్ చేశామని, మూడవ అంతస్తులో ఎవరైనా ఉన్నారా అనే కోణంలో NDRF బృందాలు గాలిస్తున్నాయని జిల్లా కలెక్టర్ పేర్కొన్నారు. దట్టమైన నివాస ప్రాంతాల్లో ఇటువంటి ప్రమాదాలు జరిగినప్పుడు సహాయక చర్యలు చేపట్టడం ఎంత సవాలుతో కూడుకున్నదో ఈ ఘటన మరోసారి నిరూపించింది.

Also Read :  74 మంది ఎమ్మెల్యేలకు దీదీ షాక్‌