ఇరాన్‌కు కోలుకోలేని దెబ్బ.. ఇంటెలిజెన్స్ మంత్రిని హతమార్చిన ఇజ్రాయెల్!

మధ్యప్రాచ్యంలో యుద్ధం ముదిరిపాకాన పడింది. ఇరాన్ అగ్ర నాయకత్వమే లక్ష్యంగా ఇజ్రాయెల్ డిఫెన్స్ ఫోర్సెస్ జరిపిన దాడుల్లో ఇరాన్ ఇంటెలిజెన్స్ మంత్రి ఇస్మాయిల్ ఖతీబ్ మరణించారు. ఈ విషయాన్ని బుధవారం (మార్చి 18, 2026) ఇజ్రాయెల్ రక్షణ మంత్రి అధికారికంగా ప్రకటించారు. మంగళవారం రాత్రి జరిగిన మెరుపు దాడిలో ఖతీబ్ హతమైనట్లు తెలుస్తోంది. అయితే, దీనిపై ఇరాన్ ప్రభుత్వం నుంచి ఇప్పటి వరకు ఎటువంటి అధికారిక ప్రకటన వెలువడలేదు.

అమెరికా ప్రకటించిన $10 మిలియన్ల రివార్డ్
ఇస్మాయిల్ ఖతీబ్ ఆచూకీ తెలిపిన వారికి లేదా అతడిని పట్టుకోవడానికి సహకరించిన వారికి అమెరికా ప్రభుత్వం గతంలోనే 10 మిలియన్ డాలర్ల (సుమారు రూ. 83 కోట్లు) భారీ బహుమతిని ప్రకటించింది. అమెరికా మోస్ట్ వాంటెడ్ జాబితాలో ఉన్న ఖతీబ్‌ను ఇజ్రాయెల్ హతమార్చడం అంతర్జాతీయంగా చర్చనీయాంశమైంది. అదనపు అనుమతులు లేకుండానే ఏ ఇతర సీనియర్ ఇరాన్ అధికారినైనా లక్ష్యంగా చేసుకునే అధికారాన్ని సైన్యానికి కల్పించామని ఇజ్రాయెల్ రక్షణ మంత్రి ఇజ్రాయెల్ కారెట్జ్ స్పష్టం చేశారు.

వరుసగా కుప్పకూలుతున్న ఇరాన్ అగ్రనేతలు

గడిచిన 24 గంటల్లో ఇరాన్ కీలక రక్షణ, భద్రతా విభాగాలకు చెందిన ముగ్గురు అగ్రనేతలు మరణించడం ఆ దేశాన్ని అతలాకుతలం చేస్తోంది.
అలీ లారిజానీ: ఇరాన్ సుప్రీం నేషనల్ సెక్యూరిటీ కౌన్సిల్ కార్యదర్శి అలీ లారిజానీ, ఆయన కుమారుడు మోర్టెజా లారిజానీ మంగళవారం నాటి దాడిలో మరణించినట్లు ఇరాన్ ధృవీకరించింది.
ఘోలమ్రెజా సోలేమానీ: ఐఆర్‌జీసీ (IRGC)కి చెందిన శక్తివంతమైన బసిజ్ పారామిలిటరీ దళాధిపతి ఘోలమ్రెజా సోలేమానీ కూడా అమెరికా-ఇజ్రాయెల్ సంయుక్త దాడుల్లో మరణించినట్లు సమాచారం.
ఇస్మాయిల్ ఖతీబ్: తాజా దాడిలో ఇంటెలిజెన్స్ మంత్రి ఖతీబ్ మరణించడంతో ఇరాన్ నిఘా వ్యవస్థ దెబ్బతిన్నట్లయింది.

టెహ్రాన్‌లో క్షిపణి కేంద్రాలే లక్ష్యంగా దాడులు
ఇజ్రాయెల్ వైమానిక దళం కేవలం వ్యక్తులనే కాకుండా, టెహ్రాన్‌లోని వ్యూహాత్మక ప్రాంతాలను లక్ష్యంగా చేసుకుంది. రివల్యూషనరీ గార్డ్ యూనిట్, భద్రతా దళాల సరఫరా కేంద్రం, అత్యంత కీలకమైన క్షిపణి వ్యవస్థలపై ఐడీఎఫ్ దాడులు చేసింది. ఈ దాడుల్లో పలువురు సైనికులు మరణించడమే కాకుండా, క్షిపణి వ్యవస్థలు ధ్వంసమైనట్లు ఇజ్రాయెల్ ప్రకటించింది. ఈ పరిణామాలతో ఇరాన్ సుప్రీం లీడర్ ఖమేనీ ప్రభుత్వం తీవ్ర ఒత్తిడిలో పడింది. తమ అగ్ర నాయకత్వం వరుసగా తుడిచిపెట్టుకుపోతుండటంతో ఇరాన్ ఏ విధంగా స్పందిస్తుందనేది ఇప్పుడు ప్రపంచవ్యాప్తంగా ఉత్కంఠ రేపుతోంది.